റിലയൻസ് ഓഹരികൾ വാങ്ങണോ അതോ ജിയോ ഐപിഒയിൽ ഭാ​ഗ്യം പരീക്ഷിക്കണോ? പണം എവിടെ മുടക്കണം?

റിലയൻസ് ജിയോയുടെ മെഗാ ഐ.പി.ഒയും കമ്പനിയുടെ മാതൃസ്ഥാപനമായ റിലയൻസ് ഇൻഡസ്ട്രീസ് (BSE: 500325, NSE: RELIANCE) ഓഹരികളും തമ്മിലുള്ള നേട്ട-കോട്ടങ്ങൾ കൃത്യമായി വിലയിരുത്താൻ റീട്ടെയിൽ നിക്ഷേപകർക്ക് മുന്നിൽ ഇപ്പോൾ അപൂർവ്വമായൊരു അവസരമൊരുങ്ങുകയാണ്. ഉയർന്ന പ്രൈസ് ബാൻഡിൽ ജിയോയ്ക്ക് 34 മടങ്ങ് പി.ഇ (P/E) വാല്യുവേഷൻ കണക്കാക്കുമ്പോൾ, റിലയൻസ് ഇൻഡസ്ട്രീസ് ഓഹരികൾ വിപണിയിൽ വ്യാപാരം നടത്തുന്നത് 20 മുതൽ 21 മടങ്ങ് വരെ എന്ന ആകർഷകമായ പി/ഇ നിരക്കിലാണ്.

വിപണിയിൽ നിന്നുള്ള പുതിയ റിപ്പോർട്ടുകൾ പ്രകാരം ഏകദേശം 30,000 മുതൽ 30,200 കോടി രൂപ സമാഹരിക്കാൻ ലക്ഷ്യമിടുന്ന ജിയോ പ്ലാറ്റ്‌ഫോംസ് ഐ.പി.ഒ ഒക്ടോബർ 21 മുതൽ 23 വരെയുള്ള ദിവസങ്ങളിൽ സബ്‌സ്‌ക്രിപ്ഷനായി എത്തുമെന്നും, ഒക്ടോബർ 28-ന് ഓഹരികൾ ലിസ്റ്റ് ചെയ്യപ്പെടുമെന്നുമാണ് സൂചന.

നിലവിൽ റിലയൻസ് ഇൻഡസ്ട്രീസിന് ജിയോ പ്ലാറ്റ്‌ഫോംസിൽ 66 ശതമാനത്തോളം ഭൂരിപക്ഷ ഓഹരി പങ്കാളിത്തമുണ്ട്. അതിനാൽ റിലയൻസ് ഇൻഡസ്ട്രീസ് ഓഹരികൾ സ്വന്തമായി കൈവശം വെച്ചിട്ടുള്ള ഏതൊരു നിക്ഷേപകനും ഇതിനകം തന്നെ ടെലികോം, ഡിജിറ്റൽ ബിസിനസിൽ വലിയ തോതിലുള്ള മൂലധന പങ്കാളിത്തമുണ്ട്. ഉയർന്ന പ്രീമിയത്തിൽ ജിയോയിൽ നേരിട്ട് ഓഹരികൾ സ്വന്തമാക്കുന്നത് എത്രത്തോളം ലാഭകരമാണെന്നതാണ് വിപണി ഇപ്പോൾ പ്രധാനമായും ചർച്ച ചെയ്യുന്നത്.

ഉയർന്ന മാർജിനും പ്രീമിയം വാല്യുവേഷനും

വിപണി വൃത്തങ്ങൾ നൽകുന്ന സൂചനയനുസരിച്ച് 1,065 മുതൽ 1,119 വരെയുള്ള പ്രൈസ് ബാൻഡിൽ ജിയോയുടെ മൊത്തം വിപണി മൂല്യം ഏകദേശം 10.3 ലക്ഷം കോടി രൂപയോളം വരും. ഇത് 2026 സാമ്പത്തിക വർഷത്തെ കമ്പനിയുടെ വരുമാനത്തിന്റെ 34 മടങ്ങും മൊത്തം വാർഷിക വിൽപനയുടെ 7 മടങ്ങുമാണ്.

