സ്വർണ വിലയിൽ വൻ കുതിപ്പ്; മുത്തൂറ്റ്, മണപ്പുറം ഓഹരികൾ 6% വരെ നേട്ടത്തിൽ

രാജ്യാന്തര വിപണിയിൽ സ്വർണവില മൂന്ന് മാസത്തെ ഉയർന്ന നിലവാരത്തിലെത്തിയതോടെ രാജ്യത്തെ പ്രമുഖ ഗോൾഡ് ലോൺ എൻ.ബി.എഫ്.സികളുടെ (NBFC) ഓഹരികളിൽ ശക്തമായ നിക്ഷേപക താത്പര്യം പ്രകടമാകുന്നു. തിങ്കളാഴ്ചത്തെ (ഓ​ഗസ്റ്റ് 24) വ്യാപാരത്തിന്റെ ഒരു ഘട്ടത്തിൽ മുത്തൂറ്റ് ഫിനാൻസ് (BSE: 533398, NSE: MUTHOOTFIN), മണപ്പുറം ഫിനാൻസ് (BSE: 531213, NSE: MANAPPURAM), ഐ.ഐ.എഫ്.എൽ ഫിനാൻസ് (BSE: 532636, NSE: IIFL) ഓഹരികൾ 6 ശതമാനം വരെ ഉയർന്നു നേട്ടം കുറിച്ചു.

യു.എസ് ഡോളറിന്റെ മൂല്യത്തിലുണ്ടായ ഇടിവും ബോണ്ട് വിപണിയിൽ ട്രഷറി വകുപ്പിന്റെ ഇടപെടലിനെ തുടർന്ന് യു.എസ് കടക്കെണിയെ കുറിച്ചുള്ള ആശങ്ക ഉയരുന്നതും കാരണം സുരക്ഷിത നിക്ഷേപമെന്ന നിലയിൽ സ്വർണം നിക്ഷേപകരെ ആകർഷിക്കുകയാണ്.

കുതിച്ചുയർന്ന് ഗോൾഡ് ലോൺ ഓഹരികൾ

കമ്മോഡിറ്റി വിപണിയിലെ ഉണർവ് പ്രതിഫലിച്ചതോടെ പ്രമുഖ സ്വർണപ്പണയ ധനകാര്യ സ്ഥാപനങ്ങളുടെ ഓഹരികൾ രാവിലെ തന്നെ നേട്ടത്തിലായി:

• മുത്തൂറ്റ് ഫിനാൻസ്: തുടക്കത്തിൽ തന്നെ 4.4% ഉയർന്ന് 3,153 രൂപ ലെവലിലെത്തി. വ്യാപാരത്തിനിടെ ഒരു ഘട്ടത്തിൽ 3,203 രൂപയിലേക്ക് വരെ എത്തിച്ചേർന്ന് ഇന്നത്തെ ഉയർന്ന നിലവാരം രേഖപ്പെടുത്തി.

• മണപ്പുറം ഫിനാൻസ്: വ്യാപാരത്തിനിടെ 369.90 രൂപ വരെ ഉയർന്ന ഓഹരിവില 2.2 മുതൽ 3.5 ശതമാനം വരെ നേട്ടത്തിലാണ് ഓഹരിയിലെ വ്യാപാരം തുടരുന്നത്.

• ഐ.ഐ.എഫ്.എൽ ഫിനാൻസ്: പ്രാരംഭ വ്യാപാരത്തിൽ ഓഹരിവില 2.2 ശതമാനത്തോളം ഉയർന്നു. തുടർന്ന് 3.2 ശതമാനത്തിലേക്ക് ഉയർന്നു.

സിംഗപ്പൂർ വിപണിയിൽ സ്വർണവില ഔൺസിന് 4,639 ഡോളറിലേക്ക് ഉയർന്നതാണ് ഈ കുതിപ്പിന് തുടക്കമിട്ടത്. മേയ് പകുതിക്ക് ശേഷമുള്ള ഏറ്റവും ഉയർന്ന നിരക്കാണിത്.

