രണ്ടാം പാദഫലം: ഏത് ബാങ്ക് ഓഹരിയാകും ഇത്തവണ തിളങ്ങാൻ പോകുന്നത്? സാധ്യതകൾ ഇങ്ങനെ

രാജ്യത്തെ മുൻനിര സ്വകാര്യ ബാങ്കുകളുടെ നടപ്പ് സാമ്പത്തിക വർഷത്തിലെ രണ്ടാം പാദ (FY27 Q2) പ്രവർത്തന ഫലങ്ങൾ ഒക്ടോബർ 17 മുതൽ വിപണിയിൽ പ്രഖ്യാപിക്കാനിരിക്കെ, നിക്ഷേപകർക്ക് ഏറ്റവും മികച്ച റിസ്ക്-റിവാർഡ് അനുപാതം നൽകുന്ന ബാങ്ക് ഓഹരികൾ കണ്ടെത്താനുള്ള സൂക്ഷ്മമായ വിലയിരുത്തലിലാണ് നിക്ഷേപകർ.

പ്രമുഖ ആഗോള-ആഭ്യന്തര ബ്രോക്കറേജ് സ്ഥാപനങ്ങളുടെ പ്രിവ്യൂ റിപ്പോർട്ടുകളിൽ നിന്നും മുൻനിര മാർക്കറ്റ് അനലിസ്റ്റുകളുടെ നിഗമനങ്ങളിൽ നിന്നും എച്ച്.ഡി.എഫ്.സി ബാങ്കും (BSE: 500180, NSE: HDFCBANK) ഐ.സി.ഐ.സി.ഐ ബാങ്കും (BSE: 532174, NSE: ICICIBANK) ആണ് മുൻഗണനാ ചോയ്‌സുകളായി മാറുന്നത്.

അതേസമയം ആക്സിസ് ബാങ്കിന് (BSE: 532215, NSE: AXISBANK) മികച്ച വളർച്ചാ സാധ്യതയുണ്ടെങ്കിലും ഉയർന്ന ചാഞ്ചാട്ടവും നേരിടേണ്ടി വന്നേക്കാമെന്നും യെസ് ബാങ്ക് (BSE: 532648, NSE: YESBANK) പ്രതിസന്ധികളിൽ നിന്നും കരകയറാമെന്ന പ്രതീക്ഷയിൽ സ്പെക്യുലേറ്റീവ് ട്രേഡ് എടുക്കാവുന്ന ഉയർന്ന റിസ്ക ഉള്ള ഓഹരിയുമായാണ് വിപണിയിൽ പൊതുവെ വിലയിരുത്തപ്പെടുന്നത്.

പ്രധാന സ്വകാര്യ ബാങ്കുകളിൽ നിന്നുള്ള വിപണി പ്രതീക്ഷകൾ

• എച്ച്.ഡി.എഫ്.സി ബാങ്ക്: മികച്ച വായ്പാ വളർച്ചയും ശക്തമായ നിക്ഷേപ-കാസ (CASA) സമാഹരണവുമാണ് എച്ച്.ഡി.എഫ്.സി ബാങ്കിൽ നിന്ന് വിപണി പ്രധാനമായും പ്രതീക്ഷിക്കുന്നത്. ഇത് അറ്റാദായത്തിൽ ആരോഗ്യകരമായ പുരോഗതി കൊണ്ടുവരുമെന്നാണ് നി​ഗമനം. കരുത്തുറ്റ ബാലൻസ് ഷീറ്റ് വളർച്ച മുൻനിർത്തി പ്രമുഖ ആഗോള ബ്രോക്കറേജായ ജെഫറീസ് 880 രൂപ ലക്ഷ്യവിലയോടെ എച്ച്.ഡി.എഫ്.സി ബാങ്ക് ഓഹരിക്ക് 'ബൈ' (Buy) റേറ്റിംഗ് നിലനിർത്തുന്നു. എങ്കിലും അറ്റ പലിശ മാർജിനിൽ (NIM) ഉണ്ടായേക്കാവുന്ന നേരിയ ക്രമാനുഗത ഇടിവും ഉയർന്ന ഫണ്ടിംഗ് ചെലവുകളിൽ നിലനിൽക്കുന്ന സമ്മർദ്ദവും നിക്ഷേപകർ അതീവ ജാഗ്രതയോടെ നിരീക്ഷിക്കേണ്ട പ്രധാന ഘടകങ്ങളാണെന്നും അനലിസ്റ്റുകൾ സൂചിപ്പിക്കുന്നു. കഴിഞ്ഞ ദിവസം 714 രൂപയിലായിരുന്നു എച്ച്.ഡി.എഫ്.സി ബാങ്ക് ഓഹരിയുടെ ക്ലോസിങ് കുറിച്ചത്.

