പ്രവർത്തന കാര്യക്ഷമതയിലൂടെ ലാഭ വർധനവ്, ജെ കെ ലക്ഷ്‌മി സിമെന്റ്സ് ഓഹരികൾ വാങ്ങാനുള്ള കാരണങ്ങൾ

ടയർ, പേപ്പർ, സിമെന്റ്, വൈദ്യുതി, പാൽ ഉൽപന്നങ്ങൾ എന്നിവയിൽ ശക്തമായ സാന്നിധ്യമുള്ള ജെ കെ ഗ്രൂപ്പിൽ പെട്ട കമ്പനിയാണ് ജെ കെ ലക്ഷ്‌മി സിമെൻറ്സ് ലിമിറ്റഡ് (JK Lakshmi Cements Ltd). 1982 ൽ അത്യാധുനിക സിമന്റ് പ്ലാന്റുകൾ സ്ഥാപിച്ച് പ്രവർത്തനം ആരംഭിച്ച കമ്പനിക്ക് നിലവിൽ വടക്ക്, കിഴക്ക് , പശ്ചിമ മേഖലകളിൽ ശക്തമായ വിപണി സാന്നിധ്യം നേടാൻ കഴിഞ്ഞിട്ടുണ്ട്. ചുണ്ണാമ്പുകല്ല് അടിസ്ഥാനമാക്കി ക്ലേ സിമന്റ് മെയ് മാസം പുറത്തിറക്കി . ഇത് സിമെന്റ് ഉൽപാദനത്തിൽ ക്ലിങ്കറിന്റെ ഉപയോഗത്തെ 50 % കുറക്കുകയും, കാർബൺ ഉദ്വമനം 40 % കുറക്കുകയും ചെയ്യുന്നതിലൂടെ പരിസ്ഥിതി സൗഹാർദ്ദമായ ഉൽപന്നമാക്കി മാറ്റാൻ കഴിഞ്ഞു.

പെറ്റ് കോക്ക്, ഡീസൽ വില വർധനവ് ഉണ്ടായിട്ടും പ്രവർത്തന കാര്യക്ഷമതയിലൂടെ 2021 -22 നാലാം പാദത്തിൽ പ്രവർത്തന ലാഭവും പലിശയും തമ്മിലുള്ള അനുപാതം 9.78 മടങ്ങായി. വിറ്റ് വരവ് 13 % വർധിച്ച് 1497.64 കോടി രൂപയായി. നികുതിക്ക് മുൻപുള്ള ലാഭവും വർധിച്ച് 197.93 കോടി രൂപ യായി (മുൻ വർഷം 186.53 കോടി. 2021-22 ൽ നികുതിക്ക് ശേഷമുള്ള ലാഭം എക്കാലത്തെയും ഉയർന്ന നിലയിൽ എത്തി -417.56 കോടി രൂപ.

2021-22 ൽ , പലിശയും നികുതി മറ്റും മുൻപുള്ള വരുമാന മാർജിൻ (EBITDA) 20.7 ശതമാനത്തിൽ നിന്ന് 18.4 ശതമാനമായി കുറഞ്ഞു . ഉൽപാദന ചെലവ് കൂടിയതാണ് കാരണം.നിലവിൽ 90 % ഉൽപ്പാദന ശേഷി കൈവരിച്ച സാഹചര്യത്തിൽ ഉൽപ്പാദനം വർധിപ്പിക്കാൻ കഴിയാത്തത് കൊണ്ട് സബ്സിഡിയറി കമ്പനിയായ യു സി ഡബ്ല്യൂ എല്ലിന്റെ ഉൽപാദന ശേഷി 2.5 ദശലക്ഷം ടൺ വർധിപ്പിക്കുകയാണ്.

ഇതിനായി 16.5 ശതകോടി രൂപയുടെ മൂലധന നിക്ഷേപമാണ് നടത്തുന്നത്. ഇതിനായി 70 :30 അനുപാതത്തിൽ വായ്‌പ-ഓഹരിയിലൂടെയാണ് പണം കണ്ടെത്തുന്നത് . ഈ പദ്ധതി 2023-24 ൽ പ്രവർത്തന സജ്ജമാകും.

കേന്ദ്ര സർക്കാരിന്റെ അടിസ്ഥാന സൗകര്യങ്ങൾ, ഭവന നിർമാണ പദ്ധതികൾക്ക് ഊന്നൽ നൽകുന്ന നയവും, കമ്പനിയുടെ പ്രവർത്തന കാര്യക്ഷമതയും, ഉൽപാദന ശേഷി വർധിപ്പിക്കുന്നതും ജെ കെ ലക്ഷ്‌മി സിമെന്റിന്റെ സാമ്പത്തിക നില മെച്ചപ്പെടുത്തും.

നിക്ഷേപകർക്കുള്ള നിർദേശം : വാങ്ങുക (Buy)

ലക്ഷ്യ വില -552 രൂപ

നിലവിൽ 461 രൂപ

(Stock Recommendation by Geojit Financial Services)