വിപ്രോ പുറത്ത്, ബി.എസ്.ഇ അകത്ത്; നിഫ്റ്റി-50 സൂചികയിൽ പുനഃക്രമീകരണം; ഐ.ടി മേഖലയുടെ സ്വാധീനം ചുരുങ്ങുന്നു?

നാഷണൽ സ്റ്റോക്ക് എക്സ്ചേഞ്ചിന്റെ (NSE) അർധവാർഷിക പുനഃക്രമീകരണത്തിന്റെ ഭാഗമായി, ബെഞ്ച്മാർക്ക് സൂചികയായ നിഫ്റ്റി-50യിൽ പ്രമുഖ ഐ.ടി കമ്പനിയായ വിപ്രോയ്ക്ക് പകരം ബി.എസ്.ഇ ലിമിറ്റഡ് (BSE Ltd) ഇടംപിടിക്കും. സെപ്റ്റംബർ 30-ലെ വ്യാപാരം പൂർത്തിയായ ശേഷം ഈ മാറ്റം നിലവിൽ വരും.

ഫ്രീ-ഫ്ലോട്ട് വിപണി മൂലധനത്തിന്റെ (Free-float Market Capitalization) അടിസ്ഥാനത്തിലുള്ള മാനദണ്ഡങ്ങൾ പാലിച്ചാണ് ഈ പുനഃക്രമീകരണമെങ്കിലും, ഇന്ത്യൻ ഓഹരി വിപണിയിൽ ഐ.ടി സെക്ടറിന്റെ ദീർഘകാല സ്വാധീനത്തിൽ വരുന്ന ഘടനാപരമായ മാറ്റങ്ങളുടെ വ്യക്തമായ സൂചനയായാണ് വിപണി വിദഗ്ധർ ഇതിനെ വിലയിരുത്തുന്നത്.

എന്തുകൊണ്ട് ബി.എസ്.ഇ? വിപ്രോ പുറത്തായതെങ്ങനെ?

നിഫ്റ്റി-50 സൂചികയിൽ ഉൾപ്പെടാൻ പരിഗണിക്കുന്ന ഏറ്റവും ചെറിയ കമ്പനിയേക്കാൾ ഒന്നര മടങ്ങെങ്കിലും ആറ് മാസത്തെ ശരാശരി ഫ്രീ-ഫ്ലോട്ട് വിപണി മൂല്യം ഉണ്ടായിരിക്കണം എന്നതാണ് എൻ.എസ്.ഇയുടെ ചട്ടം:

• ബി.എസ്.ഇയുടെ മൂല്യം: ബി.എസ്.ഇയുടെ ആറ് മാസത്തെ ശരാശരി ഫ്രീ-ഫ്ലോട്ട് വിപണി മൂല്യം 1,40,879 കോടി രൂപയാണ്. ഇത് മാനദണ്ഡങ്ങൾക്ക് അനുസൃതമായ മുന്നേറ്റം കമ്പനിക്ക് നൽകി.

• വിപ്രോയുടെ ഇടിവ്: വിപ്രോയുടെ ശരാശരി ഫ്രീ-ഫ്ലോട്ട് മൂല്യം 55,930 കോടി രൂപയായി കുറഞ്ഞു. തുടർച്ചയായി ഓഹരിയിൽ നേരിട്ട വിലയിടിവ് വിപ്രോയെ സൂചികയിൽ നിന്ന് പുറത്താക്കാൻ കാരണമായി.

ഇതോടെ വിപ്രോ നിഫ്റ്റി നെക്സ്റ്റ്-50 (Nifty Next 50) സൂചികയിലേക്ക് മാറും. പോളികാബ് ഇന്ത്യ, വേദാന്ത അലുമിനിയം, ഹിറ്റാച്ചി എനർജി, വോഡഫോൺ ഐഡിയ എന്നിവയും നിഫ്റ്റി നെക്സ്റ്റ്-50 സൂചികയുടെ ഭാ​ഗമാകുമ്പോൾ ഇന്ത്യൻ ഹോട്ടൽസ്, ആർ.ഇ.സി, ശ്രീ സിമന്റ് തുടങ്ങിയ ഓഹരികൾ പുറത്താകും.

