ഇന്ന് ലിസ്റ്റ് ചെയ്ത പുതിയ 3 ഐ.പി.ഒകളും നിക്ഷേപകർക്ക് വൻ നേട്ടം സമ്മാനിച്ചു. ഡിസ്കൗണ്ടിൽ ലിസ്റ്റ് ചെയ്ത ഹീറോ മോട്ടോഴ്സ് പിന്നീട് 20% കുതിച്ച് ഓഫർ വിലയെക്കാൾ 17% ഉയർന്ന നിരക്കിൽ ക്ലോസ് ചെയ്തു. ജിൻഡാൽ സുപ്രീം ഇന്ത്യ 30% പ്രീമിയത്തോടെയും എസ്.എസ് റീട്ടെയിൽ 76% വരെ നേട്ടത്തോടെയും ലിസ്റ്റ് ചെയ്തു.
ഓഹരി വിപണിയിൽ തിരിച്ചടിയോടെ തുടക്കം കുറിച്ച ഹീറോ മോട്ടോഴ്സ് (Hero Motors) ആദ്യദിനം തന്നെ ശക്തമായ തിരിച്ചുവരവ് നടത്തി. നാഷണൽ സ്റ്റോക്ക് എക്സ്ചേഞ്ചിൽ (NSE) ഇഷ്യൂ വിലയേക്കാൾ 2.4 ശതമാനം ഡിസ്കൗണ്ടിൽ (ഇഷ്യൂ വിലയേക്കാളും താഴെയായി) ലിസ്റ്റ് ചെയ്ത ഓഹരികൾ, തൊട്ടുപിന്നാലെ 20 ശതമാനം കുതിച്ചുയർന്ന് 98.40 രൂപ എന്ന അപ്പർ സർക്യൂട്ട് പരിധിയിലെത്തി.
ഹീറോ മോട്ടോഴ്സ് ഓഹരിയൊന്നിന് 84 രൂപയായിരുന്നു ഐ.പി.ഒയിലെ ഓഫർ വില. എന്നാൽ എൻ.എസ്.ഇയിൽ 82 രൂപയിലും ബി.എസ്.ഇയിൽ 82.10 രൂപയിലുമാണ് വ്യാപാരം ആരംഭിച്ചത്. എന്നാൽ കുറഞ്ഞ വിലയിൽ ഓഹരികൾ വാങ്ങാൻ നിക്ഷേപകർ താല്പര്യം കാണിച്ചതോടെ വില വേഗത്തിൽ കുതിച്ചുയരുകയായിരുന്നു. ഓഫർ വിലയേക്കാൾ ഏകദേശം 17 ശതമാനം ഉയർന്ന നിരക്കിലാണ് നിലവിൽ ഓഹരിയുടെ ക്ലോസിങ് കുറിച്ചിരിക്കുന്നത്.
1,000 കോടി രൂപയുടെ പ്രാരംഭ പൊതുഓഹരി വിൽപ്പനയ്ക്ക് (IPO) വിപണിയിൽ മികച്ച സ്വീകാര്യതയാണ് ലഭിച്ചിരുന്നത്. മൊത്തത്തിൽ 6.66 ഇരട്ടി അപേക്ഷകളാണ് ലഭിച്ചത്. ഓഹരി വിൽപ്പനയിലൂടെ ലഭിക്കുന്ന തുക കമ്പനിയുടെ കടബാധ്യതകൾ തീർക്കാനും, ഉത്തർപ്രദേശിലെ ഗൗതം ബുദ്ധ നഗറിലുള്ള നിർമ്മാണ ശാലയുടെ ശേഷി വർധിപ്പിക്കാനും ഉപയോഗിക്കുമെന്നാണ് ഹീറോ മോട്ടോഴ്സ് വ്യക്തമാക്കിയിട്ടുള്ളത്.
