ആഗോള സാഹചര്യം മെച്ചപ്പെട്ടതോടെ ഇന്ത്യന് വിപണി ഇന്ന് നല്ല നേട്ടത്തില് വ്യാപാരം തുടങ്ങി. പിന്നീടു കൂടുതല് ഉയര്ന്നു. അരശതമാനം ഉയര്ന്ന് മുഖ്യ സൂചികകള് വ്യാപാരം തുടങ്ങി. പിന്നീട് 0.90 ശതമാനം നേട്ടത്തിലേക്കു കയറി.
ബാങ്ക് നിഫ്റ്റി ഒന്നര ശതമാനം വരെ ഉയര്ന്നു. മിഡ് ക്യാപ്, സ്മോള് ക്യാപ് സൂചികകള് ഒന്നര ശതമാനം വരെ കയറി.
എഫ്എംസിജി ഒഴികെ എല്ലാ മേഖലകളും നല്ല നേട്ടത്തിലാണ്.
വരുമാനവും ലാഭവും ഇടിഞ്ഞതിനെ തുടര്ന്ന് തോമസ് കുക്ക് ഇന്ത്യ ഓഹരി എട്ടു ശതമാനം താഴ്ന്നു.
റിസല്ട്ട് മോശമായത് പവര് ഗ്രിഡിനെ അഞ്ചു ശതമാനം താഴ്ത്തി.
അമേരിക്ക ചുങ്കം ചുമത്തല് നീട്ടിവച്ചതിനെ തുടര്ന്ന് സോണാ ബിഎല്ഡബ്ല്യു പ്രസിഷനും സംവര്ധന മദര്സണും ഏഴു ശതമാനത്തിലധികം കുതിച്ചു.
ലാഭമാര്ജിനില് കുതിപ്പു കാണിച്ച കാസ്ട്രോള് ഇന്ത്യ എട്ടു ശതമാനത്തോളം ഉയര്ന്നു.
പ്രതീക്ഷയിലും മോശം റിസല്ട്ട് ടാറ്റാ കെമിക്കല്സിനെ അഞ്ചു ശതമാനം താഴ്ത്തി.
മികച്ച ലാഭവളര്ച്ച എന്എല്സി ഇന്ത്യ ഓഹരിയെ പത്തു ശതമാനം ഉയര്ത്തി.
രൂപ ഇന്നു മെച്ചപ്പെട്ടു. ഡോളര് 16 പൈസ കുറഞ്ഞ് 87.03 രൂപയില് ഓപ്പണ് ചെയ്തു. പിന്നീട് 87.01 രൂപ വരെ താഴ്ന്ന ഡോളര് 87.05 രൂപയിലേക്കു കയറി.
സ്വര്ണം ലോകവിപണിയില് ഔണ്സിന് 2820 ഡോളറിലാണ്. കേരളത്തില് സ്വര്ണം പവന് 840 രൂപ ഉയര്ന്ന് 62,480 രൂപ എന്ന റെക്കോര്ഡില് എത്തി.
ക്രൂഡ് ഓയില് അല്പം താഴ്ന്നു. ബ്രെന്റ് ഇനം ബാരലിന് 75.60 ഡോളര് ആയി.
Read DhanamOnline in English
Subscribe to Dhanam Magazine