ഏഷ്യന് ഓഹരികളില് നിന്ന് വീശിയടിച്ച ഉണര്വിന്റെ കാറ്റ് ഇന്ത്യന് ഓഹരി സൂചികകള്ക്കും നേട്ടമായി. ആഭ്യന്തര തലത്തില് ബാങ്കിംഗ്, വാഹന ഓഹരികളിലുണ്ടായ മികച്ച വാങ്ങല് താത്പര്യവും കരുത്തായതോടെ സെന്സെക്സ് ഇന്ന് 60,000വും നിഫ്റ്റി 17,700 പോയിന്റും ഭേദിച്ചു. 311 പോയിന്റുയര്ന്ന് 60,157ലാണ് വ്യാപാരാന്ത്യം സെന്സെക്സുള്ളത്. നിഫ്റ്റി 98 പോയിന്റ് നേട്ടവുമായി 17,722ലും. തുടര്ച്ചയായ ഏഴാം നാളിലാണ് ഇന്ത്യന് ഓഹരി സൂചികകള് ലാഭത്തോടെ വ്യാപാരം പൂര്ത്തിയാക്കിയത്.
ഇന്ന് ഏറ്റവുമധികം നേട്ടം കുറിച്ച ഓഹരികൾ
കരുത്തായി വാഹനം, ബാങ്കിംഗ്
കഴിഞ്ഞപാദത്തിലെ (ജനുവരി-മാര്ച്ച്) ഉയര്ന്ന വില്പനനേട്ടം വാഹന കമ്പനികളുടെ പ്രവര്ത്തനഫലം മികച്ചതാക്കുമെന്ന റിപ്പോര്ട്ടുകള് ഈ വിഭാഗം ഓഹരികളില് ഇന്ന് മികച്ച വാങ്ങല് താത്പര്യം സൃഷ്ടിച്ചു. വായ്പയിലും നിക്ഷേപത്തിലും മികച്ച വളര്ച്ച കുറിച്ച ബാങ്കിംഗ് ഓഹരികളും നിക്ഷേപകര് ഇന്ന് വന്തോതില് വാങ്ങിക്കൂട്ടി. ഇതോടെ ഈ വിഭാഗം ഓഹരികളുടെ വില കുതിച്ചത് ഓഹരി വിപണിക്ക് നേട്ടമായി.
വിവിധ ഓഹരി വിഭാഗങ്ങളുടെ പ്രകടനം
കോട്ടക് മഹീന്ദ്ര ബാങ്ക്, ഐ.സി.ഐ.സി.ഐ ബാങ്ക്, ബാങ്ക് ഓഫ് ബറോഡ, ബജാജ് ഫിന്സെര്വ്, എസ്.ബി.ഐ., എച്ച്.ഡി.എഫ്.സി., എച്ച്.ഡി.എഫ്.സി ബാങ്ക്, ബജാജ് ഓട്ടോ, മാരുതി സുസുക്കി, ഐഷര് മോട്ടോഴ്സ്, റിലയന്സ് ഇന്ഡസ്ട്രീസ്, ജെ.എസ്.ഡബ്ല്യു സ്റ്റീല്, ടാറ്റാ സ്റ്റീല് എന്നിവയാണ് ഇന്ന് നേട്ടമുണ്ടാക്കിയ പ്രമുഖര്. എച്ച്.സി.എല് ടെക്, വിപ്രോ, ഇന്ഫോസിസ്, ടി.സി.എസ്, ടെക് മഹീന്ദ്ര എന്നീ ഐ.ടി കമ്പനികളും ഏഷ്യന് പെയിന്റ്സും നഷ്ടം നേരിട്ട പ്രമുഖരാണ്.
ഐ.ടിക്ക് ക്ഷീണം
ഐ.ടി ഓഹരികളാണ് ഇന്ന് ഓഹരി വിപണിയില് തളര്ച്ച നേരിട്ടത്. പ്രമുഖ ഐ.ടി കമ്പനികളുടെയെല്ലാം മാര്ച്ചുപാദ പ്രവര്ത്തനഫലം ഉടന് പുറത്തുവരും. അമേരിക്ക, യൂറോപ്പ് എന്നിവിടങ്ങളിലെ ബാങ്കിംഗ് പ്രതിസന്ധി ഈ കമ്പനികളുടെ വരുമാനത്തെ ബാധിച്ചിരുന്നു. ഇത് പ്രവര്ത്തനഫലം മോശമാകുമെന്ന ആശങ്ക സൃഷ്ടിച്ചതാണ് കമ്പനികളുടെ ഓഹരികളെ തളര്ത്തിയത്. ഇന്ന് ഐ.ടി സൂചിക ഒരു ശതമാനം ഇടിഞ്ഞു.
ഇന്ന് കൂടുതൽ നഷ്ടം കുറിച്ചവ
വാഹനം, ബാങ്ക്, ലോഹം, ഊര്ജം, ഓയില് ആന്ഡ് ഗ്യാസ് എന്നിവ ഒരു ശതമാനം വീതം നേട്ടമുണ്ടാക്കി. ബി.എസ്.ഇ മിഡ്ക്യാപ്പ് സൂചിക ഒരു ശതമാനവും സ്മോള്ക്യാപ്പ് സൂചിക 0.6 ശതമാനവും ഉയര്ന്നു. സെന്സെക്സില് 2,244 കമ്പനികളുടെ ഓഹരികള് ഇന്ന് നേട്ടമുണ്ടാക്കി. 1,303 കമ്പനികളുടെ ഓഹരിവില ഇടിഞ്ഞു. 112 കമ്പനികളുടെ ഓഹരിവിലയില് മാറ്റമില്ല.
വണ്ടര്ലയ്ക്കും വെര്ട്ടെക്സിനും മികച്ചനേട്ടം
കേരള കമ്പനികളുടെ ഇന്നത്തെ പ്രകടനം
ഇന്ന് കേരളം ആസ്ഥാനമായുള്ള 16 കമ്പനികള് നേട്ടമുണ്ടാക്കി. വണ്ടര്ല ഹോളിഡെയ്സ് 5.18 ശതമാനവും വെര്ട്ടെക്സ് സെക്യൂരിറ്റീസ് 4.63 ശതമാനവും നേട്ടം രേഖപ്പെടുത്തി. കൊച്ചിന് മിനറല്സ് ആന്ഡ് റൂട്ടൈല്സ്, കൊച്ചിന് ഷിപ്പ്യാര്ഡ്, സി.എസ്.ബി ബാങ്ക്, ധനലക്ഷ്മി ബാങ്ക്, ഫെഡറല് ബാങ്ക്, കിറ്റെക്സ്, കെ.എസ്.ഇ തുടങ്ങിയ ഓഹരികളും നേട്ടത്തിലാണ് വ്യാപാരം പൂര്ത്തിയാക്കിയത്. അപ്പോളോ ടയേഴ്സ്, ആസ്റ്റര് ഡി.എം ഹെല്ത്ത്കെയര്, ജിയോജിത്, ഹാരിസണ് മലയാളം എന്നിവ നഷ്ടം രേഖപ്പെടുത്തി.
Read DhanamOnline in English
Subscribe to Dhanam Magazine