പ്രതീകാത്മക ചിത്രം Image courtesy: Canva
Markets

ചെമ്പ് വില കുത്തനെ ഇടിഞ്ഞപ്പോൾ എ.സി കമ്പനികൾക്ക് ചിരി, വയർ കമ്പനികൾക്ക് കരച്ചിൽ; അതെന്താണ് അങ്ങനെ?

ചെമ്പ് വിലയിടിവ് എസി, റഫ്രിജറേറ്റർ നിർമാതാക്കളുടെ ഉൽപാദനച്ചെലവ് കുറയ്ക്കുമെന്ന പ്രതീക്ഷയുണ്ട്; എന്നാൽ ഉയർന്ന വിലയ്ക്ക് ചെമ്പ് വാങ്ങിയ വയർ, കേബിൾ കമ്പനികൾക്ക് ഇൻവെന്ററി മൂല്യത്തിലും വിൽപനവിലയിലും സമ്മർദമുണ്ടാകാം

Dhanam News Desk

ചെമ്പ് (Copper) വിലയിൽ നേരിടുന്ന ഇടിവ്, ഓഹരി വിപണിയിൽ ഒരേ സെക്ടറിലെ കമ്പനികൾക്കുപോലും വ്യത്യസ്തമായ പ്രതിഫലനങ്ങളാണ് സൃഷ്ടിക്കുന്നത്. എയർ കണ്ടീഷണർ, റഫ്രിജറേറ്റർ തുടങ്ങിയ കൺസ്യൂമർ ഡ്യൂറബിൾ ഉൽപന്നങ്ങളുടെ നിർമാതാക്കൾക്ക് അസംസ്കൃത വസ്തുക്കളുടെ ചെലവ് കുറയുമെന്ന പ്രതീക്ഷയിൽ ലാഭമാർജിൻ മെച്ചപ്പെടാൻ വഴിയൊരുങ്ങുന്നു. എന്നാൽ, ചെമ്പ് പ്രധാന അസംസ്കൃത വസ്തുവായി ഉപയോഗിക്കുന്ന വയർ, കേബിൾ നിർമാതാക്കൾക്ക് ഈ വിലയിടിവ് തിരിച്ചടിയാകാം.

നേരത്തെ ഉയർന്ന വിലയ്ക്ക് വാങ്ങിയ സ്റ്റോക്കുകളിലെ മൂല്യം ഇടിയുന്നതും (inventory write-down) വിൽപന വിലയിലെ കുറവുമാണ് കേബിൾ കമ്പനികൾ നേരിടുന്ന പ്രധാന വെല്ലുവിളി. ഇന്ന് (നവംബർ 19) കൺസ്യൂമർ ഡ്യൂറബിൾ ഓഹരികളിലുണ്ടായ മുന്നേറ്റം ഈ വിപണി യാഥാർഥ്യത്തിന് അടിവരയിടുന്നു.

കൺസ്യൂമർ ഡ്യൂറബിൾ ഓഹരികൾക്ക് ഉണർവ്

ലണ്ടൻ മെറ്റൽ എക്സ്ചേഞ്ചിൽ (LME) ചെമ്പ് വില 4.6 ശതമാനം ഇടിഞ്ഞ് ടണ്ണിന് 12,471 ഡോളറിലെത്തി. ഏഴു മാസത്തിനിടയിലെ ഏറ്റവും താഴ്ന്ന നിരക്കാണിത്. തുടർച്ചയായ അഞ്ചു സെഷനുകളിലെ ഇടിവോടെ, ഈ വർഷം ഇതുവരെ നേടിയ നേട്ടവും ചെമ്പിന് നഷ്ടമായി. ഈ മാസം ഇതുവരെയായി വിലയിൽ നേരിട്ട ഇടിവ് 13 ശതമാനമാണ്.

