Pre-Market Updates Image courtesy: Canva
Markets

ആന്ത്രോപിക് വിജയം കഴിഞ്ഞ് വിപണി തകർച്ച; ഏഷ്യൻ വിപണികൾ ഇടിവിൽ; ഇന്ത്യയിലും എതിർകാറ്റ് വരുമോ? സ്വർണം വീണ്ടും താഴോട്ട്

ഗിഫ്റ്റ് നിഫ്റ്റി സൂചിക ഇന്നു രാവിലെ 25,333 വരെ താഴ്ന്നു; ഇന്ത്യൻ വിപണി ഇന്നു ഗണ്യമായ നഷ്ടത്തോടെ വ്യാപാരം തുടങ്ങും എന്നാണ് സൂചന

T C Mathew

എഐ ഗവേഷണത്തിലെ മുൻനിര സ്ഥാപനം ആന്ത്രോപിക്കിൻ്റെ ഐപിഒ വൻവിജയമായി. പക്ഷേ എഐ കമ്പനികൾ അടക്കം വിപണി തകർന്നു. യു.എസ് വിപണിയുടെ മൂന്നു പ്രധാന സൂചികകളും രണ്ടു ശതമാനത്തിലധികം നഷ്‌ടത്തിലായി. ഇന്ന് (നവംബർ 20) ഏഷ്യൻ വിപണികൾ അഞ്ചു ശതമാനത്തോളം തകർച്ചയിലായി. വിദേശത്തെ പ്രതികൂല കാറ്റ് ഇന്ന് ഇന്ത്യയിലും ബാധിച്ചേക്കും.

അതേസമയം സ്വർണം ഇടിവ് തുടരുകയാണ്. ഔൺസിന് 3550 ഡോളർ വരെ വില താഴ്ന്നു. ക്രൂഡ് ഓയിൽ വില കാര്യമായ മാറ്റമില്ലാതെ നിൽക്കുന്നു.

ഗിഫ്റ്റ് സിറ്റിയിലെ ഡെറിവേറ്റീവ് വ്യാപാരത്തിൽ ഗിഫ്റ്റ് നിഫ്റ്റി വ്യാഴാഴ്ച രാത്രി 25,482.50ൽ ക്ലോസ് ചെയ്തു. ഇന്നു രാവിലെ 25,333 വരെ താഴ്ന്നു. ഇന്ത്യൻ വിപണി ഇന്നു ഗണ്യമായ നഷ്ടത്തോടെ വ്യാപാരം തുടങ്ങും എന്നാണ് സൂചന.

ആന്ത്രോപിക്കിന് ഐതിഹാസിക ഐപിഒ വിജയം

എഐ മേഖലയുടെ തിളക്കമാർന്ന മുന്നേറ്റം കാണിച്ചുകൊണ്ട് ആന്ത്രോപിക് ഐപിഒ ഇന്നലെ ലിസ്റ്റ് ചെയ്തു. 83 ഡോളറിനു വിറ്റ ഓഹരി ലിസ്റ്റിംഗിൽ 34% കയറി 111.50 ഡോളറിനു വ്യാപാരം തുടങ്ങി. അപ്പോൾ കമ്പനിയുടെ വിപണിമൂല്യം രണ്ടു ലക്ഷം കോടി ഡോളറിനു മുകളിൽ ആയിരുന്നു. വില 115.10 വരെ കയറിയിട്ടു താഴ്‌ന്ന് 1.8 ലക്ഷം കോടി ഡോളർ വിപണിമൂല്യത്തിൽ (ഓഹരിവില 97.17 ഡോളറിൽ) ക്ലോസ് ചെയ്തു. ഐപിഒ വിലയേക്കാൾ 17 ശതമാനം ഉയർന്നാണു ക്ലോസിംഗ്. ലിസ്റ്റിംഗിലെ വിപണി മൂല്യത്തിലും ഐപിഒ സമാഹരണത്തുകയിലും ആന്ത്രോപിക് റെക്കോർഡ് കുറിച്ചു.