പാസീവ് ഫണ്ടുകളുടെ ഒഴുക്കും ഓഹരികളിലെ മാറ്റങ്ങളും

സെപ്റ്റംബർ 30-ന് നിഫ്റ്റി-50 സൂചികയെ പിന്തുടരുന്ന പാസീവ് ഫണ്ടുകൾ (Index Funds & ETFs) തങ്ങളുടെ പോർട്ട്‌ഫോളിയോ ക്രമീകരിക്കേണ്ടി വരും. പ്രമുഖ അസറ്റ് മാനേജ്മെന്റ് കമ്പനിയായ ആക്സിസ് ക്യാപിറ്റലിന്റെ കണക്കുകൂട്ടലുകൾ പ്രകാരം:

• ബി.എസ്.ഇയിലേക്ക് വരുന്ന നിക്ഷേപം: ബി.എസ്.ഇയിലേക്ക് ഏകദേശം 6,300 കോടി രൂപയുടെ (ഏകദേശം 1.57 കോടി ഓഹരികൾ) പുതിയ നിക്ഷേപം എത്തും.

• വിപ്രോയിൽ നേരിടുന്ന വിൽപ്പന: വിപ്രോയിൽ നിന്ന് 2,100 കോടിയിലധികം രൂപ (ഏകദേശം 11.42 കോടി ഓഹരികൾ) വിറ്റഴിക്കപ്പെടും.

പ്രമുഖ ബ്രോക്കറേജ് സ്ഥാപനമായ മാക്വറീ, സമീപ ഭാവിയിലേക്കുള്ള ലക്ഷ്യവിലയായി ബി.എസ്.ഇ ഓഹരിക്ക് 4,000 രൂപയാണ് നിശ്ചയിച്ചത്. എന്നാൽ പ്രൊപ്രൈറ്ററി ട്രേഡർമാരുടെ ഉയർന്ന പങ്കാളിത്തവും റെഗുലേറ്ററി നിയന്ത്രണങ്ങളും ചൂണ്ടിക്കാട്ടി ജെഫറീസ് 2,940 രൂപ ലക്ഷ്യവിലയും നുവാമ വെൽത്ത് 3,240 ലക്ഷ്യവിലയുമാണ് ബി.എസ്.ഇ ഓഹരിക്ക് നൽകിയിട്ടുള്ളത്. കഴിഞ്ഞ ആറ് മാസത്തിനിടെ വിപ്രോ ഓഹരികൾ 14 ശതമാനവും, ഈ വർഷം ഇതുവരെയുള്ള കാലയളവിൽ 40 ശതമാനവും ഇടിഞ്ഞിട്ടുണ്ട്.

ഐ.ടി സെക്ടറിന്റെ സ്വാധീനം ചുരുങ്ങുന്നു

ഇന്ത്യൻ ഓഹരി വിപണിയിലെ പ്രധാന ബെഞ്ച്മാർക്ക് സൂചികകളിലൊന്നായ നിഫ്റ്റി-50യിൽ ഐ.ടി സെക്ടറിന്റെ സാന്നിധ്യം ക്രമേണ കുറയുന്നതിന്റെ തുടർച്ചയായാണ് വിപ്രോയുടെ പിന്മാറ്റം വിലയിരുത്തപ്പെടുന്നത്. ഒരുകാലത്ത് വിപണിയെ നയിച്ചിരുന്ന വൻകിട ഐ.ടി കമ്പനികൾക്ക് പകരം മൂലധന വിപണിയിലെയും മറ്റ് ആഭ്യന്തര വളർച്ചാ മേഖലകളിലെയും കമ്പനികളുടെ ഓഹരികൾ ബെഞ്ച്മാർക്ക് സൂചികകളിൽ മുൻഗണന നേടുകയാണ്. സോഫ്റ്റ്‌‍വെയർ സേവനങ്ങളുടെ മാത്രം പ്രതിഫലനമെന്ന നിലയിൽ നിന്ന് മാറി, ആഭ്യന്തര സാമ്പത്തിക വികസനത്തിന് ഊന്നൽ നൽകുന്ന ഓഹരി സൂചികയായി നിഫ്റ്റി-50 മാറുന്നു എന്നതിന്റെ സൂചനയാണിതെന്നും അനലി​സ്റ്റുകൾ ചൂണ്ടിക്കാട്ടുന്നു.