ആഗോള സാമ്പത്തിക വിപണിയിൽ എഐ ഓഹരികളിലെ കനത്ത തകർച്ചയും കമ്പനികളുടെ കടബാധ്യതയും വലിയ പ്രതിസന്ധിയുടെ സൂചനകൾ നൽകുന്നു. നാസ്ഡാക് സൂചികയിൽ നിന്ന് 2.5 ലക്ഷം കോടി ഡോളറിന്റെ വിപണിമൂല്യം നഷ്ടപ്പെട്ടതോടെ, നിക്ഷേപകർ എഐ അടിസ്ഥാന സൗകര്യ വികസന കമ്പനികളുടെ ഫണ്ട് സമാഹരണവും തിരിച്ചടവ് ശേഷിയും സൂക്ഷ്മമായി നിരീക്ഷിക്കുന്നു.
യു.എസ് ടെക്നോളജി ഓഹരികളിൽ അടുത്തിടെ നേരിട്ട കനത്ത തകർച്ചയും ആർട്ടിഫിഷ്യൽ ഇന്റലിജൻസ് (എഐ) അടിസ്ഥാന സൗകര്യ വികസന കമ്പനികളുടെ കടം തിരിച്ചടയ്ക്കാനുള്ള ശേഷിയെക്കുറിച്ചുള്ള ആശങ്കകളും ആഗോള വിപണിയിൽ പുതിയ മുന്നറിയിപ്പുകൾക്ക് വഴിവെക്കുന്നു. യു.എസിലെ നാസ്ഡാക് സൂചികയിലെ ഓഹരികളിൽ നിന്ന് ഏകദേശം 2.5 ലക്ഷം കോടി ഡോളറിന്റെ വിപണിമൂല്യം ഒറ്റയടിക്ക് ഇല്ലാതായത്.
ഈയൊരു പശ്ചാത്തലത്തിൽ, എഐ അടിസ്ഥാന സൗകര്യ വികസന കമ്പനികളുടെ ഫണ്ട് സമാഹരണവും തിരിച്ചടവ് ശേഷിയും നിക്ഷേപകർ സൂക്ഷ്മമായി നിരീക്ഷിക്കുകയാണ്. നിലവിലെ സാഹചര്യം അതീവ ഗുരുതരമായ സാമ്പത്തിക പ്രതിസന്ധിയിലേക്ക് (Systemic Financial Crisis) വഴിവെക്കില്ലെന്നാണ് വിലയിരുത്തലെങ്കിലും, വിപണിയിലെ അപകട സാധ്യതകളെ നിസാരമായി കാണാനാകില്ലെന്നും സാമ്പത്തിക വിദഗ്ദ്ധർ മുന്നറിയിപ്പ് നൽകുന്നു.
എഐ വിപണിയുടെ വളർച്ച സെമികണ്ടക്ടർ ചിപ്പുകളുടെ ആവശ്യകതയിൽ മാത്രം ഒതുങ്ങുന്നില്ല. എൻവിഡിയ പോലുള്ള ചിപ്പ് നിർമാതാക്കൾ, വൻകിട ക്ലൗഡ് കമ്പനികളായ ഹൈപ്പർസ്കെയിലറുകൾ, കോർവീവ് പോലുള്ള നിയോക്ലൗഡ് കമ്പനികൾ, ഡാറ്റ സെന്റർ നിർമാതാക്കൾ, സ്വകാര്യ വായ്പാ സ്ഥാപനങ്ങൾ, ബോണ്ട് നിക്ഷേപകർ എന്നിങ്ങനെ പരസ്പരം ബന്ധിപ്പിക്കപ്പെട്ട ധനകാര്യ ശൃംഖലയാണ് രൂപപ്പെട്ടിരിക്കുന്നത്. ഇതിൽ ഒരു ഭാഗത്ത് മാന്ദ്യം ഉണ്ടായാൽ അത് ഡൊമിനോ ഇഫക്ട് (domino effect) പോലെ മറ്റുള്ളവരിലേക്കും വ്യാപിക്കും.
