1959ലാണ് ഇന്ത്യയില് ഫെവിക്കോള് എന്ന ഉല്പന്നം പിറന്നത്. അക്കാലത്ത് ആശാരിമാര് പ്രധാനമായും മൃഗജന്യമായ പരമ്പരാഗത പശകളെയാണ് ആശ്രയിച്ചിരുന്നത്. ഉപയോഗിക്കാന് ബുദ്ധിമുട്ടുള്ളതും വൃത്തിഹീനവും പലപ്പോഴും വിശ്വാസ്യത കുറഞ്ഞതുമായിരുന്നു അവ.
പശ വിപണിയിലെ എല്ലാ പ്രശ്നങ്ങളും ഒരേസമയം പരിഹരിക്കാന് പിഡിലൈറ്റ് ശ്രമിച്ചില്ല. പകരം, ഒരു പ്രശ്നത്തിനുള്ള മികച്ച പരിഹാരത്തിലാണ് ശ്രദ്ധ കേന്ദ്രീകരിച്ചത്: കൂടുതല് ഉറപ്പും ഉപയോഗിക്കാന് സൗകര്യവുമുള്ള സിന്തറ്റിക് പശ നിര്മിക്കുക. ആ വ്യക്തമായ ആശയമാണ് പിന്നീട് ഇന്ത്യയിലെ ഏറ്റവും ജനപ്രിയ ബ്രാന്ഡുകളിലൊന്നായും പിഡിലൈറ്റ് ഇന്ഡസ്ട്രീസിന്റെ മുന്നിര ഉല്പ്പന്നമായും ഫെവിക്കോളിനെ വളര്ത്തിയത്.
എന്നാല് ഫെവിക്കോള് എന്താണ് കെട്ടിപ്പടുത്തത് എന്നതിലുപരി, അത് എങ്ങനെ സാധിച്ചു എന്നതാണ് കൂടുതല് ശ്രദ്ധേയം. ഉല്പ്പന്നത്തിന്റെ ഗുണമേന്മ മാത്രമായിരുന്നില്ല അതിനു പിന്നില്. ബ്രാന്ഡ്, വിതരണ ശൃംഖല, ഉപഭോക്തൃവിശ്വാസം എന്നിവ ഘട്ടംഘട്ടമായി കെട്ടിപ്പടുത്തതാണ് ഫെവിക്കോളിന്റെ വിജയരഹസ്യം.
മിക്ക കമ്പനികളും അന്തിമ ഉപഭോക്താവിനെയാണ് ആദ്യം ലക്ഷ്യമിടുന്നത്. എന്നാല് ഫര്ണിച്ചര് നിര്മാണത്തില് ഏത് പശ ഉപയോഗിക്കണമെന്ന് തീരുമാനിക്കുന്നത് വീട്ടുടമയല്ല, ആശാരിയാണ് എന്ന കാര്യം ഫെവിക്കോള് തിരിച്ചറിഞ്ഞു. അതുകൊണ്ടുതന്നെ ഉപഭോക്തൃ പരസ്യങ്ങളില് മാത്രം പണം ചെലവഴിക്കാതെ ആശാരിമാരുമായി ശക്തവും ദീര്ഘകാലം നിലനില്ക്കുന്നതുമായ ബന്ധം വളര്ത്താനാണ് കമ്പനി ശ്രമിച്ചത്. ബന്ധങ്ങള് കേന്ദ്രീകരിച്ചുള്ള ഈ തന്ത്രം യഥാര്ഥത്തില് മികച്ചൊരു വിതരണ തന്ത്രം കൂടിയായിരുന്നു. അതിലൂടെ വിപണിയില് എതിരാളികള്ക്ക് എളുപ്പത്തില് തകര്ക്കാനാകാത്ത അടിത്തറ ഫെവിക്കോള് സൃഷ്ടിച്ചു.
