ഇന്ത്യൻ ഐടി ഓഹരികൾ 2026-ന്റെ ആദ്യ പകുതിയിൽ കനത്ത ഇടിവ് രേഖപ്പെടുത്തിയ സാഹചര്യത്തിൽ, എഐയുടെ വളർച്ച ഭീഷണിയല്ല, മറിച്ച് വലിയ അവസരമെന്ന നിലയിലാണ് മോർഗൻ സ്റ്റാൻലിയുടെ റിധം ദേശായി വിലയിരുത്തുന്നത്. സ്ക്രൂഡ്രൈവറിന് പകരം പവർ ടൂൾ ലഭിക്കുന്നതുപോലെ ചെലവ് കുറയുമ്പോഴും ലഭ്യമാകുന്ന ജോലിയുടെ എണ്ണവും ഉയരും. എഐ ഉപയോഗപ്പെടുത്തിയുള്ള പരിഹാരങ്ങൾ രൂപപ്പെടുത്താൻ ഐടി സേവനദാതാക്കളുടെ പങ്ക് തുടരുമെന്നും ദീർഘകാല നിക്ഷേപ കാഴ്ചപ്പാട് നിർണായകമാണെന്നും അദ്ദേഹം ചൂണ്ടിക്കാട്ടുന്നു.
2026-ന്റെ ആദ്യ പകുതിയിൽ കാഴ്ചവെച്ച തീർത്തും നിറംമങ്ങിയ പ്രകടനത്തോടെ ഐടി ഓഹരികൾ, നിക്ഷേപകർക്ക് വലിയ തോതിലുള്ള ആശങ്കകൾ സമ്മാനിച്ചുകൊണ്ടിരിക്കുന്ന പശ്ചാത്തലത്തിൽ, ആർട്ടിഫിഷ്യൽ ഇന്റലിജൻസിന്റെ (എഐ) വളർച്ച, ഈ മേഖലയ്ക്ക് ഭീഷണിയെന്നതിലുപരി വലിയൊരു അവസരമായി മാറിയേക്കാമെന്ന് മോർഗൻ സ്റ്റാൻലിയുടെ ഇന്ത്യയിലെ ഇക്വിറ്റി സ്ട്രാറ്റജിസ്റ്റ് വിഭാഗം തലവൻ റിധം ദേശായി.
ഈ വർഷം ജൂൺ വരെയുള്ള ആറ് മാസത്തിനിടെ, നിഫ്റ്റി ഐടി സൂചികയിൽ 30.6 ശതമാനം ഇടിവ് രേഖപ്പെടുത്തുകയും കഴിഞ്ഞ അഞ്ച് വർഷത്തെ ഓഹരി വില അടിസ്ഥാനമാക്കിയുള്ള ആദായം അല്ലെങ്കിൽ പ്രൈസ് റിട്ടേൺ (Price Return) വാർഷിക വളർച്ചാ നിരക്ക് (CAGR) നെഗറ്റീവ് 2.05 ശതമാനമായി (-2.05%) താഴുകയും ചെയ്ത സാഹചര്യത്തിൽ, നിക്ഷേപകരുടെ ആശങ്കകളെ അഭിമുഖീകരിച്ചുകൊണ്ടാണ് റിധം ദേശായിയുടെ ഈ വിലയിരുത്തൽ. ‘ദ മണി മൈൻഡ്സെറ്റ്’ പോഡ്കാസ്റ്റിൽ സോണിയ ഷെണായിയുമായി സംസാരിക്കവെയാണ് ഐടി ഓഹരികളുടെ ഭാവിയെ കുറിച്ചുള്ള അദ്ദേഹത്തിന്റെ നിരീക്ഷണങ്ങൾ പങ്കുവെച്ചത്.
ഇന്ത്യൻ ഐടി സേവനമേഖല നിലവിൽ കടുത്ത സമ്മർദ്ദത്തിലാണ്. എഐ സാങ്കേതികവിദ്യ പരമ്പരാഗത തൊഴിൽശേഷിയിൽ അധിഷ്ഠിത ഔട്ട്സോഴ്സിങ് മാതൃകയ്ക്ക് വലിയ വെല്ലുവിളിയാണ് ഉയർത്തുന്നത്. അത്ര ആവശ്യമില്ലാത്ത സാങ്കേതിക ചിലവുകൾ (discretionary technology spending) കമ്പനികൾ ഇപ്പോൾ വെട്ടിക്കുറയ്ക്കുകയാണ്. ഇതിനുപുറമെ, ആഗോള ബഹുരാഷ്ട്ര കമ്പനികൾ ഇന്ത്യയിൽ സ്വന്തമായി സാങ്കേതിക കേന്ദ്രങ്ങൾ (ജി.സി.സി) തുടങ്ങുന്ന പ്രവണതയും കൂടിവരുന്നുണ്ട്.
എഐ സാങ്കേതിക ആവശ്യങ്ങളെയും ചെലവുകളെയും എങ്ങനെ മാറ്റിമറിക്കുമെന്ന് കമ്പനികൾ വിലയിരുത്തുന്ന ഈ പരിവർത്തന ഘട്ടത്തിൽ, ഐടി മേഖല കുറച്ചുകാലം കൂടി ദുർബലമായി തുടരാൻ സാധ്യതയുണ്ടെന്ന് റിധം ദേശായി സമ്മതിക്കുന്നുണ്ട്. എന്നാൽ ഇതിന്റെ ദീർഘകാല പ്രതിഫലം തികച്ചും വ്യത്യസ്തമായിരിക്കുമെന്നാണ് അദ്ദേഹത്തിന്റെ പക്ഷം.
