സംഘര്‍ഷം ഗൗനിക്കാതെ നിക്ഷേപകര്‍, ഓഹരി വിപണിക്ക് വന്‍ തിരിച്ചുവരവ്; ടാറ്റ മോട്ടോഴ്‌സിന് തിരിച്ചടി, നേട്ടം നിലനിര്‍ത്തി മുത്തൂറ്റ് ഫിനാന്‍സ്

ഇറാന്‍-ഇസ്രയേല്‍ സംഘര്‍ഷത്തില്‍ രണ്ടുദിവസം പിന്നോക്കം പോയ നിക്ഷേപകരും ഇന്ത്യന്‍ ഓഹരി വിപണിയും ഇന്ന് തകര്‍പ്പന്‍ തിരിച്ചുവരവില്‍. പ്രതീക്ഷിച്ച സമ്മര്‍ദം എണ്ണവിലയിലും സ്വര്‍ണത്തിലും സംഭവിക്കാതിരുന്നതോടെ നിക്ഷേപകര്‍ വാങ്ങലിലേക്ക് ശ്രദ്ധ തിരിച്ചു. സെന്‍സെക്‌സ് ഇന്ന് 81,796.15 പോയിന്റിലെത്തി. 677.55 പോയിന്റാണ് ഇന്നത്തെ നേട്ടം. നിഫ്റ്റി 227.90 പോയിന്റ് ഉയര്‍ന്ന് 24,946.50ത്തില്‍ ക്ലോസ് ചെയ്തു.

സൂചികകളെല്ലാം ഇന്ന് നേട്ടത്തിലാണ് ക്ലോസ് ചെയ്തത്. ഐ.ടി (1.57), റിയാലിറ്റി (1.32), ഓയില്‍ ആന്‍ഡ് ഗ്യാസ് (1.11) മെറ്റല്‍ (1.07) സെക്ടറുകള്‍ വലിയ നേട്ടമുണ്ടാക്കി. വിപണി കൂടുതല്‍ സ്ഥിരത കാണിക്കുന്നതും ജൂണ്‍ പാദത്തില്‍ മെച്ചപ്പെട്ട സാമ്പത്തിക ക്രയവിക്രയത്തിനാണ് സാക്ഷ്യം വഹിക്കുന്നതെന്ന പ്രതീക്ഷയും കരുത്തായി.

വലിയ സംഘര്‍ഷത്തിലും എണ്ണവില കാര്യമായി ഉയരാത്തതും ഇറാന്‍-ഇസ്രയേല്‍ യുദ്ധത്തില്‍ സമാധാനത്തിനായി ഇടപെടുമെന്ന യു.എസ് പ്രസിഡന്റ് ഡൊണള്‍ഡ് ട്രംപിന്റെ വാക്കുകളും വിപണിക്ക് പോസിറ്റീവ് മനോഭാവം നല്കി.

നേട്ടം കൊയ്തവരും വീണവരും

ഒരുവിധം ഓഹരികള്‍ നേട്ടം കൊയ്ത ദിനത്തില്‍ കൂടുതല്‍ ഉയര്‍ന്നത് സുപ്രീം ഇന്‍ഡസ്ട്രീസ് (6.10), പി.ഐ ഇന്‍ഡസ്ട്രീസ് (4.47), കെ.പി.ഐ.ടി ടെക്‌നോളജീസ് തുടങ്ങിയ ഓഹരികളാണ്.

തിരിച്ചടി നേരിട്ടവരില്‍ മുന്നിലുള്ളത് ടാറ്റ മോട്ടോഴ്‌സ്. 3.76 ശതമാനമാണ് ടാറ്റ മോട്ടോഴ്‌സ് ഓഹരികള്‍ താഴ്ന്നത്. ടാറ്റാ മോട്ടോഴ്‌സിന് കീഴിലുള്ള ബ്രിട്ടീഷ് ആഡംബര കാര്‍ നിര്‍മാണ കമ്പനിയായ ജാഗ്വര്‍ ലാന്‍ഡ് റോവറിന്റെ ഈ സാമ്പത്തിക വര്‍ഷത്തെ പ്രകടനം പ്രതീക്ഷിച്ച നിലവാരത്തില്‍ താഴെയാകുമെന്ന വിലയിരുത്തലാണ് തിരിച്ചടിയായത്. അദാനി പവര്‍ ഓഹരികളും ഇന്ന് നേരിയ നഷ്ടത്തിലാണ് വ്യാപാരം അവസാനിപ്പിച്ചത്, 1.33 ശതമാനം.

കേരള കമ്പനികളുടെ പ്രകടനം

കഴിഞ്ഞ ദിവസങ്ങളിലെ അനുകൂല തരംഗത്തില്‍ കുതിച്ച മുത്തൂറ്റ് ഫിനാന്‍സിന് ഇന്നും നേട്ടമായിരുന്നു. 1.32 ശതമാനം ഉയര്‍ന്നാണ് വ്യാപാരം അവസാനിപ്പിച്ചത്. അതേസമയം, മണപ്പുറം ഫിനാന്‍സ് 0.60 ശതമാനം താഴേക്ക് പോയി. വണ്ടര്‍ലാ ഹോളിഡെയ്‌സ് (1.14), വീഗാര്‍ഡ് ഇന്‍ഡസ്ട്രീസ് (0.07) ഓഹരികളും നേട്ടമുണ്ടാക്കി.