ഫെവിക്കോളിനെ ഇന്ത്യയിലെ ഓരോ വീടിനും പരിചിതമാക്കിയ പരസ്യവാചകം പിന്നീട് എത്തി: ''ഫെവിക്കോള് കാ മസ്ബൂത് ജോഡ്.'' പശയുടെ ഉറപ്പ് എന്ന ഉല്പന്ന സവിശേഷതയെ വൈകാരികമായൊരു ബ്രാന്ഡ് വാഗ്ദാനമാക്കി പിഡിലൈറ്റ് മാറ്റി. നര്മ്മം, ഇന്ത്യന് ജീവിതസാഹചര്യങ്ങള്, സര്ഗാത്മകത എന്നിവയായിരുന്നു ഫെവിക്കോള് പരസ്യങ്ങളുടെ മുഖമുദ്ര. ആളുകളെക്കൊണ്ട് തിങ്ങിനിറഞ്ഞ ബസ് പോലും ഒരുമിച്ച് ചേര്ത്തുനിര്ത്തുന്ന 'പശയുടെ കരുത്ത്' പോലുള്ള അസാധാരണ ദൃശ്യങ്ങളിലൂടെ ബ്രാന്ഡിന്റെ സന്ദേശം ജനമനസ്സുകളില് പതിപ്പിച്ചു. ആളുകള് ഫെവിക്കോളിന്റെ പരസ്യങ്ങള് വെറുതെ കണ്ടുപോകുകയായിരുന്നില്ല. അവ ഓര്ത്തുവെക്കുകയും ആവര്ത്തിച്ച് പറയുകയും അടുത്ത പരസ്യത്തിനായി കാത്തിരിക്കുകയും ചെയ്തു.
ബ്രാന്ഡിനോടുള്ള ഇഷ്ടം മാത്രം വിപണി കീഴടക്കാന് മതിയാകില്ല. ഉല്പ്പന്നം എല്ലായിടത്തും ലഭ്യമാകുകയും വേണം. ഡീലര്മാര്, വിതരണക്കാര്, ആശാരിമാര്, കരാറുകാര്, ഇന്റീരിയര് ഡിസൈനര്മാര് എന്നിവരെ ബന്ധിപ്പിച്ചുകൊണ്ട് ഫെവിക്കോള് വിപുലമായൊരു ശൃംഖല കെട്ടിപ്പടുത്തു. ഉയര്ന്ന ബ്രാന്ഡ് ഓര്മ മാത്രമായിരുന്നില്ല ഇതിന്റെ ഫലം. ഫാക്ടറി മുതല് ആശാരിപ്പണിശാല വരെ ഓരോ കണ്ണിക്കും ഫെവിക്കോളിനൊപ്പം തുടരാന് കാരണം നല്കുന്ന സമ്പൂര്ണ ബിസിനസ് ആവാസവ്യവസ്ഥയാണ് രൂപപ്പെട്ടത്.
ഒരൊറ്റ പശ ഉല്പ്പന്നമായി ഫെവിക്കോള് ഒതുങ്ങിനിന്നില്ല. വ്യത്യസ്ത ആവശ്യങ്ങള്ക്കും ഉപയോഗങ്ങള്ക്കുമായി നിരവധി പശ ഉല്പ്പന്നങ്ങളിലേക്ക് ബ്രാന്ഡ് ക്രമേണ വ്യാപിച്ചു. അതേസമയം, പിഡിലൈറ്റ് വാട്ടര്പ്രൂഫിംഗ് ഉല്പ്പന്നങ്ങളായ ഡോ. ഫിക്സിറ്റ്, സീലന്റ് വിഭാഗത്തിലെ എം-സീല് തുടങ്ങിയ പുതിയ മേഖലകളിലേക്കും വളര്ന്നു. ഇവിടെയും അടിസ്ഥാന തന്ത്രം ലളിതമായിരുന്നു: വിശ്വാസ്യതയുള്ള ഒരു ബ്രാന്ഡ്, ഉപഭോക്താക്കളുടെ വ്യത്യസ്ത പ്രശ്നങ്ങള്, ഒന്നിലധികം പരിഹാരങ്ങള്.
വാര്ഷിക വില്പ്പന 13,000 കോടി രൂപ കടന്ന പിഡിലൈറ്റ് ഇന്ഡസ്ട്രീസിന്റെ മുന്നിര ബ്രാന്ഡാണ് ഫെവിക്കോള്. എന്നാല് ഇവിടെ ഒരു കാര്യം കൃത്യമായി വ്യക്തമാക്കേണ്ടതുണ്ട്. ഫെവിക്കോളിന്റെ മാത്രം വരുമാനം പിഡിലൈറ്റ് പ്രത്യേകം വെളിപ്പെടുത്തുന്നില്ല. അതിനാല് 13,000 കോടിയിലധികം വരുന്ന കമ്പനിയുടെ മുഴുവന് വില്പ്പനയും ഫെവിക്കോളിന്റേതാണെന്ന് പറയുന്നത് ശരിയല്ല.
