പൊതുമേഖല ബാങ്കുകളുടെ ഓഹരികള്ക്ക് ശക്തമായ വാങ്ങല് പിന്തുണയോടെ വിപണിയില് കുതിപ്പ്. നിഫ്റ്റി പി.എസ്.യു ബാങ്ക് സൂചിക 3.5 ശതമാനത്തിലധികം ഉയര്ന്നപ്പോള്, സ്റ്റേറ്റ് ബാങ്ക് ഓഫ് ഇന്ത്യ, ബാങ്ക് ഓഫ് ഇന്ത്യ, ഇന്ത്യന് ബാങ്ക് തുടങ്ങിയ ഓഹരികള് മുന്നേറ്റത്തിന് നേതൃത്വം നല്കി. സൂചികയിലെ എല്ലാ ഘടക ഓഹരികളും നേട്ടത്തില്.
പ്രധാന പൊതുമേഖല ബാങ്കുകളുടെ മികച്ച ത്രൈമാസ ഫലങ്ങളാണ് പ്രചോദനം. ലാഭ വര്ധന, ആസ്തി ഗുണനിലവാരത്തിലെ സ്ഥിരത, മെച്ചപ്പെട്ട പ്രവര്ത്തന സൂചികകള് എന്നിവ നിക്ഷേപകരുടെ ആത്മവിശ്വാസം കൂട്ടി. അതേസമയം, വിപണി നിരീക്ഷകര് പറയുന്നത്, ഈ മുന്നേറ്റം ലാഭക്കണക്കുകളില് മാത്രം ഒതുങ്ങുന്നതല്ല, ദീര്ഘകാല നയസൂചനകളും ഘടനാപരമായ മാറ്റങ്ങളും ഇതിന് പിന്നിലുണ്ടെന്നാണ്.
ഡിസംബര് 31ന് അവസാനിച്ച മൂന്നാം പാദത്തില് പൊതുമേഖല ബാങ്കുകള് ശക്തമായ പ്രകടനമാണ് കാഴ്ചവെച്ചത്. സ്റ്റേറ്റ് ബാങ്ക് ഓഫ് ഇന്ത്യ ഈ പാദത്തില് 21,028 കോടി ലാഭം റിപ്പോര്ട്ട് ചെയ്തു. മുന്വര്ഷത്തേക്കാള് 24 ശതമാനം വര്ധനവാണിത്. ആസ്തി മാനേജ്മെന്റ് വിഭാഗത്തില് നിന്ന് ലഭിച്ച പ്രത്യേക ഡിവിഡന്ഡും ലാഭവര്ധനയ്ക്ക് സഹായകമായി.
പഞ്ചാബ് നാഷണല് ബാങ്ക് ലാഭം ഏകദേശം 13 ശതമാനം വര്ധിച്ച് 5,100 കോടിയായി. പലിശ വരുമാനത്തിലും ആസ്തി ഗുണനിലവാരത്തിലും ഉണ്ടായ മെച്ചപ്പെടുത്തലുകളാണ് ഇതിന് പിന്തുണയായത്. ബാങ്ക് ഓഫ് ബറോഡയുടെ ലാഭം 5,443 കോടിയായി ഉയര്ന്നു. പ്രൊവിഷനിങ് ചെലവ് കുറഞ്ഞതും ഫലത്തില് അനുകൂലമായി.
നടപ്പു സാമ്പത്തിക വര്ഷം പൊതുമേഖല ബാങ്കുകള് ഒന്നിച്ച് 2 ലക്ഷം കോടി ലാഭം കടക്കുമെന്നതാണ് വിലയിരുത്തല്. ഒരുകാലത്ത് വലിയ കിട്ടാക്കട (എന്.പി.എ) പ്രശ്നങ്ങള് നേരിട്ടിരുന്ന മേഖലയുടെ ശക്തമായ തിരിച്ചുവരവാണ് ഇത് സൂചിപ്പിക്കുന്നത്. മോശം വായ്പകളുടെ തോത് ഗണ്യമായി കുറഞ്ഞതും, സ്ഥിരതയുള്ള വായ്പാ വളര്ച്ചയും, പ്രൊവിഷനിങ് ചെലവ് കുറഞ്ഞതുമാണ് ലാഭവര്ധനയ്ക്ക് വഴിയൊരുക്കിയത്. ഇതോടെ പൊതുമേഖല ബാങ്കുകളെക്കുറിച്ചുള്ള നിക്ഷേപക ധാരണയിലും മാറ്റമുണ്ട്. ആസ്തി ഗുണനിലവാര ആശങ്കകളില് നിന്ന് ലാഭ ദൃശ്യതയിലേക്കും മൂലധന കാര്യക്ഷമതയിലേക്കുമാണ് ശ്രദ്ധ മാറുന്നത്.