• ഐ.സി.ഐ.സി.ഐ ബാങ്ക്: കരുത്തുറ്റ നിക്ഷേപ അടിത്തറയും പ്രവർത്തനച്ചെലവ് നിയന്ത്രണവും വഴി വാർഷികാടിസ്ഥാനത്തിൽ 8.5 ശതമാനം വരെ മികച്ച അറ്റാദായ വളർച്ച ഐ.സി.ഐ.സി.ഐ ബാങ്ക് ഇത്തവണ കൈവരിക്കുമെന്ന് പൊതുവേ കരുതപ്പെടുന്നു. ജെഫറീസ് 1,750 രൂപ ലക്ഷ്യവിലയാണ് ഈ പ്രൈവറ്റ് ബാങ്ക് ഓഹരിക്ക് നൽകിയിരിക്കുന്നത്. എന്നാൽ പാദാനുപാദത്തിൽ അറ്റ പലിശ മാർജിനിലുണ്ടാകുന്ന 15 ബേസിസ് (0.15%) പോയിന്റിന്റെ പ്രകടമായ ഇടിവും കുറഞ്ഞ ട്രഷറി വരുമാനവുമാണ് ഐ.സി.ഐ.സി.ഐ ബാങ്ക് രണ്ടാം സാമ്പത്തിക പാദത്തിൽ നേരിടുന്ന പ്രധാന വെല്ലുവിളികൾ.

• ആക്സിസ് ബാങ്ക്: വായ്പാ വിതരണത്തിൽ വാർഷികമായി 23 ശതമാനത്തിന്റെ ആകർഷകമായ വർധന രേഖപ്പെടുത്തുന്നുണ്ടെങ്കിലും, ഉയർന്ന നിക്ഷേപ പലിശച്ചെലവും ഉയർന്നുനിൽക്കുന്ന ക്രെഡിറ്റ് ചെലവുകളും കാരണം ആക്സിസ് ബാങ്കിന്റെ അറ്റാദായത്തിൽ 19 ശതമാനത്തോളം വാർഷിക ഇടിവുണ്ടായേക്കാം എന്നാണ് അനലിസ്റ്റുകളുടെ നി​ഗമനം. എങ്കിലും ദീർഘകാല വാല്യുവേഷൻ തികച്ചും അനുകൂലമാണെന്ന കണക്കുകൂട്ടലിൽ ജെഫറീസ് 1,700 രൂപയുടെ ലക്ഷ്യവിലയോടെ ആക്സിസ് ബാങ്ക് ഓഹരികളിൽ 'ബൈ' റേറ്റിംഗ് നിലനിർത്തിയിരിക്കുന്നു.

• യെസ് ബാങ്ക്: വായ്പകളിൽ 23.8 ശതമാനവും നിക്ഷേപങ്ങളിൽ 19.5 ശതമാനവും ഉയർന്ന വാർഷിക വളർച്ചയോടെ 3.1 ലക്ഷം കോടി രൂപയുടെ ബിസിനസ് നേടിയെങ്കിലും, വിപണിയിലെ 13 പ്രമുഖ അനലിസ്റ്റുകളും 21 രൂപ ശരാശരി ലക്ഷ്യവില നിശ്ചയിച്ച് യെസ് ബാങ്ക് ഓഹരിക്ക് 'സെൽ' (Sell) റേറ്റിംഗാണ് ശുപാർശ ചെയ്തിട്ടുള്ളത്. ബാങ്കിന്റെ സുസ്ഥിരമായ ലാഭക്ഷമതയിലെ അനിശ്ചിതത്വവും ബിസിനസ് എക്സിക്യൂഷനിലെ വെല്ലുവിളികളുമാണ് ഈ ആശങ്കയ്ക്ക് പിന്നിൽ പ്രവർത്തിക്കുന്നത്.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)