പോസിറ്റീവ് മനോഭാവത്തില്‍ പ്രതീക്ഷയര്‍പ്പിച്ച് വിപണി, ഏഷ്യന്‍ വിപണികള്‍ രാവിലെ താഴ്ചയില്‍; ക്രൂഡ് വിലയിലും ഇടിവ്

ഇന്ത്യന്‍ ഓഹരി വിപണികള്‍ ഇന്ന് നേരിയ പോസിറ്റീവ് സൂചനകളോടെയാണ് വ്യാപാരം ആരംഭിക്കാനിടയുള്ളത്. ഗിഫ്റ്റ് നിഫ്റ്റിയില്‍ കാണുന്ന ചെറിയ ഉയര്‍ച്ച ഇതിന് പിന്തുണ നല്‍കുന്നു. എന്നിരുന്നാലും, സാങ്കേതിക ഘടനകള്‍ സൂചിപ്പിക്കുന്നത് വിപണി സൂക്ഷ്മതയോടെയും ഒരു പരിധിക്കുള്ളിലുമുള്ള തുടക്കമായിരിക്കുമെന്നാണ്. നിഫ്റ്റി 25,880 എന്ന നിലയില്‍ ശക്തമായ പിന്തുണ നിലനില്‍ക്കുന്നു. ഈ നിലയ്ക്ക് മുകളിലായി നിഫ്റ്റി നിലനില്‍ക്കുകയാണെങ്കില്‍ ചെറിയ ഏകീകരണമോ അല്ലെങ്കില്‍ നേരിയ തിരിച്ചുവരവോ ഉണ്ടാകാം. എന്നാല്‍ ഈ പിന്തുണ തകര്‍ന്നാല്‍ കൂടുതല്‍ വില്‍പ്പന സമ്മര്‍ദ്ദത്തിന് വഴിവെക്കാന്‍ സാധ്യതയുണ്ട്.

വിപണി അവലോകനം

മുന്‍ സെഷനില്‍ ഉയര്‍ന്ന നിലകളില്‍ ലാഭമെടുക്കല്‍ (പ്രോഫിറ്റ് ബുക്കിംഗ്) ശക്തമായതോടെ ഇന്ത്യന്‍ ഓഹരി വിപണികള്‍ ചെറിയ നഷ്ടത്തിലാണ് വ്യാപാരം അവസാനിപ്പിച്ചത്. ബിഎസ്ഇ സെന്‍സെക്‌സ് 20.46 പോയിന്റ് (0.02%) നഷ്ടത്തോടെ 84,675.08ല്‍ ക്ലോസ് ചെയ്തു. നിഫ്റ്റി 50 സൂചിക 3.25 പോയിന്റ് (0.01%) താഴ്ന്ന് 25,938.85ലാണ് വ്യാപാരം അവസാനിപ്പിച്ചത്.

നിഫ്റ്റി നെഗറ്റീവ് തുടക്കമായിരുന്നു; 25,940.90ല്‍ ആരംഭിച്ച സൂചിക പ്രാരംഭ വ്യാപാരത്തില്‍ ഉയര്‍ന്ന് 25,976.75 എന്ന ദിവസത്തെ ഉയര്‍ന്ന നില പരീക്ഷിച്ചു. എന്നാല്‍ ഉയര്‍ന്ന നിലകളില്‍ വില്‍പ്പന സമ്മര്‍ദ്ദം വര്‍ധിച്ചതോടെ സൂചിക 25,878 എന്ന ദിവസത്തെ താഴ്ന്ന നിലയിലേക്ക് ഇടിഞ്ഞു.

മെറ്റല്‍, പിഎസ്യു ബാങ്ക്, ഓട്ടോ ഓഹരികളാണ് മികച്ച നേട്ടം കൈവരിച്ചത്. അതേസമയം റിയല്‍റ്റി, ഐടി, എഫ്എംസിജി മേഖലകളില്‍ ശ്രദ്ധേയമായ വില്‍പ്പന സമ്മര്‍ദ്ദം രേഖപ്പെടുത്തി.

ബാങ്ക് നിഫ്റ്റി

ബാങ്ക് നിഫ്റ്റി 238.90 പോയിന്റ് (0.41%) ഉയര്‍ന്ന് 59,171.25ല്‍ ക്ലോസ് ചെയ്തു. തിരഞ്ഞെടുത്ത ബാങ്കിംഗ് ഓഹരികളില്‍ പോസിറ്റീവ് പ്രവണത നിലനില്‍ക്കുന്നതാണ് ഇത് സൂചിപ്പിക്കുന്നത്.