ഡിസ്കൗണ്ട് ലിസ്റ്റിംഗിന് ശേഷമുള്ള ഹീറോ മോട്ടോഴ്സ് ഓഹരിയുടെ ഈ കുതിപ്പ് വിപണിയിലെ താല്പര്യത്തെയാണ് കാണിക്കുന്നതെങ്കിലും, മികച്ച മുന്നേറ്റം നടത്തുന്നതിനാൽ പുതിയ നിക്ഷേപകർ ജാഗ്രത പാലിക്കണമെന്ന് മാർക്കറ്റ് അനലിസ്റ്റുകൾ നിർദ്ദേശിക്കുന്നു. കമ്പനിയുടെ വരും പാദങ്ങളിലെ സാമ്പത്തിക പ്രകടനം, കടം കുറയ്ക്കാനുള്ള നടപടികൾ എന്നിവ വിലയിരുത്തിയ ശേഷം മാത്രം പുതിയ നിക്ഷേപ തീരുമാനങ്ങൾ എടുക്കുന്നതാകും ഉചിതമെന്നും അനലിസ്റ്റുകൾ സൂചിപ്പിച്ചു.
ബുധനാഴ്ച തന്നെ സ്റ്റോക്ക് എക്സ്ചേഞ്ചുകളിൽ ലിസ്റ്റ് ചെയ്ത മറ്റ് രണ്ട് കമ്പനികളും വൻ നേട്ടത്തോടെയാണ് അരങ്ങേറ്റം കുറിച്ചത്.
ജിൻഡാൽ സുപ്രീം ഇന്ത്യ: 93 രൂപയുടെ ഐ.പി.ഒയിലെ ഇഷ്യൂ വിലയിൽ നിന്ന് 30 ശതമാനത്തോളം നേട്ടത്തോടെ 120 രൂപയിലാണ് ജിൻഡാൽ സുപ്രീം ഇന്ത്യ (Jindal Supreme India Ltd) ഓഹരികൾ എൻ.എസ്.ഇയിൽ ലിസ്റ്റ് ചെയ്തത്. പിന്നീട് ഓഹരിയുടെ വില ഇന്നത്തെ അപ്പർ സർക്യൂട്ട് നിലവാരമായ 126 രൂപ വരെ ഉയർന്നു. 177 ഇരട്ടിയേറെ സബ്സ്ക്രിപ്ഷനാണ് ഈ ഐ.പി.ഒ നേടിയത്.
എസ്.എസ് റീട്ടെയിൽ: 424 രൂപയുടെ ഇഷ്യൂ വിലയിൽ നിന്ന് 47 ശതമാനത്തോളം ഉയർന്ന് 624 രൂപയിലാണ് എസ്.എസ് റീട്ടെയിൽ (SS Retail) ഓഹരികൾ എൻ.എസ്.ഇയിൽ ലിസ്റ്റ് ചെയ്തത്. ബി.എസ്.ഇയിൽ 50.73 ശതമാനമായിരുന്നു പ്രീമിയം. തുടർന്നും മുന്നേറ്റം പ്രകടമാക്കിയ എസ്.എസ് റീട്ടെയിൽ ഓഹരികൾ ഐ.പി.ഒയിലെ ഇഷ്യൂ വിലയേക്കാൾ 76.6 ശതമാനം നേട്ടത്തോടെ 748.8 രൂപയിലാണ് ക്ലോസിങ് കുറിച്ചത്. ഈ ഐ.പി.ഒ 103.3 ഇരട്ടി അപേക്ഷകൾ നേടിയിരുന്നു എന്നതും ശ്രദ്ധേയം.
(Disclaimer: പഠനാവശ്യം മുന്നിര്ത്തി പങ്കുവെക്കുന്ന ഈ വിവരങ്ങള് നിക്ഷേപ തീരുമാനങ്ങള്ക്കുള്ള ശുപാര്ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്ക്ക് വിധേയമായതിനാല് നിക്ഷേപത്തിന് മുമ്പ് സ്വന്തം നിലയില് കമ്പനിയെ കുറിച്ച് കൂടുതല് പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)
Read DhanamOnline in English
Subscribe to Dhanam Magazine