• പ്രവർത്തന കണക്കുകൾ: 2025-26 സാമ്പത്തിക വർഷത്തിൽ ജിയോ 1.47 ലക്ഷം കോടി രൂപയുടെ പ്രവർത്തന വരുമാനവും, 76,225 കോടി രൂപയുടെ എബിറ്റ്‍ഡയും (EBITDA), 30,049 കോടി രൂപയുടെ അറ്റാദായവും (Net Profit) കൈവരിച്ചു. എബിറ്റ്‍ഡ മാർജിൻ 51.9 ശതമാനമാണ്. കമ്പനിയുടെ വാർഷിക വരുമാനത്തിൽ 14.6 ശതമാനവും എബിറ്റ്‍ഡയിൽ 18.8 ശതമാനവും അറ്റാദായത്തിൽ 15.1 ശതമാനവും ആരോഗ്യകരമായ വളർച്ച രേഖപ്പെടുത്തി.

• ബാലൻസ് ഷീറ്റ് പുരോഗതി: ജിയോയുടെ അറ്റ ഡെറ്റ്-ടു-എബിറ്റ്‍ഡ അനുപാതം (Debt-to-EBITDA ratio) മുൻവർഷത്തെ 0.71-ൽ നിന്ന് 0.36 ആയി വളരെ മികച്ച നിലയിലേക്ക് മെച്ചപ്പെട്ടു. കൂടാതെ, ഐ.പി.ഒ വഴി സമാഹരിക്കുന്ന തുകയിൽ നിന്ന് 27,500 കോടി രൂപ ടെലികോം അനുബന്ധ സ്ഥാപനത്തിന്റെ കടബാധ്യതകൾ തീർക്കാനാണ് പ്രധാനമായും വിനിയോഗിക്കുക.

ഉയർന്ന മാർജിനും ശക്തമായ വളർച്ചയുമുള്ള ഒരു മുൻനിര ബിസിനസിന് ഇത്തരമൊരു പ്രീമിയം വാല്യുവേഷൻ അമിതമല്ലെങ്കിലും, വരുമാന വളർച്ചയുടെ വേഗത സമീപകാലത്ത് കുറയുന്നുവെന്നത് നിക്ഷേപകർ ഗൗരവമായി കാണേണ്ടതുണ്ടെന്ന് സെബി രജിസ്റ്റേഡ് റിസർച്ച് അനലിസ്റ്റ് എം. ശ്രീകുമാരൻ (SEBI Reg. No INH000023959) വ്യക്തമാക്കുന്നു. 2026-27 സാമ്പത്തിക വർഷത്തിന്റെ ഒന്നാം പാദത്തിൽ ജിയോയുടെ അറ്റാദായ വളർച്ച മുൻവർഷത്തെ അപേക്ഷിച്ച് 9 ശതമാനമായി ചുരുങ്ങിയിരുന്നു. 34 മടങ്ങ് ഉയർന്ന വാല്യുവേഷനിൽ നിൽക്കുമ്പോൾ ചെറിയൊരു വീഴ്ച പോലും ഓഹരി വിലയെ ബാധിക്കാം. അതിനാൽ ലിസ്റ്റിംഗ് ദിനത്തിലെ താൽക്കാലിക മുന്നേറ്റം മാത്രം പ്രതീക്ഷിച്ച് ഉയർന്ന വാല്യൂവേഷനിൽ ഈ ഓഹരികൾ വാങ്ങുന്നത് ഒഴിവാക്കണമെന്നും അദ്ദേഹം മുന്നറിയിപ്പ് നൽകുന്നു.

റിലയൻസ്: കുറഞ്ഞ ചിലവിൽ ജിയോയിൽ പങ്കാളിയാകാനുള്ള വഴി

ഒക്ടോബർ 9-ലെ കണക്കുകൾ പ്രകാരം 1,170.30 രൂപ നിലവാരത്തിൽ വ്യാപാരം പൂർത്തിയാക്കിയ റിലയൻസ് ഇൻഡസ്ട്രീസിന്റെ ആകെ വിപണി മൂലധനം 15.8 ലക്ഷം കോടി രൂപയാണ്. കമ്പനി 80,775 കോടി വാർഷിക അറ്റാദായവും 2.08 ലക്ഷം കോടി രൂപയുടെ എബിറ്റ്‍ഡയും നേടി. മൊത്ത വരുമാനത്തിലെ എബിറ്റ്‍ഡ മാർജിൻ 17.7 ശതമാനമാണ്. എന്നാൽ റിലയൻസ് ഓഹരിയുടെ പി.ഇ അനുപാതം 20 മുതൽ 21 മടങ്ങ് മാത്രമാണ്.