ഡാറ്റ സെന്ററുകൾക്കായുള്ള നിർമാണം, ജി.പി.യു വാങ്ങൽ, വൈദ്യുതി സംവിധാനങ്ങൾ എന്നിവയ്ക്ക് ബാങ്ക് വായ്പകൾക്കൊപ്പം പ്രൈവറ്റ് ക്രെഡിറ്റ്, ലീസ് ഫിനാൻസിങ്, അസറ്റ്-ബാക്ക്ഡ് വായ്പകൾ എന്നിവയും ഉപയോഗിക്കുന്നു. അതായത്, എഐ ആവശ്യകത കുറഞ്ഞാലോ പുതിയ ഫണ്ട് ലഭ്യത കുറയുകയോ അല്ലെങ്കിൽ പലിശ നിരക്ക് ഉയരുകയോ ചെയ്താൽ ആഘാതം ഒരു കമ്പനിയിൽ മാത്രമായി ഒതുങ്ങില്ലെന്ന് ചുരുക്കം.
ഈ ധനകാര്യ ശൃംഖലയിലെ ഏറ്റവും ശ്രദ്ധേയമായ ഉദാഹരണങ്ങളിലൊന്നാണ് കോർവീവ് (CoreWeave). കമ്പനിയുടെ 2026 ജൂൺ അവസാനത്തെ കണക്കുപ്രകാരം മൊത്തം കടബാധ്യത 3,560 കോടി ഡോളറിലെത്തിയിരിക്കുന്നു. ഇതിനുപുറമെ, വിവിധ ലീസുകളും മറ്റ് സാമ്പത്തിക ബാധ്യതകളും കൂടി കണക്കിലെടുക്കുമ്പോൾ കമ്പനിയുടെ മേലുള്ള സാമ്പത്തിക സമ്മർദം കൂടുതൽ വലുതാകുന്നു. നിലവിൽ ചില ബോണ്ടുകളുടെ യീൽഡ് (Yield) 15–16 ശതമാനത്തിനു മുകളിലെത്തിയതും വിപണിയിലെ ആശങ്കകൾ ഇരട്ടിപ്പിക്കുന്നുണ്ട്.
കമ്പനിയുടെ അഞ്ച് വർഷത്തെ ക്രെഡിറ്റ് ഡിഫോൾട്ട് സ്വാപ് (CDS) നിരക്ക് 1,000 ബേസിസ് പോയിന്റ് കടന്നത് മറ്റൊരു ഗൗരവതര മുന്നറിയിപ്പാണ്. അതായത്, 100 കോടി ഡോളറിന്റെ കടത്തിന് പരിരക്ഷ ഉറപ്പാക്കാൻ വർഷംതോറും 10 കോടി ഡോളർ പ്രീമിയം നൽകേണ്ടിവരുന്ന സാഹചര്യം. ഇത് കമ്പനിയുടെ പാപ്പരത്തം ഉറപ്പാക്കുന്ന ഒരു പ്രവചനമല്ലെങ്കിലും വായ്പകൾ തിരിച്ചടയ്ക്കുന്നതിനെക്കുറിച്ച് നിക്ഷേപകർക്കും വിപണിക്കും എത്രത്തോളം ആശങ്കയുണ്ട് എന്നതിന്റെ വ്യക്തമായ സൂചനയാണ്.
എഐ അടിസ്ഥാന സൗകര്യ വികസനത്തിനായി ആറ് പ്രമുഖ യു.എസ് ഹൈപ്പർസ്കെയിലറുകൾ 2025–30 കാലയളവിൽ 7 ട്രില്യൺ ഡോളറിലേറെ (ഏകദേശം 7 ലക്ഷം കോടി ഡോളർ) ചെലവഴിക്കുമെന്നാണ് എസ് ആൻഡ് പി ഗ്ലോബലിന്റെ വിലയിരുത്തൽ. ഇതിൽ നേരിട്ടുള്ള ബാധ്യതകൾ മാത്രമല്ല, വിവിധ ലീസ് കരാറുകളും സ്വകാര്യ വായ്പകളും ഉൾപ്പെടുന്നുണ്ട്.