ആന്ത്രോപിക് ഓഹരി വരുന്ന ആഴ്ചകളിൽ ഗണ്യമായി ഇടിയുമെന്നും അതിനു ശേഷം വാങ്ങുന്നതാണു യുക്തമെന്നും ചില ബ്രോക്കറേജുകൾ ഉപദേശിക്കുന്നു. ഓഹരി ആഴ്ചകൾക്കകം 150 ഡോളർ എത്തുമെന്നു പറയുന്നവരും ഉണ്ട്. ആന്ത്രോപിക് ഓഹരി നേട്ടത്തിൽ അവസാനിച്ച ഇന്നലെ ആപ്പിളും എൻവിഡിയയും മൈക്രോസോഫ്റ്റും മെറ്റായും സ്പേസ് എക്സും ആമസോണും അടക്കം ടെക് ഓഹരികൾ എല്ലാം താഴ്ന്നു. കോർവീവ്, നെബിയസ്, ഐറൻ തുടങ്ങിയവ അഞ്ചു ശതമാനത്തിലധികം ഇടിഞ്ഞു.

സ്ഥാപകർക്കും കമ്പനികൾക്കും വലിയ നേട്ടം

അഞ്ചു വർഷം മാത്രം പഴക്കമുള്ള കമ്പനിയുടെ സ്ഥാപകരായ ഏഴു പേരുടെയും ഓഹരികളുടെ മൂല്യം 2300 കോടി ഡോളർ വീതമായി. കമ്പനിയിൽ ആമസോണിൻ്റെ നിക്ഷേപത്തിന് 18,670 കോടി ഡോളറും ഗൂഗിളിൻ്റെ നിക്ഷേപത്തിന് 17,390 കോടി ഡോളറും വിലയായി. എഐക്ക് എതിരായ പ്രചാരണങ്ങൾ എല്ലാം മാറ്റിമറിക്കുന്ന വിജയമായി ക്ലോഡ് ഉടമകളായ ആന്ത്രോപിക്കിൻ്റെ ഐപിഒ വിജയം. അവരോടു മത്സരിക്കുന്ന ഓപ്പൺ എഐ 2027 ആദ്യം ഐപിഒ നടത്തിയേക്കും.

യുഎസ് വിപണികൾക്കു വലിയ തകർച്ച

ചരിത്രം കുറിച്ച ആന്തോപിക്കിൻ്റെ ലിസ്റ്റിംഗ് ദിവസമായ ഇന്നലെ യു.എസ് വിപണികൾ രണ്ടു ശതമാനത്തിലധികം ഇടിഞ്ഞു. വലിയ ചാഞ്ചാട്ടത്തിനു ശേഷമായിരുന്നു തകർച്ച. രാവിലെ എല്ലാ സൂചികകളും കുതിച്ചു കയറി. ആന്ത്രോപിക് വ്യാപാരം തുടങ്ങിയ ശേഷമാണു നഷ്‌ടത്തിലേക്കു വീണത്. എസ് ആൻഡ് പി 500 സൂചികയിലെ 460 ഓഹരികളും താഴ്ന്നു.

ഇതോടെ ഡൗ സൂചിക റെക്കോർഡ് ഉയരത്തിൽ നിന്നു 10 ശതമാനത്തിലധികം താഴ്ന്നു തിരുത്തൽ മേഖലയിലായി. ടെക് ഓഹരികളുടെ നാസ്ഡാക് സൂചിക റെക്കോർഡിൽ നിന്ന് 14 ശതമാനം താഴെ എത്തി. തുടർച്ചയായ ആറു ദിവസം താഴ്ന്ന എസ് ആൻഡ് പി 500 എട്ടര ശതമാനം ഇടിവിലാണ്. ഇന്നു രാവിലെ ഫ്യൂച്ചേഴ്സും നഷ്‌ടത്തിലാണ്.

വ്യാഴാഴ്ച ഡൗ ജോൺസ് സൂചിക 1101.11 പോയിൻ്റ് (2.19 ശതമാനം) താഴ്ന്ന് 49,097.06 ൽ ക്ലോസ് ചെയ്തു. എസ് ആൻഡ് പി 147.80 പോയിൻ്റ് (2.02%) നഷ്ടത്തോടെ 7175.83ൽ അവസാനിച്ചു. നാസ്ഡാക് കോംപസിറ്റ് 550.69 പോയിൻ്റ് (2.25%) ഇടിഞ്ഞ് 23,879.20 ൽ ക്ലോസ് ചെയ്തു.