തന്റെ വാദം വിശദീകരിക്കാൻ റിധം ദേശായി വളരെ ലളിതമായൊരു ഉദാഹരണമാണ് ഉപയോഗിക്കുന്നത്. ഒരു ചുവരിൽ സ്ക്രൂ ഘടിപ്പിക്കാൻ സ്ക്രൂഡ്രൈവറിന് പകരം വളരെ വേഗത്തിൽ ജോലി ചെയ്യാൻ കഴിയുന്ന ഒരു 'പവർ ടൂൾ' ലഭിക്കുന്നത് പോലെയാണ് ഐടി മേഖലയിലെ എഐയുടെ കടന്നുവരവെന്ന് അദ്ദേഹം വിവക്ഷിക്കുന്നു.
ചെലവ് കുറയുന്നു: എഐ മനുഷ്യരെക്കാൾ വേഗത്തിലും കുറഞ്ഞ ചെലവിലും കോഡ് സൃഷ്ടിക്കുമ്പോൾ, ഒരു പ്രോജക്ട് പൂർത്തിയാക്കാൻ ആവശ്യമായ ജീവനക്കാരുടെ എണ്ണം കുറയാം. ഇത് ഉപഭോക്താക്കളിൽ നിന്ന് ഈടാക്കുന്ന നിരക്കിലും ഇടിവുണ്ടാക്കാം.
വോളിയം വർധിക്കുന്നു: മുൻപ് ക്ലൗഡ് കമ്പ്യൂട്ടിങ് രംഗത്തുണ്ടായ മാറ്റത്തിന് സമാനമായി, സാങ്കേതികവിദ്യയുടെ ചെലവ് കുറയുമ്പോൾ ഉപഭോക്താക്കൾ അത് കൂടുതൽ വലിയ തോതിൽ ഉപയോഗിക്കാൻ തുടങ്ങും.
അവസരങ്ങൾ വർധിക്കാം: ഓരോ ജോലിയിലും ലഭിക്കുന്ന വരുമാനം കുറയാമെങ്കിലും ലഭ്യമായ ജോലികളുടെ ആകെ അളവ് ഗണ്യമായി വർധിക്കുമെന്ന് റിധം ദേശായി ചൂണ്ടിക്കാട്ടുന്നു. ഒരു പവർ ടൂൾ ലഭിച്ചതുകൊണ്ട് മരപ്പണിക്കാരന്റെ ആവശ്യം ഇല്ലാതാകുന്നില്ല. അതുപോലെ, ബിസിനസ് പ്രശ്നങ്ങൾ മനസ്സിലാക്കാനും എഐയെ പ്രായോഗിക പരിഹാരങ്ങളാക്കി മാറ്റാനും ഐടി സേവനദാതാക്കളുടെ സഹായം കമ്പനികൾക്ക് തുടർന്നും ആവശ്യമായി വരുമെന്നും അദ്ദേഹം വ്യക്തമാക്കി.
ഇക്വിറ്റി (ഓഹരി) നിക്ഷേപങ്ങളിൽ നിന്നും സ്ഥിരനിക്ഷേപങ്ങളുടേതുപോലെ സ്ഥിരതയാർന്ന ആദായം (റിട്ടേൺ) പ്രതീക്ഷിക്കരുതെന്ന് റിധം ദേശായി ഓർമ്മിപ്പിക്കുന്നു. വിപണി രണ്ടോ മൂന്നോ വർഷം കാര്യമായ മാറ്റമില്ലാതെ തുടർന്നേക്കാം. തുടർന്ന് വളരെ ചുരുങ്ങിയ കാലയളവിൽ ദീർഘകാല റിട്ടേണിന്റെ വലിയൊരു ഭാഗം സമ്മാനിച്ചേക്കാം. അതുകൊണ്ടുതന്നെ, ഒന്നോ രണ്ടോ വർഷത്തെ റിട്ടേൺ മാത്രം അടിസ്ഥാനമാക്കി ഒരു ഇക്വിറ്റി നിക്ഷേപത്തെ വിലയിരുത്തുന്നത് ശരിയല്ലെന്നും അദ്ദേഹം പറഞ്ഞു.
അതേസമയം ഐടി സെക്ടറിൽ നടക്കുന്ന ഈ നിർണായക മാറ്റം വേദനരഹിതമായിരിക്കില്ലെങ്കിലും പുതിയതായി ഉരുത്തിരിയുന്ന എഐ ഡിമാൻഡ് പരമ്പരാഗത ബിസിനസ്സ് രീതികൾ നേരിടുന്ന സമ്മർദ്ദങ്ങളെ മറികടക്കാൻ പര്യാപ്തമാണോ എന്നതാണ് ഇനി ഉറ്റുനോക്കുന്നത്. മുൻകാലങ്ങളിലും പലതവണ സ്വയം നവീകരിച്ചിട്ടുള്ള ഇന്ത്യൻ ഐടി വ്യവസായം, ഈ വലിയ പരിവർത്തനഘട്ടത്തെയും വിജയകരമായി അതിജീവിക്കുമെന്നാണ് വിപണി വിദഗ്ധരുടെ പ്രതീക്ഷ.
(Disclaimer: പഠനാവശ്യം മുന്നിര്ത്തി പങ്കുവെക്കുന്ന ഈ വിവരങ്ങള് നിക്ഷേപ തീരുമാനങ്ങള്ക്കുള്ള ശുപാര്ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്ക്ക് വിധേയമായതിനാല് നിക്ഷേപത്തിന് മുമ്പ് സ്വന്തം നിലയില് കമ്പനിയെ കുറിച്ച് കൂടുതല് പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)
Read DhanamOnline in English
Subscribe to Dhanam Magazine