ഇന്ത്യൻ വ്യവസായി ഗൗതം അദാനിയെ മറികടന്ന് ബൈറ്റ്ഡാൻസ് (ByteDance) സ്ഥാപകനായ ജാങ് യീമിംഗ് ഏഷ്യയിലെ ഏറ്റവും ധനികനായ വ്യക്തിയായി. ബ്ലൂംബെർഗ് ശതകോടീശ്വര സൂചിക പ്രകാരം 43-കാരനായ ഇദ്ദേഹത്തിന്റെ ആസ്തി 105 ബില്യൺ ഡോളറിലധികമായി ($105 billion) വർദ്ധിച്ചു. 2019 മാർച്ച് മാസത്തിലുണ്ടായിരുന്ന 13 ബില്യൺ ഡോളറിൽ നിന്ന് എട്ട് മടങ്ങിലധികം വളർച്ചയാണ് അദ്ദേഹത്തിന്റെ സമ്പത്തിലുണ്ടായത്. നിര്മ്മിത ബുദ്ധി (AI) മേഖലയിലുണ്ടായ കുതിച്ചുചാട്ടവും ബൈറ്റ്ഡാൻസിന്റെ ഡിജിറ്റൽ പ്ലാറ്റ്ഫോമുകളുടെ വിജയവുമാണ് ഈ നേട്ടത്തിന് പിന്നിൽ.
2012-ൽ ബീജിംഗിലെ നാല് ബെഡ്റൂം അപ്പാർട്ട്മെന്റിലാണ് ജാങ് യീമിംഗ് ബൈറ്റ്ഡാൻസ് കമ്പനിക്ക് തുടക്കമിട്ടത്. മൈക്രോസോഫ്റ്റ്, കുക്സുൻ (Kuxun) തുടങ്ങിയ സ്ഥാപനങ്ങളിലെ പ്രവൃത്തിപരിചയത്തിനും '99fang.com' എന്ന റിയൽ എസ്റ്റേറ്റ് സംരംഭത്തിനും ശേഷമാണ് അദ്ദേഹം ബൈറ്റ്ഡാൻസ് ആരംഭിക്കുന്നത്. ഉപഭോക്താക്കളുടെ താല്പര്യങ്ങൾക്കനുസരിച്ച് മെഷീൻ ലേണിംഗ് അൽഗോരിതങ്ങൾ ഉപയോഗിച്ച് ഉള്ളടക്കം ക്രമീകരിച്ചതാണ് ഇദ്ദേഹത്തിന്റെ പ്രധാന മുന്നേറ്റമായത്. 'തൗത്യാവോ' (Toutiao) എന്ന വാർത്താ ആപ്പിന് ശേഷം 2016-ൽ 'ദൗയിനും' (Douyin) 2017-ൽ അന്താരാഷ്ട്ര വിപണിക്കായി 'ടിക് ടോക്കും' (TikTok) പുറത്തിറക്കി. ഏകദേശം 800 മില്യൺ ഡോളറിന് 'മ്യൂസിക്കലി' (Musical.ly) ഏറ്റെടുത്ത് ടിക് ടോക്കിൽ ലയിപ്പിച്ചത് ആഗോളതലത്തിൽ വലിയ തരംഗമായി മാറി.
2021-ൽ ബൈറ്റ്ഡാൻസിന്റെ സി.ഇ.ഒ പദവി ഒഴിഞ്ഞെങ്കിലും കമ്പനിയുടെ 50 ശതമാനത്തിലധികം വോട്ടിംഗ് അവകാശം ജാങ് നിലനിർത്തുന്നുണ്ട്. നിലവിൽ 'ദൗബാവോ' (Doubao) എഐ ചാറ്റ്ബോട്ട് ഉൾപ്പെടെയുള്ള ജനറേറ്റീവ് എഐ സാങ്കേതികവിദ്യകളിലേക്ക് ബൈറ്റ്ഡാൻസ് വൻതോതിൽ നിക്ഷേപം നടത്തുന്നുണ്ട്. അമേരിക്കയിലെയും ചൈനയിലെയും കടുത്ത റെഗുലേറ്ററി ഉപരോധങ്ങളും തടസങ്ങളും നേരിടേണ്ടി വന്നെങ്കിലും, എഐ സാങ്കേതികവിദ്യയിലെ തന്ത്രപ്രധാനമായ നിക്ഷേപങ്ങളിലൂടെയാണ് അദ്ദേഹം ഈ തിളക്കമാർന്ന തിരിച്ചുവരവ് നടത്തിയത്.
Read DhanamOnline in English
Subscribe to Dhanam Magazine