മാർച്ച് മുതൽ മെയ് വരെയുള്ള മാസങ്ങളിൽ രാജ്യത്ത് താപനില സാധാരണയേക്കാൾ ഉയരാനും കടുത്ത ഉഷ്ണതരംഗമുണ്ടാകാനും സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ (IMD) മുന്നറിയിപ്പുളളത്. ഈ സാഹചര്യത്തിൽ മികച്ച പ്രകടനം കാഴ്ചവെക്കാന് സാധ്യതയുള്ള ചില മേഖലകളാണ് ഇവിടെ പരിശോധിക്കുന്നത്.
ചൂട് വർദ്ധിക്കുന്നതോടെ എയർ കണ്ടീഷണറുകൾ, കൂളറുകൾ, ഫാനുകൾ (Cooling Appliances) എന്നിവയുടെ വിൽപനയിൽ വൻ കുതിച്ചുചാട്ടം പ്രതീക്ഷിക്കുന്നു. വോൾട്ടാസ് (Voltas), ബ്ലൂ സ്റ്റാർ, ഹാവെൽസ്, ഓറിയന്റ് ഇലക്ട്രിക്, ക്രോംപ്ടൺ ഗ്രീവ്സ് തുടങ്ങിയ കമ്പനികൾക്ക് ഇത് അനുകൂലഘടകമാണ്. കൂടാതെ ഇത്തരം ഉപകരണങ്ങൾക്കായി ഘടകങ്ങൾ നിർമ്മിച്ചു നൽകുന്ന പിജി ഇലക്ട്രോപ്ലാസ്റ്റിനും (PG Electroplast) മുന്നേറ്റത്തിന് സാധ്യതയുണ്ട്.
വേനൽക്കാലത്ത് ശീതളപാനീയങ്ങളുടെയും ഡയറി ഉൽപ്പന്നങ്ങളുടെയും (Beverages & Dairy) വിപണി സജീവമാകും. വരുൺ ബിവറേജസ് (Varun Beverages), വഡിലാൽ ഇൻഡസ്ട്രീസ് (Vadilal Industries), ഹാറ്റ്സൺ അഗ്രോ, ഇമാമി തുടങ്ങിയ ഓഹരികൾ ഈ കാലയളവിൽ മികച്ച പ്രകടനം കാഴ്ചവെക്കാറുണ്ട്.
ഊർജ മേഖല (Power Sector): കടുത്ത വേനലിൽ രാജ്യത്തെ വൈദ്യുതി ആവശ്യം റെക്കോർഡ് നിലവാരമായ 283 ജിഗാവാട്ടിലേക്ക് ഉയരുമെന്ന് പ്രതീക്ഷിക്കുന്നു, ഇത് 2024-നേക്കാൾ 13 ശതമാനം കൂടുതലാണ്. ഈ വർദ്ധനവ് എൻടിപിസി (NTPC), ടാറ്റ പവർ, അദാനി പവർ, കോൾ ഇന്ത്യ തുടങ്ങിയ കമ്പനികൾക്ക് വലിയ ഗുണകരമാകും.
കടുത്ത ചൂട് കാർഷിക ഉൽപ്പാദനത്തെ ബാധിക്കാനിടയുള്ളത് ഒരു വെല്ലുവിളിയാണ്. പ്രത്യേകിച്ച് പഞ്ചാബ്, ഹരിയാന തുടങ്ങിയ സംസ്ഥാനങ്ങളിലെ ഗോതമ്പ് ഉൽപ്പാദനത്തെ ഇത് ബാധിച്ചേക്കാം. ഇത് ഭക്ഷ്യപണപ്പെരുപ്പം വർദ്ധിപ്പിക്കാനും റിസർവ് ബാങ്കിന്റെ പലിശ നിരക്ക് കുറയ്ക്കാനുള്ള തീരുമാനങ്ങളെ സങ്കീർണമാക്കാനും സാധ്യതയുണ്ടെന്നും വിദഗ്ധർ ചൂണ്ടിക്കാട്ടുന്നു.
Disclaimer: മേൽസൂചിപ്പിച്ച വിവരങ്ങള് പഠനാവശ്യാർത്ഥം പങ്കുവെച്ചതാണ്. ഓഹരി വിപണിയിലെ നിക്ഷേപം വിപണിയുടെ നഷ്ടസാധ്യതകൾക്ക് വിധേയമാണ്. നിക്ഷേപത്തിന് മുൻപ് സ്വന്തം നിലയിൽ കൂടുതൽ പഠിക്കുകയോ അല്ലെങ്കിൽ സെബി അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യാവുന്നതാണ്.
Rising summer heat is set to boost cooling, beverage, and power sector stocks, while posing risks to agriculture.
Read DhanamOnline in English
Subscribe to Dhanam Magazine