റെഗുലേറ്ററി റിസ്കുകളിലും പലിശ നിരക്കിലും തളർന്ന് പ്രമുഖ ഓഹരികൾ; കഴിഞ്ഞ ഒരു മാസത്തിനിടെ നേരിട്ടത് കനത്ത ഇടിവ്

കഴിഞ്ഞ ഒരു മാസത്തിനിടെ ഇന്ത്യൻ ഓഹരി വിപണി വലിയ ചാഞ്ചാട്ടങ്ങൾക്ക് സാക്ഷ്യം വഹിച്ചപ്പോൾ, മുൻനിര ബെഞ്ച്മാർക്ക് സൂചികകളായ സെൻസെക്സും ബി.എസ്.ഇ-500-ഉം (BSE 500) 4.5 ശതമാനം വരെ തിരുത്തൽ രേഖപ്പെടുത്തി. എന്നാൽ ഓഹരികളിലാകട്ടെ സൂചികകളേക്കാളും വലിയ തോതിലുള്ള കനത്ത വില്പന സമ്മർദ്ദമാണ് നേരിടേണ്ടിവന്നത്. ബി.എസ്.ഇ 500 സൂചികയിലെ 83 ഓഹരികൾ 10 ശതമാനത്തിലധികം ഇടിവ് രേഖപ്പെടുത്തിയപ്പോൾ, ചില പ്രമുഖ കമ്പനികളുടെ ഓഹരികളിലെ നഷ്ടം 15 മുതൽ 40 ശതമാനത്തിനും മുകളിലേക്ക് നീണ്ടു.

പോളിസിബസാറിന് കനത്ത തിരിച്ചടി; നഷ്ടം 44% വരെ

ഓഹരി വിലയിടിവിൽ ഏറ്റവും കനത്ത പ്രഹരം നേരിട്ടത്, പോളിസിബസാറിന്റെ മാതൃസ്ഥാപനമായ പി.ബി ഫിൻടെക് (BSE: 543390, NSE: POLICYBZR) ആണ്. ഇൻഷുറൻസ് ഏജന്റുമാരുടെയും വിതരണക്കാരുടെയും കമ്മീഷനുകൾ കുത്തനെ വെട്ടിക്കുറയ്ക്കാനും മാനേജ്‌മെന്റ് ചെലവുകൾക്ക് കർശന പരിധി ഏർപ്പെടുത്താനും ഇൻഷുറൻസ് റെഗുലേറ്ററായ ഐ.ആർ.ഡി.എ.ഐ (IRDAI) കൺസൾട്ടേഷൻ പേപ്പർ പുറത്തിറക്കിയതാണ് പിബി ഫിൻടെക്കിന് കനത്ത തിരിച്ചടിയായത്.

മുൻപ് 1,700–1,850 രൂപയുടെ ഉയർന്ന നിലവാരത്തിൽ നിന്നിരുന്ന പിബി ഫിൻടെക്കിന്റെ ഓഹരി വില ഇപ്പോൾ 1,030–1,035 രൂപ നിലവാരത്തിലേക്ക് കൂപ്പുകുത്തി. ഇടിവ് 44 ശതമാനം. റെഗുലേറ്ററി അനിശ്ചിതത്വങ്ങൾ വരുമാന മാർജിനുകളെ സാരമായി ബാധിക്കുമെന്ന ഭയത്തിൽ പ്രമുഖ ബ്രോക്കറേജുകളെല്ലാം പിബി ഫിൻടെക് ഓഹരിയുടെ ലക്ഷ്യവില കുത്തനെ വെട്ടിച്ചുരുക്കി.

ഇതിന് പിന്നാലെ ധനകാര്യ സ്ഥാപനമായ ഐ.എഫ്.സി.ഐ (IFCI) ഓഹരികൾ 101 രൂപയിൽ നിന്നും 60 രൂപയിലേക്ക് താഴ്ന്ന് 35 ശതമാനത്തോളവും, പൊതുമേഖലാ ജനറൽ ഇൻഷുറൻസ് കമ്പനിയായ ന്യൂ ഇന്ത്യ അഷ്വറൻസ് 230 രൂപയിൽ നിന്ന് 160–161 രൂപ പരിധിയിലേക്ക് ഇടിഞ്ഞ് 30 ശതമാനത്തോളവും നഷ്ടം രേഖപ്പെടുത്തി. മുൻപ് വലിയ കുതിപ്പ് നടത്തിയ ഈ രണ്ട് ഓഹരികളിലും വിപണിയിലെ പൊതുവായ തകർച്ചയ്ക്കിടയിൽ കനത്ത ലാഭമെടുപ്പാണ് അരങ്ങേറിയത്.

