സെൻസെക്സ് 78,000 കവിഞ്ഞും നിഫ്റ്റി 24,400 കടന്നും വിപണി മുന്നേറ്റം തുടരുമ്പോഴും, ഒന്നാം പാദ വളർച്ച പ്രതീക്ഷയിൽ താഴെയായതിനെ തുടർന്ന് കൊട്ടക് മഹീന്ദ്ര ബാങ്ക് ഓഹരി മൂന്നു ശതമാനത്തിലധികം ഇടിഞ്ഞു. രൂപ നേരിയ നഷ്ടത്തോടെ 95.23ൽ തുറന്ന് 95.34 വരെ കയറി. ലോക വിപണിയിൽ സ്വർണം ഔൺസിന് 4165 ഡോളറിലേക്കും കേരളത്തിൽ പവന് 1,07,520 രൂപയിലേക്കും താഴ്ന്നു.
നാലാം ദിവസവും നേട്ടത്തോടെ വ്യാപാരം തുടങ്ങിയ വിപണി പിന്നീടു നേട്ടം വർധിപ്പിച്ചു. രാവിലെ നിഫ്റ്റി 24,403.05 ഉം സെൻസെക്സ് 78,194.36 ഉം വരെ കയറി.
റിയൽറ്റി, മെറ്റൽ, ബാങ്ക്, ധനകാര്യ, ഓട്ടോ മേഖലകൾ രാവിലെ നല്ല നേട്ടം ഉണ്ടാക്കി.
കഴിഞ്ഞ ദിവസം ഉയർന്ന ഐടി ഇന്നു താഴ്ചയിലായി. ഐടി കമ്പനികളുടെ പിഇ അനുപാതം ഇനിയും താഴേണ്ടതുണ്ട് എന്നാണു വിദേശ നിക്ഷേപ സ്ഥാപനങ്ങൾ കണക്കാക്കുന്നത്.
എംഡി/സിഇഒ പീറ്റർ ബെയിൻസ് രാജി വച്ചതിനെ തുടർന്ന് സിദ്ധാർഥ് മിത്തൽ സിൻജീൻ ഇൻ്റർനാഷണലിൻ്റെ എംഡി/ സിഇഒ ആയി. ഓഹരി രണ്ടു ശതമാനം താഴ്ന്നു.
മണപ്പുറം ജനറൽ ഫിനാൻസ് സിഇഒ ദീപക് റെഡ്ഡി രാജി പ്രഖ്യാപിച്ചു. ഡിസംബർ 31 നാണു വിരമിക്കുക. ഓഹരി ഒന്നര ശതമാനം കയറി.
ആയുധങ്ങളും ഉപകരണങ്ങളും വാങ്ങാൻ 52,000 കോടി രൂപയുടെ പദ്ധതി കേന്ദ്ര സർക്കാർ അനുവദിച്ചത് പ്രതിരോധ മേഖലയിലെ കമ്പനികൾക്കു നേട്ടമായി. നിഫ്റ്റി പ്രതിരോധ സൂചിക 1.55 ശതമാനം ഉയർന്നു. സെൻടെക് ആറും പരസ് അഞ്ചും ശതമാനത്തിലധികം കയറി. കൊച്ചിൻ ഷിപ്പ് യാർഡ് ഒരു ശതമാനം ഉയർന്നു. ഭാരത് ഇലക്ട്രോണിക്സും ഭാരത് ഡൈനാമിക്സും മൂന്നു ശതമാനത്തോളം നേട്ടം ഉണ്ടാക്കി.
ഇൻവെസ്ടെക്, ഡിക്സൺ ടെക്നോളജീസിനു വാങ്ങൽ ശിപാർശ നൽകി. ലക്ഷ്യവില 16,200 രൂപയായി ഉയർത്തി.
ഇൻഡസ് ഇൻഡ് ബാങ്കിനു സിറ്റി ഗ്രൂപ്പ് വിൽപന ശിപാർശ ചെയ്തു. ലക്ഷ്യവില 800 രൂപ. ഓഹരി ഒരു ശതമാനം ഉയർന്നു.
മികച്ച ഒന്നാം പാദ പ്രകടനത്തെ തുടർന്ന് എച്ച്ഡിഎഫ്സി ബാങ്കിൻ്റെ ലക്ഷ്യവില ജെഫറീസ് 1050 രൂപയായി ഉയർത്തി. ബാങ്ക് ഓഹരി ഇന്നു 2.55 ശതമാനം കയറി 100 ദിവസ മൂവിംഗ് ശരാശരിക്കു മുകളിൽ കയറി.
ഒന്നാം പാദ ബിസിനസ് വളർച്ച പ്രതീക്ഷയിലും കുറവായതിനെ തുടർന്ന് കൊട്ടക് മഹീന്ദ്ര ബാങ്ക് ഓഹരി മൂന്നു ശതമാനത്തിലധികം താഴ്ന്നു.
രൂപ ഇന്നു നേരിയ നഷ്ടത്തോടെ വ്യാപാരം തുടങ്ങി. ഡോളർ രണ്ടു പൈസ കൂടി 95.23 രൂപയിൽ ഓപ്പൺ ചെയ്തു. ഡോളർ പിന്നീട് 95.34 രൂപ വരെ കയറി.
സ്വർണം ലോക വിപണിയിൽ ഔൺസിന് 4165 ഡോളറിലേക്കു താഴ്ന്നു. കേരളത്തിൽ 22 കാരറ്റ് സ്വർണം പവന് 80 രൂപ കുറഞ് 1,07,520 രൂപ ആയി.
ക്രൂഡ് ഓയിൽ വില അല്പം താഴ്ന്നു. ബ്രെൻ്റ് ഇനം 71.71 ഡോളറിലും ഡബ്ള്യുടിഐ ഇനം 65.41 ഡോളറിലും എത്തി.
Read DhanamOnline in English
Subscribe to Dhanam Magazine