എഎംഡിക്കു തിരിച്ചടി

ചൈനയിലേക്കും ചൈനയിൽ നിന്നും ഉള്ള ടെക്നോളജി വ്യാപാരനിരോധനം അഡ്വാൻസ്ഡ് മൈക്രോ ഡിവൈസസിനെ (എഎംഡി) സാരമായി ബാധിക്കുമെന്ന് ഹണ്ടർബ്രൂക്ക് മീഡിയ എന്ന നിക്ഷേപ സ്ഥാപനം പുറത്തിറക്കിയ റിപ്പോർട്ട് ഇന്നലെ എഎംഡി ഓഹരിയെ എട്ടു ശതമാനത്തോളം ഇടിവിലാക്കി. ചൈനീസ് സെർവറുകൾ ഉപയോഗിച്ചു ചിപ്പുകൾ നിർമിക്കുന്ന എഎംഡിയുടെ വരുമാനത്തിൽ 20% ചൈനയിൽ നിന്നാണെന്നും മീഡിയ ചൂണ്ടിക്കാട്ടി. ഫ്യൂച്ചേഴ്‌സിലും എഎംഡി താഴ്ന്നു. എഎംഡി സിഇഒ ലിസാ സൂ തായ്‌വാൻകാരിയും എൻവിഡിയയിൽ നിന്നു രാജിവച്ച ജെൻസൻ ഹുവാങ്ങിൻ്റെ കസിനുമാണ്.

ഇതിനിടെ ചൈനയുമായുള്ള എൻവിഡിയയുടെ ബന്ധത്തെപ്പറ്റി കലിഫോർണിയയിലെ ഡെമോക്രാറ്റിക് ഭരണകൂടം അന്വേഷണം ആരഭിച്ചിട്ടുണ്ട്. മെഗാസ്പീഡ് വഴി നിരോധിത ഉൽപന്നങ്ങൾ ചൈനയ്ക്കു നൽകിയോ എന്നാണ് അന്വേഷണം. യുഎസ് ദേശീയ ഏജൻസിയായ എഫ്ബിഐയും ഇതിൽ അന്വേഷണം നടത്തുന്നുണ്ട്.

ഫ്യൂച്ചേഴ്സ് താഴുന്നു

യു.എസ് ഫ്യൂച്ചേഴ്‌സ് ഇന്നു നഷ്ടത്തിലാണ്. ഡൗ ജോൺസ് 39 പോയിൻ്റും (0.08%) എസ് ആൻഡ് പി 21 പോയിൻ്റും (0.28%) നാസ്ഡാക് 100 സൂചിക 198 പോയിൻ്റും (0.74%) താഴ്ന്നു നീങ്ങുന്നു.

എഡിആർ വിപണി

ന്യൂയോർക്കിലെ എഡിആർ (അമേരിക്കൻ ഡെപ്പോസിറ്ററി റെസീറ്റ്) വിപണിയിൽ വ്യാഴാഴ്ച എച്ച്ഡിഎഫ്സി ബാങ്ക് വ്യാപാരസമയത്ത് 0.08 ശതമാനം ഉയർന്നിട്ടു തുടർ വ്യാപാരത്തിൽ 0.88% താഴ്ന്ന് 26.01 ഡോളറിൽ ക്ലോസ് ചെയ്തു. ഐസിഐസിഐ ബാങ്ക് നിശ്ചിത സമയത്ത് 0.03% ഉയർന്നിട്ടു തുടർ വ്യാപാരത്തിൽ 1.82% ഇടിഞ്ഞ് 34.27 ഡോളറിൽ അവസാനിച്ചു. ഇൻഫോസിസ് നിശ്ചിതസമയത്ത് 1.10% താഴ്ന്നിട്ട് തുടർ വ്യാപാരത്തിൽ 1.55% കയറി 11.83 ഡോളറിൽ ക്ലോസ് ചെയ്തു. വിപ്രോ വിപണിസമയത്തു മാറ്റമില്ലാതെ തുടർ വ്യാപാരത്തിൽ 0.99% കയറി 2.04 ഡോളറിൽ അവസാനിച്ചു.

നഷ്ടം തുടർന്നു യൂറോപ്പ്

എഐ, ടെക് ആശങ്കയും പലിശപ്പേടിയും തുടരുന്നത് യൂറോപ്യൻ ഓഹരി സൂചികകളെ ഇന്നലെയും ഒരു ശതമാനത്തിലധികം താഴ്‌ത്തി. ട്രംപ്- പുടിൻ- ഷി ഉച്ചകോടി യുക്രെയ്ൻ, ഇറാൻ പ്രശ്നങ്ങൾക്കു പരിഹാരം നിർദേശിക്കാത്തതും വിപണിക്കു ക്ഷീണമായി.

