ഇടക്കാലത്ത് സ്മോള് ക്യാപ് മ്യൂച്വല് ഫണ്ടുകള് മികച്ച വരുമാനമാണ് നല്കിയത്. അതുകൊണ്ടു തന്നെ പല നിക്ഷേപകരും തങ്ങളുടെ പോര്ട്ട്ഫോളിയോയില് സ്മോള് ക്യാപ് വിഹിതം കൂട്ടാന് ആലോചിക്കുന്നു. പക്ഷേ ഒരു കാര്യം മറക്കരുത് - സ്മോള് ക്യാപ് ഫണ്ടുകള് വലിയ വളര്ച്ച സാധ്യത നല്കുന്നുവെങ്കിലും, അത്ര തന്നെ വലിയ ഇടിവിനും വിധേയമാണ്. അതുകൊണ്ട് നിക്ഷേപം കൂട്ടുന്നതിന് മുമ്പ് ഈ കാര്യങ്ങള് പരിശോധിക്കുക.
സ്മോള് ക്യാപ് ഫണ്ടുകള് വിപണി ഇടിവിനിടയില് എത്രത്തോളം താഴേക്ക് പോകാം എന്ന് മനസ്സിലാക്കാന് അസറ്റ് മാനേജ്മെന്റ് കമ്പനികള് (AMC) പുറത്തുവിടുന്ന സ്ട്രെസ് ടെസ്റ്റ് (stress test) റിപ്പോര്ട്ടുകള് സഹായിക്കുന്നു. വിപണി കുത്തനെ ഇടിയുന്ന സാഹചര്യത്തില് നിങ്ങളുടെ ഫണ്ട് എത്ര ശതമാനം നഷ്ടമുണ്ടാക്കാന് സാധ്യതയുണ്ടെന്ന് അറിയുന്നത് നിര്ണായകം.
സ്മോള് ക്യാപ് ഓഹരികള് സാധാരണയായി ലാര്ജ് ക്യാപ് ഓഹരികളേക്കാള് കുറവ് ലിക്വിഡിറ്റി (liquidity) ഉള്ളവയാണ്. വിപണി ഇടിയുമ്പോള് ഫണ്ടിന് ഓഹരികള് വില്ക്കാന് ബുദ്ധിമുട്ടുണ്ടെങ്കില് വില കൂടുതല് താഴേക്ക് പോകാം. അതുകൊണ്ട് ഫണ്ടിന്റെ പോര്ട്ട്ഫോളിയോയില് ഉള്ള ഓഹരികളുടെ ലിക്വിഡിറ്റി ശ്രദ്ധിക്കുക.
സ്മോള് ക്യാപ് വിഭാഗത്തില് അടുത്തിടെ മികച്ച മുന്നേറ്റം കണ്ടിട്ടുണ്ടെങ്കില്, പല ഓഹരികളും ഉയര്ന്ന വിലയിലാണ് വ്യാപാരം ചെയ്യുന്നത്. കഴിഞ്ഞ വര്ഷം 40% പ്രതിഫലം കൊടുത്തു എന്ന ഒറ്റക്കാരണത്താല് നിക്ഷേപം കൂട്ടുന്നത് അപകടകരമായ തീരുമാനമാകാം. വിലമതിപ്പ് (valuation) ഉയര്ന്നിരിക്കുമ്പോള് തിരുത്തല് (correction) സാധ്യതയും കൂടുതലായിരിക്കും.
സ്മോള് ക്യാപ് നിക്ഷേപം 5 മുതല് 10 വര്ഷം വരെ സഹിഷ്ണുതയോടെ തുടരാന് കഴിയുന്നവര്ക്ക് കൂടുതല് അനുയോജ്യമാണ്. 2-3 വര്ഷത്തിനകം പണം ആവശ്യമായവര് സ്മോള് ക്യാപ് വിഹിതം കൂട്ടുന്നത് അപകടകരമായേക്കാം.
നിക്ഷേപം നിങ്ങളുടെ റിസ്ക് സഹിഷ്ണുതയെ ആശ്രയിച്ചിരിക്കണം. വലിയ ചാഞ്ചാട്ടം താല്പര്യപ്പെടാത്ത കണ്സര്വേറ്റീവ് നിക്ഷേപകരുടെ കാര്യത്തില് പരമാവധി 10 ശതമാനം മതി. അല്പസ്വല്പമൊക്കെ റിസ്കിന് തയാറെങ്കില് 30 ശതമാനം വരെ. ഏതു റിസ്കിനും തയാറാണെങ്കില് 40 ശതമാനമാകാം. ഇത് കുറഞ്ഞത് അഞ്ച് വര്ഷത്തേക്ക് കൈവിടാതെ തുടരാന് കഴിയുന്ന വിഹിതമായിരിക്കണം.
സ്മോള് ക്യാപ് ഫണ്ടുകള് ദീര്ഘകാല സമ്പത്ത് സൃഷ്ടിക്കാന് കഴിവുള്ളവയാണ്. പക്ഷേ ശരിയായ പ്ലാന് ഇല്ലാതെ നിക്ഷേപം കൂട്ടുന്നത് പോര്ട്ട്ഫോളിയോയില് അനാവശ്യമായ ചാഞ്ചാട്ടം ഉണ്ടാക്കും. നിങ്ങളുടെ റിസ്ക് പ്രൊഫൈല്, സമയപരിധി, വിപണി അവസ്ഥ - ഈ മൂന്ന് കാര്യങ്ങളും വിലയിരുത്തിയശേഷം മാത്രം സ്മോള് ക്യാപ് വിഹിതം കൂട്ടുക. എസ്.ഐ.പി പോലുള്ള രീതിയില് നിക്ഷേപം പടിപടിയായി വര്ധിപ്പിക്കുന്നത് ഒറ്റത്തവണ നിക്ഷേപത്തേക്കാള് സുരക്ഷിതം.
Read DhanamOnline in English
Subscribe to Dhanam Magazine