പൊതുമേഖല ബാങ്കുകള്ക്ക് അനുകൂലമായ മറ്റൊരു പ്രധാന സൂചനയാണ് 'വികസിത് ഭാരതി'ന്റെ ഭാഗമായി ബാങ്കിങ് മേഖലക്കായി പ്രത്യേക പാനല് രൂപീകരിക്കാനുള്ള കേന്ദ്രസര്ക്കാര് നീക്കം. അടിസ്ഥാന സൗകര്യ വികസനം, നിര്മാണ മേഖല, എംഎസ്എംഇകള്, ഗ്രീന് ട്രാന്സിഷന് തുടങ്ങിയ മേഖലകളിലേക്ക് ധനസഹായം ഉറപ്പാക്കുന്നതില് ബാങ്കുകള്ക്ക് വലിയ പങ്കാണ് ഈ നീക്കം കല്പ്പിക്കുന്നത്. നയതുടര്ച്ചയും സര്ക്കാര് പിന്തുണയും വ്യക്തമാക്കുന്ന ഈ നീക്കം, ബാങ്കിങ് മേഖലയുടെ ദീര്ഘകാല വളര്ച്ചാപ്രതീക്ഷകള്ക്ക് കൂടുതല് ബലം നല്കുന്നതായാണ് വിലയിരുത്തല്.
നിക്ഷേപകര് അടുത്തുനോക്കുന്ന മറ്റൊരു വിഷയമാണ് പൊതുമേഖല ബാങ്കുകളിലെ വിദേശ നിക്ഷേപ പരിധി 20 ശതമാനത്തില് നിന്ന് 49 ശതമാനമായി ഉയര്ത്താനുള്ള സാധ്യത. ഇത് നടപ്പായാല് ദീര്ഘകാല വിദേശ മൂലധനം എത്തുന്നതിനും, കോര്പറേറ്റ് ഗവര്ണന്സ് മെച്ചപ്പെടുന്നതിനും, ശക്തമായ ബാങ്കുകള്ക്ക് മൂല്യനിര്ണയത്തില് (valuation) നേട്ടമുണ്ടാകുന്നതിനും സാധ്യതയുണ്ട്. അതേസമയം, സര്ക്കാരിന്റെ നിയന്ത്രണം തുടരുമെങ്കിലും, എല്ലാ ബാങ്കുകള്ക്കും ഒരുപോലെ ഗുണം ലഭിക്കണമെന്നില്ലെന്ന വിലയിരുത്തലും നിലനില്ക്കുന്നു.
മികച്ച ത്രൈമാസ ഫലങ്ങളാണ് ഇപ്പോഴത്തെ മുന്നേറ്റത്തിനു കാരണമെങ്കിലും, പൊതുമേഖല ബാങ്കുകള് ഇപ്പോള് കടക്കുന്നത് ലാഭം, നയപിന്തുണ, ഘടനാപരമായ സ്ഥിരത എന്നിവ ചേര്ന്ന പുതിയ ഘട്ടത്തിലേക്കാണെന്നതാണ് വിപണി വിലയിരുത്തല്. അതിനാല് തന്നെ, ഈ മേഖല ഇനി ഹ്രസ്വകാല വ്യാപാര അവസരമെന്നതിലുപരി, ഇന്ത്യയുടെ സാമ്പത്തിക വളര്ച്ചയിലെ ദീര്ഘകാല പങ്കാളിയെന്ന നിലയിലാണ് നിക്ഷേപകര് കാണുന്നത്.
Read DhanamOnline in English
Subscribe to Dhanam Magazine