ഏഷ്യൻ വിപണികൾ ഇടിയുന്നു

ഏഷ്യൻ വിപണികൾ ഇന്നു വലിയ നഷ്ടത്തിലാണ്. ദക്ഷിണ കൊറിയയിലെ കോസ്‌പി സൂചിക 3.6 ശതമാനം താഴ്ന്നു. ജപ്പാനിലെ നിക്കൈ സൂചിക നാലു ശതമാനം നഷ്ടത്തിലായി. എഐ കമ്പനികളിൽ വലിയ നിക്ഷേപമുള്ള സോഫ്റ്റ് ബാങ്ക് 15 ശതമാനം ഇടിഞ്ഞു. ഓസ്ട്രേലിയൻ സൂചിക 1.7 ശതമാനം നഷ്‌ടത്തിലാണ്. തായ്‌വാൻ സൂചിക 5.5 ശതമാനം ഇടിഞ്ഞു. ഷാങ്ഹായ് സൂചിക 1.50% നഷ്ടത്തിലാണ്. ഹോങ്കോങ്ങിലെ ഹാങ് സെങ് 1.40 ശതമാനം താഴ്ന്നു.

കുതിച്ചുകയറി ഇന്ത്യൻ വിപണി

പലിശ കൂടുമെന്ന സൂചനയ്ക്കിടയിലും വിദേശ നിക്ഷേപകർ ഉത്സാഹപൂർവം വാങ്ങൽ തുടർന്നത് ഇന്ത്യൻ വിപണിയെ ഇന്നലെ വലിയ കുതിപ്പിലാക്കി. കഴിഞ്ഞ ദിവസങ്ങളിൽ കയറ്റത്തിൽ കൂടാതിരുന്ന മിഡ് ക്യാപ്, സ്‌മോൾ ക്യാപ് ഓഹരികളും ഇന്നലെ ഉയർന്നു.

വാഹന കമ്പനികളും കൺസ്യൂമർ ഡ്യുറബിൾസ് കമ്പനികളും ആണു വലിയ മുന്നേറ്റം നടത്തിയത്. മാരുതി സുസുകി 7.58ഉം മഹീന്ദ്ര 4.40ഉം ഐഷർ 4.66ഉം ടാറ്റാ മോട്ടോഴ്സ് പിവി 4.34ഉം ഹീറോ മോട്ടോകോർപ് 5.77ഉം ടിവിഎസ് മോട്ടോർ 5.32ഉം ഹ്യുണ്ടായി 5.8ഉം ശതമാനം ഉയർന്നു. എയർ കണ്ടീഷണർ ഡിമാൻഡിലെ വർധന വോൾട്ടാസിനെ 9.03ഉം ബ്ലൂസ്റ്റാറിനെ 8.77ഉം പിജി ഇലക്ട്രോപ്ലാസ്റ്റിനെ 7.24ഉം ശതമാനം കയറ്റി.

ഐടി മേഖല മാത്രമാണ് ഇന്നലെ നഷ്ടത്തിലായത്. ബിഎസ്ഇയുടെ വിപണിമൂല്യം 511.98 ലക്ഷം കോടി (ട്രില്യൺ) രൂപ (5.48 ട്രില്യൺ ഡോളർ) ആയി ഉയർന്നു. എൻഎസ്ഇയുടെ വിപണിമൂല്യം 506.80 ട്രില്യൺ രൂപ (5.43 ട്രില്യൺ ഡോളർ) ആയി വർധിച്ചു.

വിശാലവിപണിയിൽ ഭൂരിപക്ഷം ഓഹരികൾ നേട്ടത്തിലായി. ബിഎസ്ഇയിൽ 2326 ഓഹരികൾ ഉയർന്നു, 2085 ഓഹരികൾ നഷ്‌ടത്തിലായി. എൻഎസ്ഇയിൽ 2002 ഓഹരികൾ കയറിയപ്പോൾ 1597 എണ്ണം താഴ്ന്നു. വ്യാഴാഴ്ച വിദേശനിക്ഷേപകർ ക്യാഷ് വിപണിയിൽ 7411.41 കോടി രൂപയുടെ അറ്റവാങ്ങൽ നടത്തി. സ്വദേശി ഫണ്ടുകളും സ്ഥാപനങ്ങളും കൂടി ഇന്നലെ 1356.57 കോടി രൂപയുടെ അറ്റ വിൽപന നടത്തി.

