വിപണി ചുവപ്പില്‍ തന്നെ, നിഫ്റ്റി 23,700ന് താഴെ, പ്രതിരോധ ഓഹരികളില്‍ വന്‍കുതിപ്പ്, ചെമ്പ് സര്‍വകാല റെക്കോഡില്‍

ഇന്ത്യൻ ഓഹരി വിപണി വീണ്ടും താഴ്ചയിലാണ്. ബെഞ്ച്മാർക്ക് സൂചികകളായ സെൻസെക്സ് 76,000-നും നിഫ്റ്റി 23,700-നും താഴെയായി. ഓഗസ്റ്റ് മൂന്നിലെ നിലയിൽ നിന്നു നിഫ്റ്റി സൂചിക 1,100 പോയിൻ്റ് ഇടിഞ്ഞു. ബാങ്ക്, ധനകാര്യം, റിയൽറ്റി, ഓയിൽ, കൺസ്യൂമർ ഡ്യുറബിൾസ്, ഓട്ടോ തുടങ്ങിയ പ്രധാന സെക്ടറുകളിൽ തിരിച്ചടി നേരിട്ടു. അതേസമയം മീഡിയ, മെറ്റൽ തുടങ്ങിയ സെക്ടറുകൾ നേട്ടം ഉണ്ടാക്കി.

പ്രതിരോധ ഓഹരികൾ രാവിലെ മികച്ച നേട്ടത്തിലായി. ഡാറ്റ പാറ്റേൺസ്, ഭാരത് എർത്ത് മൂവേഴ്സ്, അപ്പോളോ മൈക്രോ തുടങ്ങിയവ നാലു ശതമാനത്തിലധികം കുതിച്ചു. പരസ് ഡിഫൻസ് & സ്പേസ് ടെക്നോളജീസ്, എംടാർ ടെക്നോളജീസ്, സെൻടെക് തുടങ്ങിയവയും വലിയ നേട്ടം ഉണ്ടാക്കി.

ഹിന്ദുസ്ഥാൻ എയ്റോനോട്ടിക്സ് ലിമിറ്റഡിന് സി.എൽ.എസ്.എ 5,841 രൂപ ലക്ഷ്യവിലയായി നിർണയിച്ചു വാങ്ങൽ ശിപാർശ നൽകി. ഇതോടെ വ്യാപാരത്തിന്റെ തുടക്കത്തിൽ ഓഹരിയുടെ വില മൂന്നര ശതമാനം വരെ ഉയർന്നു. ഐ.സി.ഐ.സി.ഐ ബാങ്കിനു വാങ്ങൽ ശിപാർശ നൽകിയ ഗോൾഡ്മാൻ സാക്സ് ലക്ഷ്യവില 2,000 രൂപയായി ഉയർത്തി. ഓഹരി വില ഒരു ശതമാനത്തിലധികം താഴ്ന്നു.

രാജസ്ഥാനിൽ വലിയ ട്രാൻസ്മിഷൻ സിസ്റ്റത്തിൻ്റെ നിർമാണത്തിനുള്ള 13,000 കോടി രൂപയുടെ കരാർ ജി.ഇ വെർണോവയ്ക്കു ലഭിക്കുമെന്ന് വ്യക്തമായിട്ടുണ്ട്. ഓഹരിക്ക് നൊമുറ 6,000 രൂപ ലക്ഷ്യവില നിർണയിച്ചു വാങ്ങൽ ശിപാർശ നൽകി. ഓഹരി വില രാവിലെ ഏഴു ശതമാനം കുതിച്ചുയർന്നു.

ഏറോ സ്പേസ്, പ്രതിരോധ മേഖലകളിൽ പ്രവർത്തിക്കുന്ന സൻസേര എൻജിനിയറിംഗിന്, സി.എൽ.എസ്.എ വാങ്ങൽ ശിപാർശ നൽകി. 4,951 രൂപ ലക്ഷ്യവിലയായി നിശ്ചയിച്ചു. ഓഹരി വില നാലു ശതമാനം ഉയർന്നു.

ചെമ്പ് വില ലോകവിപണിയിൽ റെക്കോഡിനു സമീപം എത്തിയതിനെ തുടർന്നു ഹിന്ദുസ്ഥാൻ കോപ്പറിന്റെ ഓഹരി വില മൂന്നു ശതമാനത്തിലധികം കയറി.

ആദ്യ രണ്ടു ദിവസം കൊണ്ടു 150 ശതമാനം കുതിച്ച ഇ.എസ്.ഡി.എസ് സോഫ്റ്റ്‌‍വേർ സൊലൂഷൻ ഇന്നും 20 ശതമാനം ഉയർന്നു. പിന്നീട് അല്പം കുറഞ്ഞ് 1,200 രൂപയായി. ചോയിസ് ഇൻസ്റ്റിറ്റ്യൂഷണൽ ഇക്വിറ്റീസ് ഓഹരിക്ക് 1,550 രൂപ ലക്ഷ്യവില നിശ്ചയിച്ചു.

എയർ കണ്ടീഷണർ അടക്കമുള്ളവയുടെ ഘടകവസ്തുകളുടെ വിലവർധനയ്ക്കനുസരിച്ച് ഉൽപന്ന വില കൂട്ടാൻ സാധിക്കുന്നില്ലെന്നു വിശദീകരിച്ച ബ്ലൂ സ്റ്റാറിൻ്റെ ഓഹരി വില മൂന്നു ശതമാനത്തിലധികം ഇടിഞ്ഞു. ഡാറ്റ സെൻ്റർ ബിസിനസിൽ കമ്പനി വലിയ അവസരം പ്രതീക്ഷിക്കുന്നുണ്ട്.

രൂപ ഇന്നു ചെറിയ നഷ്ടത്തോടെ വ്യാപാരം തുടങ്ങി. ഡോളർ രണ്ടു പൈസ കൂടി 94.51 രൂപയിൽ ഓപ്പൺ ചെയ്തു. പിന്നീടു ഡോളർ 94.68 രൂപയിലേക്കു കയറി. സ്വർണം ലോകവിപണിയിൽ ഉയർന്ന് ഔൺസിന് 4,443 ഡോളറിൽ എത്തി. കേരളത്തിൽ 22 കാരറ്റ് സ്വർണം പവന് 880 രൂപ വർധിച്ച് 1,13,920 രൂപയായി. ക്രൂഡ് ഓയിൽ വില വീണ്ടും കയറി. ബ്രെൻ്റ് ഇനം ക്രൂഡ് ഓയിൽ 97.58 ഡോളറിലും ഡബ്ള്യു.ടി.ഐ ഇനം ക്രൂഡ് ഓയിൽ 92.84 ഡോളറിലും എത്തി.