അതേസമയം, പശയും അനുബന്ധ ഉല്പ്പന്നങ്ങളും ഉള്പ്പെടുന്ന വിപണിയില് പിഡിലൈറ്റിന് നേതൃസ്ഥാനം നേടിക്കൊടുക്കുന്നതില് ഫെവിക്കോള് നിര്ണായക പങ്കുവഹിച്ചിട്ടുണ്ട്. പതിറ്റാണ്ടുകളിലൂടെ ഫെവിക്കോള് നേടിയെടുത്ത വിശ്വാസമാണ് കമ്പനിയുടെ മറ്റ് ബ്രാന്ഡുകളും ഉല്പ്പന്നവിഭാഗങ്ങളും വളര്ത്താനുള്ള അടിത്തറയായി മാറിയത്.
1. യഥാര്ഥ പ്രശ്നത്തിന് പരിഹാരം കണ്ടെത്തുക -എല്ലാം ഒരേസമയം പരിഹരിക്കാന് ശ്രമിക്കരുത്.
2. വാങ്ങല് തീരുമാനത്തെ യഥാര്ഥത്തില് സ്വാധീനിക്കുന്നത് ആരാണെന്ന് കണ്ടെത്തുക -അത് എല്ലായ്പ്പോഴും അന്തിമ ഉപഭോക്താവായിരിക്കണമെന്നില്ല.
3. വളര്ച്ചയുടെ പിന്നാലെ പോകുന്നതിനുമുമ്പ് വിശ്വാസം നേടുക.
4. ശക്തമായ ഒരൊറ്റ ബ്രാന്ഡ് വാഗ്ദാനം സൃഷ്ടിക്കുക -അത് നിരന്തരം ആവര്ത്തിക്കുക.
5. വിവരങ്ങള് മാത്രം നല്കുന്ന പരസ്യങ്ങളല്ല, ഓര്മയില് തങ്ങിനില്ക്കുന്ന പരസ്യങ്ങള് സൃഷ്ടിക്കുക.
6. വിതരണ ശൃംഖലയെ മത്സരശേഷിയായി വളര്ത്തുക -പിന്നീട് പരിഗണിക്കേണ്ട ഘടകമായി കാണരുത്.
7. ഉപയോക്താക്കളെ ഒറ്റത്തവണത്തെ ഉപഭോക്താക്കളായല്ല, ദീര്ഘകാല പങ്കാളികളായി മാറ്റുക.
8. പ്രധാന ബ്രാന്ഡിനെ കേന്ദ്രീകരിച്ച് നിരന്തരം പുതിയ ഉല്പ്പന്നങ്ങള് വികസിപ്പിക്കുക.
9. ഒരൊറ്റ ഉല്പ്പന്നമല്ല, സമ്പൂര്ണമായൊരു ഉല്പ്പന്നവിഭാഗം തന്നെ കെട്ടിപ്പടുക്കുക.
10. മാസങ്ങളിലല്ല, പതിറ്റാണ്ടുകളുടെ അടിസ്ഥാനത്തില് ചിന്തിക്കുക.
മുംബൈയിലെ ഉല്പ്പാദന കേന്ദ്രത്തില്നിന്ന് ഫെവിക്കോളിന്റെ ആദ്യ കുപ്പി പുറത്തിറങ്ങി ആറു പതിറ്റാണ്ടിലേറെ കഴിഞ്ഞിട്ടും അതിന്റെ വളര്ച്ച ഇന്ത്യന് ബിസിനസ് ലോകത്തിന് വ്യക്തമായൊരു പാഠം നല്കുന്നു. ആളുകള് ദിവസേന നേരിടുന്ന യഥാര്ഥ പ്രശ്നം മറ്റാരെക്കാളും മികച്ച രീതിയില് പരിഹരിക്കുക. ഉല്പ്പന്നം വാങ്ങാനുള്ള തീരുമാനത്തെ യഥാര്ഥത്തില് സ്വാധീനിക്കുന്ന വ്യക്തിയെ കണ്ടെത്തുക. തലമുറകളിലൂടെ വളരുന്ന വിശ്വാസം സൃഷ്ടിക്കാന് ആവശ്യമായ ക്ഷമ കാണിക്കുക.
ഒരു സാധാരണ പശക്കുപ്പി ആയിരക്കണക്കിന് കോടി രൂപയുടെ ബിസിനസിന് അടിത്തറയായതും ഇന്ത്യയിലെ വീടുകളിലെല്ലാം പരിചിതമായ പേരായി മാറിയതും അങ്ങനെയാണ്.
Read DhanamOnline in English
Subscribe to Dhanam Magazine