ഡോളറിനെതിരെ 90 കടന്ന് രൂപ; വിപണികൾ ഇടിയുന്നു, എഫ്.എം.സി.ജി, കൺസ്യൂമർ ഡ്യുറബിൾസ്, പി.എസ്.യു ബാങ്ക് ഓഹരികള്‍ താഴ്ചയില്‍

രൂപയും ഇന്ത്യൻ ഓഹരികളും താഴുകയാണ്. ഡോളർ 90 രൂപയ്ക്കു മുകളിൽ എത്തി. നിഫ്റ്റി 25,897 വരെയും സെൻസെക്സ് 84,763 വരെയും താഴ്ന്നു. ഐടിയും മീഡിയയും ഒഴികെ എല്ലാ മേഖലകളും ഇടിവിലായി. മിഡ് ക്യാപ്, സ്മോൾ ക്യാപ് ഓഹരികളും താഴേക്കു പതിച്ചു.

രൂപ ഇനിയും താഴുമെന്നാണു സൂചന. രൂപയുടെ താഴ്ച ഓഹരികളെയും താഴ്ത്തും.

രൂപ ഇന്നു ഗണ്യമായി താഴ്ന്നാണു വ്യാപാരം തുടങ്ങിയത്. ഡോളർ 12 പൈസ കൂടി 89.97 രൂപയിൽ ഓപ്പൺ ചെയ്തു. ഒരു മിനിറ്റിനകം ഡോളർ 90.07 രൂപയിലേക്കു കയറി. പിന്നീട് 90.14 രൂപയിൽ എത്തി. റിസർവ് ബാങ്ക് ഡോളർ വിറ്റതിനെ തുടർന്ന് 89.97 രൂപ വരെ ഡോളർ താഴ്ന്നു. വീണ്ടും രൂപ ദുർബലമായി. ഡോളർ 90.15 രൂപയിലേക്കു കയറി. ചൈനീസ് യുവാൻ 12.74 രൂപയിലേക്കും യൂറോ 104.87 രൂപയിലേക്കും ബ്രിട്ടീഷ് പൗണ്ട് 119.24 രൂപയിലേക്കും ഉയർന്നു.

രൂപയുടെ വീഴ്ച ഐടി, ഫാർമസ്യൂട്ടിക്കൽ എന്നിവയടക്കം കയറ്റുമതി വരുമാനമുള്ള കമ്പനികളെ ഉയർത്തി. ഇവയ്ക്കു ഡോളറിലുള്ള വരുമാനം രൂപയിലേക്കു മാറ്റുമ്പോൾ കൂടുതൽ വല്ലതാകും എന്നതുകൊണ്ടാണ് ഇത്.

എഫ്എംസിജി, കൺസ്യൂമർ ഡ്യുറബിൾസ്, പി എസ് യു ബാങ്ക്, വാഹനങ്ങൾ തുടങ്ങിയവ താഴ്ചയിലായി. ഹിന്ദുസ്ഥാൻ യൂണിലീവർ മൂന്നു ശതമാനത്തോളം ഇടിഞ്ഞു. നെസ്‌ലെ, വരുൺ ബിവറേജസ്, കോൾഗേറ്റ്, ടാറ്റാ കൺസ്യൂമർ, ഇമാമി തുടങ്ങിയവ രണ്ടു ശതമാനത്തോളം താഴ്ന്നു.

പൊതുമേഖലാ ബാങ്കുകളിലെ വിദേശനിക്ഷേപ പരിധി കൂട്ടുന്നതു സർക്കാർ പരിഗണിക്കുന്നില്ലെന്ന സർക്കാർ വിശദീകരണം പൊതുമേഖലാ ബാങ്ക് ഓഹരികളെ മൂന്നു ശതമാനം വരെ താഴ്ത്തി. ഇന്ത്യൻ ബാങ്ക് നാലും പഞ്ചാബ് നാഷണൽ ബാങ്ക് മൂന്നും ശതമാനം വരെ താണു. ബാങ്ക് ഓഫ് മഹാരാഷ്ട്രയും കനറാ ബാങ്കും ബാങ്ക് ഓഫ് ഇന്ത്യയും ബാങ്ക് ഓഫ് ബറോഡയും ഐഡിബിഐ ബാങ്കും ഒന്നര ശതമാനം താഴ്ചയിലായി.

നവംബറിലെ ബിസിനസ് വളർച്ച പ്രതീക്ഷിച്ചത്ര വരാത്തതിനെ തുടർന്ന് ഏഞ്ചൽ വൺ ഓഹരി ആറു ശതമാനത്തോളം താഴ്ന്നു.

റിലയൻസിന് 1805 രൂപ ലക്ഷ്യവില ഇട്ട് വിദേശ ബാങ്ക് സിറ്റി വാങ്ങൽ ശിപാർശ നൽകി. ഇൻഡസ് ടവേഴ്‌സിന് സിറ്റി 500 രൂപ ലക്ഷ്യവില നിശ്ചയിച്ചു.

പ്രതിരോധ ഓഹരികൾ ഇന്നും നഷ്ടത്തിലായി. ഭാരത് ഫോർജ്, മിശ്ര ധാതു നിഗം, അസ്ത്ര മൈക്രോ,

ഡൈനാമാറ്റിക് ടെക്നോളജീസ് തുടങ്ങിയവ രണ്ടു ശതമാനത്തോളം താഴ്ന്നു

സ്വർണം ലോകവിപണിയിൽ 4224 ഡോളറിലേക്കു കയറി. കേരളത്തിൽ 22 കാരറ്റ് സ്വർണം പവന് 520 രൂപ കൂടി 95,760 രൂപയിൽ എത്തി.

ക്രൂഡ് ഓയിൽ വില അൽപം താഴ്ന്നു. ബ്രെൻ്റ് ഇനം ക്രൂഡ് വീപ്പയ്ക്ക് 62.42 ഡോളർ ആയി.

_{Stock market midday update on 3 december 2025.}