റിയൽറ്റിയും ടെക്നോളജിയും സമ്മർദ്ദത്തിൽ

പലിശ നിരക്കുകൾ ഉയർന്നേക്കുമെന്ന സൂചനകളും ഭവന വിപണിയിലെ ഡിമാൻഡ് മന്ദഗതിയിലാകുമെന്ന ആശങ്കയും റിയൽ എസ്റ്റേറ്റ് ഡെവലപ്പർമാരുടെ ഓഹരികളെ വലിയ തോതിൽ തളർത്തി.

ആദിത്യ ബിർള റിയൽ എസ്റ്റേറ്റ് 1,370 രൂപയിൽ നിന്ന് 1,080 രൂപയിലേക്ക് (21–22% ഇടിവ്) താഴ്ന്നു.

ഗോദ്‌റേജ് പ്രോപ്പർട്ടീസ് ഓഹരികൾ 19 ശതമാനം വരെ ഇടിഞ്ഞ് 1,580 രൂപ നിലവാരത്തിലേക്കും, ബ്രിഗേഡ് എന്റർപ്രൈസസ് 19 ശതമാനം വരെ കുറഞ്ഞ് 554 രൂപ നിലവാരത്തിലേക്കും വീണു.

ടെലികോം ഉപകരണ നിർമ്മാണ മേഖലയിൽ പ്രവർത്തിക്കുന്ന തേജസ് നെറ്റ്‌‍വർക്ക്സ് 590–614 രൂപ നിലവാരത്തിൽ നിന്ന് 476 രൂപയിലേക്ക് (20–22% ഇടിവ്) താഴ്ന്നപ്പോൾ, സിമന്റ് മേഖലയിൽ നിന്നുള്ള ഇന്ത്യ സിമന്റ്സ് ഓഹരികൾ 17 ശതമാനം വരെ നഷ്ടം നേരിട്ട് 303 രൂപയിൽ ഇന്ന് ക്ലോസിങം രേഖപ്പെടുത്തി.

വിപണി നൽകുന്ന പാഠങ്ങൾ?

പ്രധാന ഓഹരി സൂചികകളിൽ വലിയ തകർച്ച കാണാനില്ലെങ്കിലും, ഉയർന്ന മൂല്യമതിപ്പിലുള്ള (Premium Valuations) ഗ്രോത്ത് ഓഹരികളും, റെഗുലേറ്ററി പ്രശ്നങ്ങൾ നേരിടുന്ന ഫിൻടെക്-ഇൻഷുറൻസ് വിഭാഗങ്ങളും, പലിശ നിരക്കുകളോട് വേഗത്തിൽ പ്രതികരിക്കുന്ന റിയൽറ്റിയുമാണ് വിപണിയിൽ ഏറ്റവുമധികം ശിക്ഷിക്കപ്പെട്ടത്. ബി.എസ്.ഇ-500 സൂചികയിലെ ആറിലൊരു ഓഹരി വീതം 10 ശതമാനത്തിലധികം ഇടിഞ്ഞത് വിപണിയിലെ ഈ തിരഞ്ഞെടുക്കപ്പെട്ട തിരുത്തലിന്റെ (Selective correction) ആഴം വ്യക്തമാക്കുന്നു.

ഇൻഷുറൻസ് കമ്മീഷൻ വിഷയത്തിൽ ഐ.ആർ.ഡി.എ.ഐയുടെ ഭാഗത്തുനിന്നുണ്ടാകുന്ന അന്തിമ വ്യക്തതയും പലിശ നിരക്കുകളിലെ തുടർ ചലനങ്ങളുമാണ് വിപണി ഇനി പ്രധാനമായും ഉറ്റുനോക്കുന്നത്. വലിയ തോതിൽ തകർച്ച നേരിട്ട ഈ ഓഹരികളിൽ അമിതമായ റിസ്ക് ഒഴിവാക്കിക്കൊണ്ട് മികച്ച മൂല്യനിർണയ അവസരങ്ങൾ കണ്ടെത്താനാകുമോ എന്നാണ് നിക്ഷേപകർ കാത്തിരിക്കുന്നത്.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)