ടെലികോമിന് പുറമെ റീട്ടെയിൽ, ഓയിൽ റിഫൈനിംഗ്, പെട്രോകെമിക്കൽസ്, ഓയിൽ & ഗ്യാസ്, ന്യൂ എനർജി എന്നീ വൈവിധ്യമാർന്ന വൻകിട ബിസിനസുകൾ റിലയൻസ് ഇൻഡസ്ട്രീസിന് കീഴിലുണ്ട്. ഈ വൈവിധ്യവൽക്കരണം ടെലികോം മേഖലയിലെ അപകടസാധ്യതകൾക്ക് സുരക്ഷിതത്വം നൽകുന്നുണ്ടെങ്കിലും, ഓയിൽ-ടു-കെമിക്കൽസ് മേഖലയിലെ ആഗോള ചാക്രിക വില വ്യതിയാനങ്ങളും വലിയ മൂലധനച്ചെലവുകളും റിലയൻസിന്റെ ബാധ്യതയാണ്. നടപ്പ് സാമ്പത്തിക വർഷത്തിന്റെ ഒന്നാം പാദത്തിൽ റിലയൻസിന്റെ ലാഭം 22 ശതമാനം ഇടിഞ്ഞത് ഇതിന് ഉദാഹരണമാണ്. എങ്കിലും ആഗോള ഊർജ്ജ വിപണിയിലെ ചാഞ്ചാട്ടങ്ങൾ താങ്ങാൻ കഴിയുന്നവർക്ക് റീട്ടെയിൽ, ജിയോ വളർച്ചകളിൽ ഒരേസമയം പങ്കാളികളാകാൻ ഏറ്റവും കുറഞ്ഞ റിസ്കുള്ള വഴിയാണ് റിലയൻസ് ഓഹരികളെന്ന് റിസർച്ച് അനലിസ്റ്റ് എം. ശ്രീകുമാരൻ പറഞ്ഞു.

നിക്ഷേപകർ തിരഞ്ഞെടുക്കേണ്ട തന്ത്രം

റെഡ് ഹെറിംഗ് പ്രോസ്പെക്ടസിൽ ഉപഭോക്താവിൽ നിന്നുള്ള ശരാശരി വരുമാനം (ARPU), ബ്രോഡ്‌ബാൻഡ് വളർച്ച, എന്റർപ്രൈസ് സേവനങ്ങൾ, ക്യാഷ് ഫ്ലോ, അനുബന്ധ ഇടപാടുകൾ എന്നിവ കൃത്യമായി പരിശോധിച്ച ശേഷമേ ജിയോയുടെ പ്രീമിയം വാല്യൂവേഷൻ പൂർണമായി ന്യായീകരിക്കത്തതാണോ എന്ന് വിലയിരുത്താനാകൂ.

തീരുമാനം നിക്ഷേപകരുടെ സാമ്പത്തിക ലക്ഷ്യങ്ങളെ ആശ്രയിച്ചിരിക്കുന്നു. വാല്യുവേഷൻ റിസ്കുകൾ ഏറ്റെടുക്കാൻ തയ്യാറുള്ള വളർച്ചാ കേന്ദ്രീകൃത നിക്ഷേപകർക്ക് ഉയർന്ന മാർജിനുള്ള ജിയോ നേരിട്ട് തിരഞ്ഞെടുക്കാം. എന്നാൽ ബിസിനസ് വൈവിധ്യവൽക്കരണത്തിനും സ്ഥിരതയ്ക്കും പ്രാധാന്യം നൽകുന്ന ദീർഘകാല നിക്ഷേപകർക്ക് റിലയൻസ് ഇൻഡസ്ട്രീസ് ഓഹരികളാണ് കൂടുതൽ അനുയോജ്യമായ സുരക്ഷിത താവളമെന്നും റിസർച്ച് അനലിസ്റ്റ് എം. ശ്രീകുമാരൻ പറഞ്ഞു.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)