2026 ന്റെ തുടക്കത്തിൽ മന്ദഗതിയിലായിരുന്ന പ്രാഥമിക ഓഹരി വിപണി (Primary Market) ഫെബ്രുവരി അവസാനത്തോടെ ശക്തമായ തിരിച്ചുവരവിന് ഒരുങ്ങുന്നു. ഫെബ്രുവരി മാസം അവസാനിക്കുന്നതിന് മുൻപായി ഏഴ് പ്രമുഖ കമ്പനികൾ ഐപിഒ ക്ക് ഒരുങ്ങുന്നതായി മണികണ്ട്രോള് റിപ്പോര്ട്ട് ചെയ്യുന്നു. മൊത്തം ഏകദേശം 14,000 കോടി രൂപയുടെ സമാഹരണമാണ് ലക്ഷ്യം.
ഫെബ്രുവരിയിലെ ഈ മുന്നേറ്റത്തിന് തുടക്കം കുറിക്കുന്നത് ആർട്ടിഫിഷ്യൽ ഇന്റലിജൻസ് കമ്പനിയായ ഫ്രാക്റ്റൽ അനലിറ്റിക്സും (Fractal Analytics) എൻബിഎഫ്സിയായ (NBFC) ഐ ഫിനാൻസും (Aye Finance) ആണ്. ഇരു കമ്പനികളുടെയും ഐപിഒകൾ ഫെബ്രുവരി 9 ന് ആരംഭിച്ച് ഫെബ്രുവരി 11 ന് അവസാനിക്കും. ഫ്രാക്റ്റൽ അനലിറ്റിക്സ് 2,834 കോടി രൂപ സമാഹരിക്കാനാണ് ലക്ഷ്യമിടുന്നത്, ഇതിന്റെ പ്രൈസ് ബാൻഡ് 857-900 രൂപയാണ്. ഐ ഫിനാൻസ് 1,010 കോടി രൂപ സമാഹരിക്കാനാണ് പദ്ധതിയിടുന്നത്, 122-129 രൂപയാണ് പ്രൈസ് ബാൻഡ്.
ഈ പട്ടികയിലെ ഏറ്റവും വലിയ ഐപിഒ ഇൻഡോ എംഐഎം (Indo MIM) കമ്പനിയുടേതാണ്. ഏകദേശം 5,500 കോടി രൂപ വിപണിയിൽ നിന്ന് സമാഹരിക്കാനാണ് ഇവർ ലക്ഷ്യമിടുന്നത്. ക്ലീൻ മാക്സ് എൻവിറോ എനർജി സൊല്യൂഷൻസ് (Clean Max Enviro Energy Solutions) 3,600 കോടി രൂപയുടെ പബ്ലിക് ഇഷ്യൂ പുറത്തിറക്കും.
മറ്റ് പ്രധാന കമ്പനികളും പ്രതീക്ഷിക്കുന്ന തുകയും താഴെ നൽകുന്നു:
• ഗജ ആൾട്ടർനേറ്റീവ് അസറ്റ് മാനേജ്മെന്റ് (Gaja Alternative Asset Management): 656 കോടി രൂപ.
• സ്കൈവേയ്സ് എയർ സർവീസസ് (Skyways Air Services): 650 കോടി രൂപ.
• പിഎൻജിഎസ് രേവ ഡയമണ്ട് (PNGS Reva Diamond): 360 കോടി രൂപ.
റെക്കോർഡ് നേട്ടങ്ങൾ കൈവരിച്ച 2025 ന് ശേഷം (1.76 ലക്ഷം കോടി രൂപയാണ് സമാഹരിച്ചത്), 2026 ന്റെ തുടക്കം വിപണിയിൽ മന്ദതയായിരുന്നു. ഈ വർഷം ഇതുവരെ ഭാരത് കോക്കിംഗ് കോൾ, അമാഗി മീഡിയ ലാബ്സ്, ഷാഡോഫാക്സ് ടെക്നോളജീസ് എന്നീ മൂന്ന് കമ്പനികൾ മാത്രമാണ് ഐപിഒ നടത്തിയത്. എന്നാൽ വ്യാപാര സംബന്ധമായ അനിശ്ചിതത്വങ്ങൾ മാറുന്നതോടെ നിക്ഷേപകർക്കിടയിൽ വീണ്ടും ഉണർവ് ഉണ്ടാകുമെന്നും ഇത് ഐപിഒ വിപണിക്ക് ഗുണകരമാകുമെന്നുമാണ് വിലയിരുത്തുന്നത്. ഫെബ്രുവരിയിലെ ഈ ഏഴ് ഐപിഒകൾ വിപണിക്ക് പുതിയ കരുത്ത് പകരുമെന്നാണ് പ്രതീക്ഷ.
Seven companies plan IPOs worth ₹14,000 crore in February 2026, signaling renewed momentum in the Indian primary market.
Read DhanamOnline in English
Subscribe to Dhanam Magazine