തമിഴ്നാട്ടില് 15,000 ത്തിലധികം പുതിയ തൊഴിലവസരങ്ങൾ സൃഷ്ടിക്കാൻ ലക്ഷ്യമിട്ടുള്ള 26 ധാരണാപത്രങ്ങളിൽ ഒപ്പുവെച്ചതായി മുഖ്യമന്ത്രി എം.കെ സ്റ്റാലിൻ. "ടി.എൻ റൈസിംഗ് ജർമ്മനി ഇൻവെസ്റ്റ്മെന്റ് കോൺക്ലേവ്" പരിപാടിയുടെ ഭാഗമായി ജർമ്മനി സന്ദര്ശിച്ച ശേഷമാണ് എം.കെ സ്റ്റാലിൻ ഇക്കാര്യം അറിയിച്ചത്. ജർമ്മനി സന്ദർശന വേളയിൽ മൊത്തത്തിൽ 7,020 കോടി രൂപയുടെ ധാരണാപത്രങ്ങളിലാണ് ഒപ്പുവച്ചത്.
പുനരുപയോഗ ഊർജം, ഓട്ടോമോട്ടീവ് ഘടകങ്ങൾ, നൂതന ഗവേഷണ വികസനം എന്നിവയിലെ ആഗോള കമ്പനികള് അടുത്ത ഘട്ട വളർച്ചയ്ക്കായി തമിഴ്നാടിനെ തിരഞ്ഞെടുത്തു. ജർമ്മനി യൂറോപ്പിന്റെ വ്യാവസായിക നട്ടെല്ല് പോലെ, ഇന്ത്യയുടെ വ്യാവസായിക കേന്ദ്രമാണ് തമിഴ്നാട്. തമിഴ്നാട് ഇന്ത്യയുടെ ജർമ്മനിയാണെന്നും സ്റ്റാലിന് പറഞ്ഞു. ബിഎംഡബ്ല്യു, ഡൈംലർ മെഴ്സിഡസ്-ബെൻസ് (Daimler Mercedes-Benz), ഷ്നൈഡർ (Schneider), സീമെൻസ് , ഇസഡ്എഫ്, ബോഷ് എന്നിവയുൾപ്പെടെ 60 ലധികം ജർമ്മൻ കമ്പനികൾ ഇതിനകം തമിഴ്നാട്ടിൽ ഉണ്ട്.
'മെയ്ഡ് ഇൻ ജർമ്മനി' പോലെ 'മെയ്ഡ് ഇൻ തമിഴ്നാട്' ആഗോള ഗുണനിലവാരത്തിന്റെ അടയാളമായി ഉയർന്നുവരുകയാണ്. ജർമ്മൻ കൃത്യതയെ തമിഴ്നാടിന്റെ സാധ്യതകളുമായി സംയോജിപ്പിക്കുക, യൂറോപ്പിനും ഏഷ്യയ്ക്കും ഇടയിൽ ശക്തമായ ഒരു വ്യാപാര ബന്ധം സൃഷ്ടിക്കുക തുടങ്ങിയവയായിരുന്നു സന്ദര്ശനത്തിന്റെ ലക്ഷ്യങ്ങളെന്നും സ്റ്റാലിന് പറഞ്ഞു.
റെയിൽവേ വാതിലുകളിലും ബ്രേക്കിംഗ് സിസ്റ്റങ്ങളിലും ശ്രദ്ധ കേന്ദ്രീകരിക്കുന്ന മ്യൂണിക്ക് ആസ്ഥാനമായുള്ള നോർ-ബ്രെംസെ (Knorr-Bremse) സംസ്ഥാനത്ത് അത്യാധുനിക പ്ലാന്റ് സ്ഥാപിക്കുന്നതിനായി 2,000 കോടി രൂപയുടെ നിക്ഷേപം പ്രഖ്യാപിച്ചു. ഈ പദ്ധതി 3,500 തൊഴിലവസരങ്ങൾ സൃഷ്ടിക്കും.
ലോകത്തിലെ ഏറ്റവും മികച്ച കാറ്റാടി നിർമ്മാതാക്കളിൽ ഒന്നായ നോർഡെക്സ് ഗ്രൂപ്പ് 1,000 കോടി രൂപ നിക്ഷേപത്തോടെ തമിഴ്നാട്ടിൽ 2,500 പുതിയ തൊഴിലവസരങ്ങൾ സൃഷ്ടിക്കും.
Tamil Nadu secures ₹7,020 crore German investments through MoUs, creating over 15,000 jobs.
Read DhanamOnline in English
Subscribe to Dhanam Magazine