വ്യാഴാഴ്ച സെൻസെക്‌സ് 989.94 പോയിൻ്റ് (1.21%) ഉയർന്ന് 83,021.75 ൽ ക്ലോസ് ചെയ്തു. നിഫ്റ്റി 286.35 പോയിൻ്റ് (1.14%) നേട്ടത്തോടെ 25,2514.30 ൽ അവസാനിച്ചു. ബാങ്ക് നിഫ്റ്റി 1024.35 പോയിൻ്റ് (1.65%) കുതിച്ച് 63,063.00 ൽ ക്ലോസ് ചെയ്തു. മിഡ് ക്യാപ് 100 സൂചിക 645.05 പോയിൻ്റ് (1.06%) മുന്നേറി 61,624.40 ൽ അവസാനിച്ചു. സ്മോൾ ക്യാപ് 100 സൂചിക 136.80 പോയിൻ്റ് (0.71%) ഉയർന്ന് 19,468.40 ൽ ക്ലോസ് ചെയ്തു.

സ്വർണത്തകർച്ച തുടരുന്നു

പലിശപ്പേടിയും ചൈനീസ് ഡിമാൻഡിലെ ഇടിവും സ്വർണത്തെ കുത്തനെ താഴ്‌ത്തുകയാണ്. ഇന്നലെ രാവിലെ ഉയരാൻ ശ്രമിച്ച സ്വർണം വീണ്ടും ഇടിഞ്ഞ് ഔൺസിന് 3626.20 ഡോളറിൽ ക്ലോസ് ചെയ്തു. നഷ്‌ടം 99.90 ഡോളർ (2.68 ശതമാനം). ഇന്നു രാവിലെ വില രണ്ടു ശതമാനം താഴ്ന്ന് 3,550 ഡോളറിൽ എത്തി. ജനുവരി 29-ന് 5,595 ഡോളറിൽ എത്തിയ സ്വർണം ഇതുവരെ 35 ശതമാനം ഇടിഞ്ഞു. 2008 ൽ ഉണ്ടായ 29 ശതമാനം ഇടിവ് മറികടക്കുന്നതായി ഈ വർഷത്തെ തകർച്ച.

കേരളത്തിൽ 22 കാരറ്റ് സ്വർണം പവന് വ്യാഴാഴ്ച 1880 രൂപ ഇടിഞ്ഞ് 95,840 രൂപ ആയി. ഇന്നും വില താഴും. വെള്ളി വില വ്യാഴാഴ്ച അഞ്ചു ശതമാനം ഇടിഞ്ഞ് ഔൺസിന് 43.01 ഡോളറിൽ ക്ലോസ് ചെയ്തു. ഇന്നു രാവിലെ രണ്ടു ശതമാനം താഴ്ന്നു 42.15 ഡോളറിൽ എത്തി. പ്ലാറ്റിനം 1331 ഡോളർ, പല്ലാഡിയം 883 ഡോളർ, റോഡിയം 8550 ഡോളർ എന്നിങ്ങനെ നിൽക്കുന്നു.

ലോഹങ്ങൾ തകർച്ച തുടരുന്നു

പലിശപ്പേടിയിൽ വ്യാവസായിക ലോഹങ്ങൾ ഇടിവ് തുടർന്നു. ടെക്നോളജി മേഖലയുടെ ക്ഷീണം ചെമ്പിന് അധിക ആഘാതമായി. ചെമ്പ് 1.41 ശതമാനം ഇടിഞ്ഞ് ടണ്ണിന് 12,570.00 ഡോളർ ആയി. അലൂമിനിയം 0.77 ശതമാനം താഴ്ന്ന് 2844.20 ഡോളറിൽ എത്തി. ടിൻ ഉയർന്നു. നിക്കലും സിങ്കും ലെഡും താഴ്ന്നു.

റബർ വില വീണ്ടും താഴെ

വ്യാഴാഴ്ചയും റബർ വിലയിടിവ് വിദേശത്തും കേരളത്തിലും തുടർന്നു. ബാങ്കോക്കിൽ ആർഎസ്എസ്-1 ക്വിൻ്റലിന് 275.70 ഡോളറും ആർഎസ്എസ്-3 ക്വിൻ്റലിന് 272.30 ഡോളറും ആയി ഇടിഞ്ഞു. കേരളത്തിൽ ആർഎസ്എസ്-4 ഇനം ക്വിൻ്റലിന് 27,600 രൂപ ആയി താഴ്ന്നു.

