യുദ്ധഭീതിയിൽ ഇന്ത്യൻ വിപണി ഇടിയുന്നു.
ഉയർന്നു വ്യാപാരം തുടങ്ങി പിന്നീട് കൂടുതൽ ഉയർന്ന ശേഷമാണ് ഇന്ത്യൻ വിപണി നഷ്ടത്തിലേക്കു മാറിയത്. രാവിലെ മുക്കാൽ മണിക്കൂറിനുള്ളിൽ നിഫ്റ്റി 24,365 വരെ ഉയരുകയും 23,950 വരെ താഴുകയും ചെയ്തു. സെൻസെക്സ് 79,000 നു താഴെയായി.
ഇനിയും താഴാം എന്നാണു സൂചന. പാക് അതിർത്തിയിലെ സംഘർഷം കൂടുതൽ രൂക്ഷമാകുന്നതാണു വിപണിയെ താഴ്ത്തുന്നത്.
ബാങ്ക് നിഫ്റ്റി ഒരു ശതമാനം താഴ്ചയിലായി. ആദ്യം നല്ല നേട്ടത്തിലായിരുന്ന മിഡ് ക്യാപ്, സ്മോൾ ക്യാപ് സൂചികകൾ മൂന്നു ശതമാനത്താേളം താഴ്ചയിൽ എത്തി.
അമേരിക്കയിൽ ടെക്നോളജി ഓഹരികൾ ഇന്നലെ ഗണ്യമായി ഉയർന്ന സാഹചര്യത്തിൽ ഇന്ത്യൻ ഐടി ഓഹരികൾ മികച്ച നേട്ടം കാണിച്ചു. ടിസിഎസ്, ഇൻഫോസിസ്, എച്ച്സിഎൽ തുടങ്ങിയവ രണ്ടു ശതമാനത്തിലധികം കയറി. എന്നാൽ മികച്ച റിസൽട്ട് പുറത്തുവിട്ട ടെക് മഹീന്ദ്ര ഓഹരി മൂന്നു ശതമാനം താഴ്ന്നു.
മാക്രോടെക്, ഓബറോയ്, ശോഭ, പുറവങ്കര തുടങ്ങിയവ അടക്കം റിയൽറ്റി ഓഹരികൾ ഇന്നു വലിയ താഴ്ചയിലാണ്.
കയറ്റുമതി രംഗത്തുള്ള ഫാർമ കമ്പനികളും മൂന്നു ശതമാനത്തിലധികം നഷ്ടത്തിലായി.
പ്രതീക്ഷയിലും മികച്ച നാലാം പാദ റിസൽട്ടിനെ തുടർന്ന് എസ്ബിഐ ലൈഫ് ഏഴര ശതമാനം വരെ ഉയർന്നു. പ്രവർത്തനച്ചെലവ് വർധിച്ചത് എസ്ബിഐ കാർഡ്സ് ഓഹരിയെ അഞ്ചു ശതമാനം താഴ്ത്തി.
റിസൽട്ട് വളരെ മികച്ചതായെങ്കിലും ആക്സിസ് ബാങ്ക് ഓഹരി മൂന്നു ശതമാനത്തിലധികം താഴ്ന്നു.
പ്രതീക്ഷയിലും മോശമായ റിസൽട്ട് സിയൻ്റ് ഓഹരിയെ അഞ്ചു ശതമാനം താഴ്ത്തി.
ചൈന ഇന്ത്യയിലേക്ക് അപൂർവ ധാതുക്കളുടെ കയറ്റുമതി വിലക്കിയത് ഇലക്ട്രിക് വാഹന നിർമാതാക്കൾക്ക് ആഘാതമായി. ടാറ്റാ മോട്ടോഴ്സും മഹീന്ദ്രയും ഗണ്യമായി താഴ്ന്നു.
കൊച്ചിൻ ഷിപ്പ് യാർഡ് നാലും ഫാക്ട് മൂന്നരയും ശതമാനം ഇടിഞ്ഞു.
രൂപ ഇന്നും ഉയർന്നു. ഡോളർ എട്ടു പൈസ കുറഞ്ഞ് 85.18 രൂപയിൽ വ്യാപാരം തുടങ്ങി. പിന്നീട് 85.10 രൂപയായി. ഡോളർ സൂചിക 99.62 വരെ ഉയർന്നിട്ടുണ്ട്.
സ്വർണം ലോകവിപണിയിൽ ഇന്നു രാവിലെ അര ശതമാനം താഴ്ന്ന് 3321 ഡോളറിൽ എത്തി. കേരളത്തിൽ വില മാറ്റം ഇല്ലാതെ ആഭരണസ്വർണം പവന് 72,040 രൂപയിൽ തുടർന്നു.
ക്രൂഡ് ഓയിൽ വില സാവധാനം കയറുകയാണ്. ബ്രെൻ്റ് ഇനം ബാരലിന് 66.93 ഡോളറിൽ എത്തി.
Stock market midday update on 25 april 2025.
Read DhanamOnline in English
Subscribe to Dhanam Magazine