കിട്ടാക്കടമല്ല; ഉയർന്ന പലിശയ്ക്കുള്ള കടമെടുപ്പാണോ വില്ലൻ? പുതിയ മേധാവി കടിഞ്ഞാൺ ഏറ്റെടുക്കുന്നതോടെ എച്ച്.ഡി.എഫ്.സി ബാങ്ക് ഓഹരികൾ മുന്നേറുമോ?

കഴിഞ്ഞ ആറ് വർഷത്തിനിടെ ഐ.സി.ഐ.സി.ഐ ബാങ്ക് ഓഹരികൾ 220 ശതമാനം നേട്ടം നൽകിയപ്പോൾ, ഇന്ത്യയിലെ മുൻനിര സ്വകാര്യ ബാങ്കായ എച്ച്.ഡി.എഫ്.സി ബാങ്ക് നൽകിയത് കേവലം 17 ശതമാനം റിട്ടേൺ മാത്രമാണ്. 11.03 ലക്ഷം കോടി രൂപ വിപണി മൂല്യമുള്ള ബാങ്കിന്റെ ഓഹരി വില 716 രൂപ നിലവാരത്തിലാണ് ഇപ്പോൾ വ്യാപാരം നടക്കുന്നത്. കിട്ടാക്കടങ്ങളല്ല, മറിച്ച് ബാങ്കിന്റെ ബാധ്യതകളുടെ ഘടനയും (Liabilities mix) പലിശ മാർജിനിലെ ഇടിവുമാണ് ഈ പ്രകടന വ്യത്യാസത്തിന് പ്രധാന കാരണം. എച്ച്.ഡി.എഫ്.സി ബാങ്കിന്റെ പുതിയ സി.ഇ.ഒ ആയി അനുപ് ബാ​ഗ്ചി ചുമതലയേൽക്കുന്ന പശ്ചാത്തലത്തിൽ ഓഹരിയുടെ ഭാവി പ്രകടനത്തിലേക്ക് ഉറ്റുനോക്കുകയാണ് നിക്ഷപലോകം.

പ്രതിസന്ധിയുടെ രണ്ട് ഘട്ടങ്ങൾ

ദീർഘകാലം എച്ച്.ഡി.എഫ്.സി ബാങ്കിനെ നയിച്ച ആദിത്യ പുരി 2020-ൽ വിരമിച്ചതാണ് ഓഹരികളിലെ ആദ്യ ഇടിവിന് വഴിവെച്ചത്. എന്നാൽ 2023 ജൂലൈയിൽ എച്ച്.ഡി.എഫ്.സി ലിമിറ്റഡുമായി (HDFC Ltd) നടന്ന ലയനമാണ് വലിയ വെല്ലുവിളിയായത്. ബാലൻസ് ഷീറ്റ് വികസിച്ചെങ്കിലും ഉയർന്ന ചെലവുള്ള വായ്പകളും ബാധ്യതകളും ബാങ്കിലേക്ക് എത്തിച്ചേർന്നു. തുടർന്ന് 2026 മാർച്ചിൽ പാർട്ട്-ടൈം ചെയർമാൻ അതനു ചക്രവർത്തി രാജിവെച്ചതും നിക്ഷേപകരുടെ ആത്മവിശ്വാസത്തെ താൽക്കാലികമായി ബാധിച്ചു.

വായ്പാ വളർച്ചയും അസറ്റ് ക്വാളിറ്റിയും

• ബാങ്കിന്റെ അസറ്റ് ക്വാളിറ്റി ഇപ്പോഴും ശക്തമായി തുടരുന്നു: 37,000 കോടി രൂപയുടെ ഫ്ലോട്ടിംഗ്, കണ്ടിൻജന്റ് പ്രൊവിഷനുകൾ (floating and contingent provisions) ബാങ്കിന്റെ കൈവശമുണ്ട് (മൊത്തം വായ്പകളുടെ 1.2%).

• 2026 ജൂൺ 30 വരെയുള്ള കണക്കുകൾ പ്രകാരം മൊത്തം വായ്പകൾ 15.4 ശതമാനം വാർഷിക വളർച്ചയോടെ 30.61 ലക്ഷം കോടി രൂപയിലെത്തി. നിക്ഷേപങ്ങൾ 14.7 ശതമാനവും വളർന്നു.

• വിവിധ വിഭാ​ഗം വായ്പകൾ: എസ്.എം.ഇ വായ്പകൾ 18.7 ശതമാനവും കോർപ്പറേറ്റ് വായ്പകൾ 18.6 ശതമാനവും ഉയർന്നപ്പോൾ റീട്ടെയിൽ വായ്പകൾ 7.2 ശതമാനം മാത്രമാണ് വളർന്നത്. കുറഞ്ഞ മാർജിൻ നൽകുന്ന കോർപ്പറേറ്റ് വായ്പകൾ കൂടിയത് ബാങ്കിന്റെ ലാഭക്ഷമതയെ ബാധിച്ചു.