ബോണ്ട് ബൈബാക്കും ഡോളറിന്റെ തളർച്ചയും

യു.എസ് ട്രഷറി ഡിപ്പാർട്ട്‌മെന്റ് ദീർഘകാല സർക്കാർ കടപ്പത്രങ്ങൾ തിരികെ വാങ്ങുന്ന നടപടി (Bond Buybacks) അപ്രതീക്ഷിതമായി വർധിപ്പിച്ചതാണ് സ്വർണത്തിന് പുത്തൻ ഊർജ്ജം നൽകിയത്. ട്രഷറി സെക്രട്ടറി സ്കോട്ട് ബെസ്സന്റ് പലിശ ചെലവുകൾ കുറയ്ക്കുന്നതിനായി സാമ്പത്തിക നടപടികൾ ശക്തമാക്കുമെന്ന സൂചന നൽകി.

ഇതേതുടർന്ന് യു.എസ് ഡോളർ സൂചിക ഇടിയുകയും ട്രഷറി ബോണ്ട് യീൽഡുകൾ താഴുകയും ചെയ്തു. ബ്ലൂംബെർഗ് കണക്കുകൾ പ്രകാരം കഴിഞ്ഞ ആഴ്ച മാത്രം 28 ടണ്ണിലധികം സ്വർണമാണ് ഗ്ലോബൽ ഇ.ടി.എഫുകളിലേക്ക് (Gold ETFs) എത്തിയത്. സാങ്കേതികമായി 200-ഡേ മൂവിംഗ് ആവറേജിന് ($4,513) മുകളിൽ എത്തിയതോടെ സ്വർണവില ഉടൻ 4,700 ഡോളർ മറികടന്നേക്കുമെന്നാണ് വിലയിരുത്തൽ.

ധനകാര്യ കമ്പനികൾക്ക് നേട്ടമാകുന്നത് എന്തുകൊണ്ട്?

സ്വർണ്ണവില ഉയരുന്നത് സ്വർണപ്പണയ കമ്പനികളുടെ ആസ്തി മൂല്യം (Collateral Value) വർധിപ്പിക്കും:

• എൽ.ടി.വി റേഷ്യോ മെച്ചപ്പെടും ------► ലോൺ-ടു-വാല്യൂ (LTV) പരിധി ഉയരുന്നതിനാൽ പുതിയ വായ്പകൾ നൽകാൻ കൂടുതൽ അവസരം ലഭിക്കുന്നു.

• ആസ്തി ഭദ്രത ------► വായ്പ തിരിച്ചടവ് മുടങ്ങിയാലും ലേലം വഴി തുക എളുപ്പത്തിൽ ഈടാക്കാം; കമ്പനികളുടെ വായ്പാ നഷ്ടസാധ്യത (Default Risk) കുറയും.

• ലാഭക്ഷമത ------► വായ്പാ വിതരണം വർധിക്കുന്നതോടെ കമ്പിനകളുടെ പലിശ വരുമാനവും ലാഭമാർജിനും (NIM) ഉയരും.

ശ്രദ്ധിക്കേണ്ട ഘടകങ്ങൾ

യു.എസ് ഡോളർ മൂല്യത്തിലും യഥാർത്ഥ പലിശ നിരക്കുകളിലും (Real Yields) ഉണ്ടാകുന്ന പെട്ടെന്നുള്ള ഉണർവ്, സ്വർണത്തിന്റെ മുന്നേറ്റത്തെ തടസ്സപ്പെടുത്തിയേക്കാം. കൂടാതെ വരുംദിവസങ്ങളിൽ പുറത്തുവരാനിരിക്കുന്ന യു.എസ് പണപ്പെരുപ്പ കണക്കുകളും ഫെഡറൽ റിസർവ് സൂചനകളും നിക്ഷേപകർ ഉറ്റുനോക്കുന്നു. രാജ്യാന്തര വിപണിയിൽ സ്വർണം 4,600 ഡോളറിന് മുകളിൽ നിലനിൽക്കുന്നത് വരെ ഈ ഓഹരികളിൽ ട്രെൻഡ് അനുകൂലമായിരിക്കുമെന്നാണ് വിപണി വിദ​ഗ്ധർ സൂചിപ്പിച്ചത്.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)