കൊക്കോ ഉയർന്നു

കൊക്കോ വില 3.34 ശതമാനം ഉയർന്നു ടണ്ണിന് 5169 ഡോളറിൽ ക്ലോസ് ചെയ്തു. അറബിക്ക കാപ്പി പൗണ്ടിന് 2.755 ഡോളറിൽ എത്തി. പാം ഓയിൽ 1.21 ശതമാനം ഉയർന്നു ടണ്ണിന് 4333 മലേഷ്യൻ റിംഗിറ്റ് ആയി.

ഡോളർ സൂചിക

പലിശ കൂടുമെന്ന വിശ്വാസത്തിൽ യു.എസ് ഡോളർ സൂചിക ഉയരത്തിൽ തുടരുന്നു. വ്യാഴാഴ്ച സൂചിക 103.90ൽ ക്ലോസ് ചെയ്തു. ഇന്നു രാവിലെ 103.92 വരെ കയറി. യൂറോ 1.0967 ഡോളറും പൗണ്ട് 1.309 ഡോളറും ആയി. ഡോളർ 159.35 ജാപ്പനീസ് യെന്നിലേക്കു കയറി. ഡോളർ 6.67 ചൈനീസ് യുവാനിൽ തുടർന്നു. അമേരിക്കയിൽ 10 വർഷ കടപ്പത്രങ്ങളുടെ നിക്ഷേപനേട്ടം (yield) ഇന്നു രാവിലെ 5.024 ശതമാനത്തിലേക്കു താഴ്ന്നു.

രൂപ കയറി

രൂപയുടെ കയറ്റം നിയന്ത്രക്കാൻ റിസർവ് ബാങ്ക്, പൊതുമേഖലാ ബാങ്കുകൾ വഴി ഇടപെട്ട ഇന്നലെയും രൂപ ഉയർന്നു. വ്യാഴാഴ്ച ഡോളർ 15 പൈസ താഴ്ന്ന് 93.29 രൂപയിൽ ക്ലോസ് ചെയ്തു. ഇന്നു രാവിലെ വിദേശത്തെ ഫോർവേഡ് വിപണിയിൽ ഡോളർ 93.33 രൂപയിൽ നിൽക്കുന്നു. ചൈനീസ് യുവാൻ 13.99 രൂപയിലേക്കു താഴ്ന്നു. യൂറോ ഇടിഞ്ഞു 102.34 രൂപയിൽ എത്തി.

ക്രൂഡ് ഉയരുന്നു

വ്യാഴാഴ്ച ക്രൂഡ് ഓയിൽ വില വീണ്ടും കയറി. ബ്രെൻ്റ് ഇനം ക്രൂഡ് ഓയിൽ ഉയർന്ന് 91.98 ഡോളറിൽ എത്തി. ഇന്നു രാവിലെ 92.44 ഡോളർ ആയി. ഡബ്ള്യു.ടി.ഐ ഇനം ക്രൂഡ് ഓയിൽ 82.81 ഡോളറിലാണ്.

ക്രിപ്റ്റോകൾ ഇടിവിൽ

ക്രിപ്റ്റോ കറൻസികൾ വീണ്ടും താഴ്ന്നു. ബിറ്റ്കോയിൻ 61,365 ഡോളർ വരെ താണിട്ടു കയറി 62,000 നു താഴെ നിൽക്കുന്നു. ഈഥർ 1,755 ഡോളറിനും സൊലാന 72.75 ഡോളറിനും താഴെയാണ്.

വിപണി സൂചനകൾ

(2026 നവംബർ 19, വ്യാഴം)

  • സെൻസെക്സ്: 83,021.75 +1.21%

  • നിഫ്റ്റി-50: 25,514.30 +1.14%

  • ബാങ്ക് നിഫ്റ്റി: 63,063.00 +1.65%

  • മിഡ് ക്യാപ്-100: 61,624.40 +1.06%

  • സ്മോൾ ക്യാപ്-100: 19,468.40 +0.71%

  • ഡൗജോൺസ്: 49,097.06 -2.19%

  • എസ്ആൻഡ്പി: 7175.83 -2.02%

  • നാസ്ഡാക്: 23,879.20 -2.25%

  • ഡോളർ: ₹93.29 -₹0.15

  • സ്വർണം (ഔൺസ്): $3626.20 -$99.90

  • സ്വർണം (പവൻ): ₹95,840 -₹1880

  • ക്രൂഡ് ഓയിൽ ബ്രെൻ്റ്: $92.67 +$00.78

Read DhanamOnline in English

Subscribe to Dhanam Magazine

SCROLL FOR NEXT