എന്നിരുന്നാലും, ടെക്നിക്കല്‍ തലത്തില്‍ മൊമെന്റം ഇന്‍ഡിക്കേറ്ററുകളും മൂവിങ് അവറേജുകളും ഇപ്പോഴും സൂക്ഷ്മമായ സമീപനമാണ് നിര്‍ദേശിക്കുന്നത്. 59,000 എന്ന നിലയാണ് അടുത്തുള്ള ഇന്‍ട്രാഡേ പിന്തുണ. ഈ നിലയ്ക്ക് മുകളിലായി സൂചിക നിലനില്‍ക്കുന്നിടത്തോളം പോസിറ്റീവ് പ്രവണത തുടരാന്‍ സാധ്യതയുണ്ട്. അടുത്തുള്ള ഇന്‍ട്രാഡേ പ്രതിരോധം 59,150 എന്ന നിലയിലാണ് കാണുന്നത്.

വിദേശ നിക്ഷേപകര്‍

വിദേശ നിക്ഷേപകര്‍ ഇപ്പോഴും വില്പന മനോഭാവത്തിലാണ്. കഴിഞ്ഞ സെഷനില്‍ 3,844.02 കോടി രൂപയുടെ ഓഹരികള്‍ അവര്‍ വിറ്റൊഴിച്ചു. ഈ ഘട്ടത്തില്‍ ആഭ്യന്തര നിക്ഷേപകര്‍ വാങ്ങലുകാരായി എത്തി വിപണിയെ വലിയ പ്രതിസന്ധിയില്‍ നിന്ന് കരകയറ്റി. സ്ഥിരം പാറ്റേണിന് അവസാന സെഷനിലും വലിയ മാറ്റമുണ്ടായില്ലെന്ന് ചുരുക്കം. 6,159.81 കോടി രൂപയുടെ ഓഹരികളാണ് ആഭ്യന്തര നിക്ഷേപകര്‍ വാങ്ങിക്കൂട്ടിയത്. വലിയ താഴ്ചയിലേക്ക് പോകാതിരിക്കാന്‍ സഹായിച്ചത് ഈ ഇടപെടലാണ്.

വിദേശ മാര്‍ക്കറ്റുകള്‍

യുഎസ് മാര്‍ക്കറ്റ് മുന്‍ദിവസത്തേക്കാള്‍ നേരിയ താഴ്ചയിലാണ് ക്ലോസ് ചെയ്തത്. 94.87 പോയിന്റ് ഇടിഞ്ഞ് 48,367.06ല്‍ വ്യാപാരം അവസാനിപ്പിച്ചു.

അതേസമയം, പ്രധാന യൂറോപ്യന്‍ വിപണികള്‍ നേരിയ നേട്ടത്തിലെത്തി. FTSE 100, DAX, and CAC 40 എന്നിവ നേട്ടത്തോടെ ക്ലോസ് ചെയ്തു.

ഏഷ്യന്‍ മാര്‍ക്കറ്റുകളില്‍ വീഴ്ച

ഇന്ന് രാവിലെ ഏഷ്യന്‍ മാര്‍ക്കറ്റുകള്‍ നെഗറ്റീവ് മനോഭാവത്തോടെയാണ് വ്യാപാരം ആരംഭിച്ചത്. ജപ്പാനില്‍ നിക്കെയ് 177 പോയിന്റോളം താഴ്ന്നു. അതേസമയം, ഹോങ്കോംഗ് സെംഗ് 221 പോയിന്റും താഴേക്ക് പോയി.

ക്രൂഡ്ഓയില്‍ താഴേക്ക്

ചെറിയൊരു കയറ്റത്തിനുശേഷം ക്രൂഡ്ഓയില്‍ വില വീണ്ടും താഴേക്കാണ്. ബ്രെന്റ് ക്രൂഡ് വില 61 ഡോളറിലാണ്. ആഗോള തലത്തില്‍ ലഭ്യത കൂടുതലും ഡിമാന്‍ഡ് കുറഞ്ഞതുമായ അവസ്ഥ നീണ്ടുനില്‍ക്കുമെന്നാണ് വിവരം. ഇത് ക്രൂഡ് വിലകളില്‍ വരും വര്‍ഷവും പ്രതിഫലിച്ചേക്കാം.