ചെമ്പ് വിലയിലെ ഈ ഇടിവിന് പിന്നാലെ കൺസ്യൂമർ ഡ്യൂറബിൾ ഓഹരികളിൽ ശക്തമായ നിക്ഷേപക താത്പര്യം പ്രകടമായി. വോൾട്ടാസ് 9 ശതമാനത്തിലധികം ഉയർന്നു. ബ്ലൂ സ്റ്റാർ 8 ശതമാനത്തിലധികവും ക്രോംപ്ടൺ ഗ്രീവ്സും ഹാവൽസ് ഇന്ത്യയും 5 ശതമാനത്തിലധികം നേട്ടമുണ്ടാക്കി. എൽജി ഇലക്ട്രോണിക്സ് ഇന്ത്യ 2 ശതമാനം ഉയർന്നു. നിഫ്റ്റി കൺസ്യൂമർ ഡ്യൂറബിൾസ് സൂചികയിലെ 14 ഓഹരികളിൽ 13 എണ്ണവും നേട്ടത്തിലായിരുന്നു.

ചെമ്പ് വില കുറയുമ്പോൾ മാർജിൻ കൂടുമോ?

എസി കംപ്രസറുകൾ, കണ്ടൻസർ കോയിലുകൾ, വയറിങ്, മറ്റ് ഘടകങ്ങൾ എന്നിവയുടെ നിർമാണത്തിൽ ചെമ്പിന് നിർണായക സ്ഥാനമുണ്ട്. അതിനാൽ വിലയിടിവ് ഉൽപാദനച്ചെലവ് കുറയ്ക്കാനും മൊത്ത ലാഭമാർജിൻ (Gross Margin) മെച്ചപ്പെടുത്താനും സഹായിക്കുമെന്നാണ് വിപണിയുടെ കണക്കുകൂട്ടൽ. ചെമ്പിന്റെ ഉപയോഗം കൂടുതലുള്ള എസി, കൂളിങ് ഉൽപന്ന നിർമാതാക്കൾക്കാണ് ഇതിന്റെ ഗുണം കൂടുതൽ ലഭിക്കാൻ സാധ്യത.

വയർ–കേബിൾ കമ്പനികൾക്ക് വ്യത്യസ്ത ചിത്രം

എന്നാൽ ചെമ്പ് വിലയിടിവ് എല്ലാ കമ്പനികൾക്കും ഒരുപോലെ ഗുണകരമല്ല. വയർ, കേബിൾ നിർമാതാക്കൾക്ക് ചെമ്പ് വെറുമൊരു അസംസ്കൃത വസ്തു മാത്രമല്ല, ഉൽപന്നത്തിന്റെ വില നിർണയിക്കുന്ന പ്രധാന ഘടകം കൂടിയാണ്. ചെമ്പ് വില താഴുമ്പോൾ പഴയ ഉയർന്ന വിലയ്ക്ക് വാങ്ങിയ സ്റ്റോക്കിന്റെ മൂല്യം കുറയാനും വിൽപ്പനവില താഴാനും സാധ്യതയുണ്ട്. അതിനാൽ സ്റ്റോക്ക് കൈവശമുള്ളതിന്റെ അളവ്, വാങ്ങൽവില, വിലമാറ്റം ഉപഭോക്താക്കളിലേക്ക് കൈമാറുന്ന രീതി എന്നിവ നിർണായകമാകും.

യു.എസ് ഡോളറിന്റെ ശക്തി, ചൈനയിലെ വ്യാവസായിക ആവശ്യകതയെക്കുറിച്ചുള്ള ആശങ്ക, എഐ ഓഹരികളിലെ വിൽപ്പന സമ്മർദം എന്നിവയാണ് ചെമ്പ് വിലയെ പിന്നിലേക്കുവലിച്ചത്. അതായത്, ഒരേ വിലയിടിവ് കൺസ്യൂമർ ഡ്യൂറബിൾ നിർമാതാക്കൾക്ക് ചെലവുകുറവിന്റെ പ്രതീക്ഷ നൽകുമ്പോൾ വയർ–കേബിൾ കമ്പനികൾക്ക് ഇൻവെന്ററി, വിലനിർണയ വെല്ലുവിളികളാണ് ഉയർത്തുന്നത്. ഈ വ്യത്യാസമാണ് ചെമ്പ് വിലയിൽ നേരിടുന്ന ഇടിവിനിടയിലും ഓഹരി വിപണിയിലെ വിജയികളെയും തിരിച്ചടി നേരിടുന്നവരെയും വേർതിരിക്കുന്നത്.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)

Falling copper prices could improve margins for consumer durables manufacturers but may put pressure on wire and cable companies through inventory valuation and selling prices.

Read DhanamOnline in English

Subscribe to Dhanam Magazine

SCROLL FOR NEXT