ഹൈപ്പർസ്കെയിലർ കരാറിലെത്തിയെങ്കിലും ഇതുവരെ പ്രവർത്തനക്ഷമമാകാത്ത ലീസ് ബാധ്യതകൾ മാത്രം ഏകദേശം 675 ബില്യൺ (67,500 കോടി) ഡോളർ വരുമെന്നാണ് പ്രമുഖ റേറ്റിംഗ് ഏജൻസികളുടെ റിപ്പോർട്ടുകൾ ചൂണ്ടിക്കാണിക്കുന്നത്. ഇത് വിപണിയിൽ ഡിമാൻഡ് കുറയുകയോ സാമ്പത്തിക മാന്ദ്യം ഉണ്ടാവുകയോ ചെയ്താൽ കമ്പനികളുടെ പ്രവർത്തന ലാഭത്തെയും സാമ്പത്തിക ഭദ്രതയെയും ഗുരുതരമായി ബാധിക്കുമെന്ന ആശങ്ക വിപണിയിൽ ശക്തമാണ്.
വൻകിട ഹൈപ്പർസ്കെയിലറുകൾക്ക് ശക്തമായ ബാലൻസ് ഷീറ്റും വൈവിധ്യമാർന്ന വരുമാന സ്രോതസ്സുകളുമുണ്ട്. എന്നാൽ നിയോക്ലൗഡ് കമ്പനികളുടെ നിലനിൽപ്പ് ഉപഭോക്താക്കളുടെ എണ്ണം, ജി.പി.യു ഉപയോഗനിരക്ക്, വായ്പകൾ സമയബന്ധിതമായി പുതുക്കാനുള്ള ശേഷി എന്നിവയെ ആശ്രയിച്ചാണിരിക്കുന്നത്. ചിപ്പുകൾ അതിവേഗത്തിൽ സാങ്കേതികമായി കാലഹരണപ്പെടുന്നതും ഡാറ്റ സെന്ററുകളുടെ ഉയർന്ന പ്രവർത്തനച്ചെലവും ഈ കമ്പനികളുടെ ലാഭക്ഷമതയെ സാരമായി ബാധിച്ചേക്കാം.
ഇതിനിടെ യു.എസ് ട്രഷറി ബോണ്ട് വിപണിയിൽ വലിയ സമ്മർദമില്ലെന്നത് ആശ്വാസകരമായ ഒരു ഘടകമാണ്. അതിനാൽ ഇപ്പോഴത്തെ സാഹചര്യം മൊത്തത്തിലുള്ള ഒരു സാമ്പത്തിക മാന്ദ്യത്തിനു ഉപരിയായി, എഐ ഓഹരികളിലെയും ഉയർന്ന റിസ്കുള്ള കടപ്പത്രങ്ങളിലെയും (High-Yield Bonds) താത്കാലിക സമ്മർദമായാണ് കാണേണ്ടത്. എഐയുടെ ഭാവി ഇനി നിർണയിക്കുക സാങ്കേതിക മുന്നേറ്റങ്ങൾ മാത്രമല്ല, അതിനായി എടുത്ത ഭീമമായ കടം കൃത്യമായി തിരിച്ചടയ്ക്കാനുള്ള കമ്പനികളുടെ യഥാർഥ വരുമാനശേഷി കൂടിയായിരിക്കും.
A sharp selloff in US technology stocks has renewed concerns about the debt, refinancing risks and financial resilience of companies financing the AI infrastructure boom.
Read DhanamOnline in English
Subscribe to Dhanam Magazine