മുത്തൂറ്റ് ഫിൻകോർപ്പ് ലിമിറ്റഡ് 3,000 കോടി രൂപ സമാഹരിക്കുന്ന ഐപിഒയ്ക്കായി സെബിക്ക് ഡി.ആർ.എച്ച്.പി സമർപ്പിച്ചിരിക്കുകയാണ്. കോട്ടക് മഹീന്ദ്ര ക്യാപിറ്റൽ, മോർഗൻ സ്റ്റാൻലി ഇന്ത്യ, ജെഎം ഫിനാൻഷ്യൽ, എസ്ബിഐ ക്യാപിറ്റൽ മാർക്കറ്റ്സ് എന്നിവ ബുക്ക് റണ്ണിങ് ലീഡ് മാനേജർമാരാണ്. 2026 മാർച്ച് 31-നുള്ള കണക്കുകൾ പ്രകാരം കമ്പനിയുടെ ആസ്തി 73,444.71 കോടി രൂപയും സംയോജിത ലാഭം 1,847.62 കോടി രൂപയുമായി ഉയർന്നിട്ടുണ്ട്; സ്വർണ വായ്പകൾക്കൊപ്പം ബിസിനസ്, വ്യക്തിഗത വായ്പകളും ഡിജിറ്റൽ പ്ലാറ്റ്ഫോം വഴി വ്യാപിപ്പിച്ചു.
രാജ്യത്തെ പ്രമുഖ ബാങ്കിതര ധനകാര്യ സ്ഥാപനവും മുത്തൂറ്റ് പാപ്പച്ചൻ ഗ്രൂപ്പിന്റെ ഫ്ലാഗ്ഷിപ്പ് കമ്പനിയുമായ മുത്തൂറ്റ് ഫിൻകോർപ്പ് ലിമിറ്റഡ് (Muthoot FinCorp Ltd) പ്രാഥമിക പൊതുഓഹരി വിൽപനയ്ക്കായി (ഐ.പി.ഒ), രാജ്യത്തെ മൂലധന വിപണി നിയന്ത്രണ ഏജൻസിയായ സെബിക്ക് (SEBI) മുമ്പാകെ ഡ്രാഫ്റ്റ് റെഡ് ഹെറിങ് പ്രോസ്പെക്ടസ് (DRHP) അഥവാ പ്രാഥമിക രേഖകൾ സമർപ്പിച്ചു. 3,000 കോടി രൂപയുടെ പുതിയ ഇക്വിറ്റി ഓഹരികളാണ് (Fresh Issue) ഐ.പി.ഒയിൽ ഉൾപ്പെടുത്തിയിരിക്കുന്നത്.
ഡിജിറ്റൽ പ്ലാറ്റ്ഫോമുകൾ ശക്തിപ്പെടുത്തുന്നതിനും വൈവിധ്യമാർന്ന വായ്പാ പോർട്ട്ഫോളിയോ വികസിപ്പിക്കുന്നതിനുമായാണ് ഐ.പി.ഒയിലൂടെ സമാഹരിക്കുന്ന തുക പ്രധാനമായും ഉപയോഗിക്കുന്നത്. കോട്ടക് മഹീന്ദ്ര ക്യാപിറ്റൽ, മോർഗൻ സ്റ്റാൻലി ഇന്ത്യ, ജെഎം ഫിനാൻഷ്യൽ, എസ്ബിഐ ക്യാപിറ്റൽ മാർക്കറ്റ്സ് എന്നിവരാണ് ഐപിഒയുടെ ബുക്ക് റണ്ണിങ് ലീഡ് മാനേജർമാർ.
സ്വർണപ്പണയ ആസ്തിയിൽ രാജ്യത്ത് ഏറ്റവും വേഗത്തിൽ വളർച്ച നേടുന്ന ധനകാര്യ സ്ഥാപനമാണ് മുത്തൂറ്റ് ഫിൻകോർപ് എന്ന് ക്രിസിൽ റിപ്പോർട്ട് വ്യക്തമാക്കുന്നു. 2024 മാർച്ച് 31 മുതൽ 2026 മാർച്ച് 31 വരെയുള്ള കാലയളവിൽ കമ്പനിയുടെ സ്വർണപ്പണയ ആസ്തി 59.04 ശതമാനം സംയുക്ത വാർഷിക വളർച്ചാ നിരക്ക് കൈവരിച്ചു.
2026 മാർച്ച് 31-ലെ കണക്കുകൾ പ്രകാരം മുത്തൂറ്റ് ഫിൻകോർപ്പിന്റെ ആസ്തി 73,444.71 കോടി രൂപയായി ഉയർന്നു. രാജ്യത്തുടനീളം 5,610 ശാഖകളുള്ള കമ്പനിക്ക് 4.26 ദശലക്ഷം ഡിജിറ്റൽ ഉപഭോക്താക്കളുമുണ്ട്. 2026 സാമ്പത്തിക വർഷത്തിൽ കമ്പനിയുടെ സംയോജിത പ്രവർത്തന വരുമാനം 11,203.81 കോടി രൂപയായി വർദ്ധിച്ചു. മുൻ സാമ്പത്തിക വർഷം ഇത് 8,497.69 കോടി രൂപയായിരുന്നു. 2025-ലെ 607.90 കോടി രൂപയിൽ നിന്നും 2026-ൽ സംയോജിത ലാഭം 1,847.62 കോടി രൂപയായി കുതിച്ചുയർന്നു.
പ്രധാന ബിസിനസ്സായ സ്വർണ വായ്പാ സേവനങ്ങളെ അടിസ്ഥാനമാക്കി ക്രമേണ വൈവിധ്യമാർന്ന സാമ്പത്തിക സേവനങ്ങളിലേക്ക് പ്രവർത്തനം വ്യാപിപ്പിച്ച മുത്തൂറ്റ് ഫിൻകോർപ്, സ്വർണ വായ്പകൾക്ക് പുറമെ ബിസിനസ്സ്, വ്യക്തിഗത വായ്പാ വിഭാഗങ്ങൾ കൂടി ഉള്പ്പെടുത്തി സേവനശൃംഖല വിപുലീകരിച്ചിട്ടുണ്ട്. കമ്പനിയുടെ ഡിജിറ്റൽ പ്ലാറ്റ്ഫോമായ 'മുത്തൂറ്റ് ഫിൻകോർപ്പ് വൺ' ഈ വിപുലീകരണത്തിന് കരുത്തേകി.
Read DhanamOnline in English
Subscribe to Dhanam Magazine