മാർജിനിലെ ചോർച്ച: ഐ.സി.ഐ.സി.ഐ ബാങ്കുമായുള്ള താരതമ്യം

നടപ്പ് സാമ്പത്തിക വർഷത്തിന്റെ ഒന്നാം പാദത്തിൽ (Q1 FY27) എച്ച്.ഡി.എഫ്.സി ബാങ്കിന്റെ നെറ്റ് ഇന്ററസ്റ്റ് മാർജിൻ (NIM) 3.26 ശതമാനമായി ഇടിഞ്ഞു. ലയനത്തിന് മുൻപ് ഇത് 4 ശതമാനത്തിന് മുകളിലായിരുന്നു. എന്നാൽ എതിരാളികളായ ഐ.സി.ഐ.സി.ഐ ബാങ്കിന്റെ മാർജിൻ 4.45 ശതമാനമാണ്.

ഈ വ്യത്യാസത്തിന് രണ്ട് പ്രധാന കാരണങ്ങളുണ്ട്:

1. കുറഞ്ഞ കാസ അനുപാതം: എച്ച്.ഡി.എഫ്.സി ബാങ്കിന്റെ കാസ അനുപാതം (CASA) 32 ശതമാനമായി ചുരുങ്ങിയപ്പോൾ ഐ.സി.ഐ.സി.ഐ ബാങ്കിന്റേത് 38 ശതമാനമാണ്. ഇത് ഫണ്ടിംഗ് ചെലവ് ഉയർത്തുന്നു.

2. ഉയർന്ന കടമെടുപ്പ്: ലയനത്തിന്റെ ബാക്കിപത്രമായി എച്ച്.ഡി.എഫ്.സി ബാങ്കിന്റെ ആകെ ബാധ്യതകളിൽ 11 ശതമാനവും വിപണിയിൽ നിന്നുള്ള വായ്പകളാണ്; ഐ.സി.ഐ.സി.ഐ ബാങ്കിൽ ഇത് 5 ശതമാനം മാത്രമാണ്.

പരിഹാര മാർഗ്ഗങ്ങളും ഭാവി പ്രതീക്ഷകളും

ഉയർന്ന ചെലവുള്ള വിപണി കടമെടുപ്പുകൾക്ക് (Market borrowings) പകരമായി റീട്ടെയിൽ നിക്ഷേപങ്ങൾ വർധിപ്പിക്കുക മാത്രമാണ് എച്ച്.ഡി.എഫ്.സി ബാങ്കിന് മുന്നിലുള്ള പ്രായോഗിക വഴികളിലൊന്ന്. 2026 മാർച്ച് മാസത്തിൽ 95 ശതമാനമായിരുന്ന ക്രെഡിറ്റ്-ഡെപ്പോസിറ്റ് അനുപാതം (CD Ratio) 90 ശതമാനത്തിന് താഴെ എത്തിക്കാനാണ് മാനേജ്‌മെന്റ് ലക്ഷ്യമിടുന്നത്.

നിലവിൽ എച്ച്.ഡി.എഫ്.സി ബാങ്ക് ഓഹരികൾ ദീർഘകാല ശരാശരിയേക്കാൾ താഴ്ന്ന മൂല്യമതിപ്പിലാണ് (Valuation) വ്യാപാരം നടത്തുന്നത്. ഒന്നാം പാദത്തിൽ 1.85 ശതമാനം റിട്ടേൺ ഓൺ അസറ്റും (RoA), 15 ശതമാനം റിട്ടേൺ ഓൺ ഇക്വിറ്റിയും (RoE) നിലനിർത്താൻ ബാങ്കിന് സാധിച്ചിട്ടുണ്ട്. ഒക്ടോബർ 27-ന് അനൂപ് ബാഗ്ചി പുതിയ എം.ഡി & സി.ഇ.ഒ ആയി ചുമതലയേൽക്കാനിരിക്കെ, നിം (NIM) മാർജിനിലെ പുരോഗതിയും റീട്ടെയിൽ വായ്പകളിലെ വളർച്ചയുമാകും എച്ച്.ഡി.എഫ്.സി ബാങ്ക് ഓഹരിയുടെ ഭാവി ഗതി നിർണയിക്കുക എന്നാണ് അനലി​സ്റ്റുകൾ സൂചിപ്പിച്ചത്.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)