ആഗോള സാമ്പത്തിക അനിശ്ചിതത്വങ്ങൾക്കിടയിലും ടിസിഎസ് രണ്ടാം പാദത്തിൽ 13,884 കോടി രൂപയുടെ ലാഭം നേടി. എ.ഐ വരുമാനം 29,000 കോടി രൂപ മറികടന്നപ്പോൾ, വരുമാന വളർച്ച 1.3% മാത്രമായി. ചെലവുചുരുക്കൽ നടപടികളും എ.ഐ അധിഷ്ഠിത പദ്ധതികളുമാണ് ലാഭം നിലനിർത്താൻ സഹായിച്ചത്.
ആഗോള സാമ്പത്തിക അനിശ്ചിതത്വങ്ങൾക്കിടയിലും വിദേശ ക്ലയന്റുകൾ തങ്ങളുടെ ഐ.ടി ചെലവഴിക്കലുകൾ അതീവ ജാഗ്രതയോടെ നിയന്ത്രിക്കുന്ന പശ്ചാത്തലത്തിൽ, നടപ്പ് സാമ്പത്തിക വർഷത്തിന്റെ (FY27) രണ്ടാം പാദത്തിൽ (ജൂലൈ–സെപ്റ്റംബർ) വിപണി പ്രവചനങ്ങളെ മറികടക്കുന്ന മികച്ച ലാഭവളർച്ച രേഖപ്പെടുത്തി രാജ്യത്തെ ഏറ്റവും വലിയ ഐ.ടി കമ്പനിയായ ടാറ്റ കൺസൾട്ടൻസി സർവീസസ് (BSE: 532540, NSE: TCS). മുൻ പാദത്തെ അപേക്ഷിച്ച് (QoQ) കമ്പനിയുടെ സംയോജിത അറ്റാദായം (consolidated net profit) 4 ശതമാനം ഉയർന്ന് 13,884 കോടി രൂപയിലെത്തി. എന്നാൽ പ്രവർത്തന വരുമാനത്തിൽ 1.3 ശതമാനത്തിന്റെ നേരിയ ക്രമാനുഗത വളർച്ച മാത്രമാണ് കമ്പനിക്ക് രേഖപ്പെടുത്താൻ സാധിച്ചത് (73,188 കോടി രൂപ).
വാർഷികാടിസ്ഥാനത്തിൽ പരിശോധിക്കുമ്പോൾ ടിസിഎസിന്റെ അറ്റാദായത്തിൽ 15 ശതമാനവും മൊത്തം പ്രവർത്തന വരുമാനത്തിൽ 11.2 ശതമാനവും വീതമുള്ള ശക്തമായ വർധന കാണാൻ സാധിക്കും. എന്നാൽ, മുൻവർഷത്തെ താഴ്ന്ന അടിസ്ഥാന കണക്കുകളുമായുള്ള താരതമ്യം മാറ്റിവെച്ചാൽ, പരമ്പരാഗത കോർ ഐ.ടി സേവന മേഖലയിലെ ഡിമാൻഡ് വളർച്ച ഇപ്പോഴും വളരെ മന്ദഗതിയിലാണെന്നാണ് കമ്പനിയുടെ സമീപകാല പ്രവർത്തന ഫലങ്ങളിൽ നിന്നും വെളിവാകുന്ന സന്ദേശം. ടിസിഎസിന്റെ വളർച്ചാ എഞ്ചിൻ ഇപ്പോൾ പ്രധാനമായും ആശ്രയിക്കുന്നത് എ.ഐ അധിഷ്ഠിത പരിവർത്തന പദ്ധതികളെയാണ്.
മാർക്കറ്റ് അനലിസ്റ്റുകളുടെ രണ്ടാം പാദഫലവുമായി ബന്ധപ്പെട്ട പ്രവചനങ്ങളുടെ ശരാശരി നിലവാരമായ 13,673 കോടി രൂപയേക്കാൾ മികച്ച ലാഭമാണ് ടി.സി.എസ് ഇത്തവണ രേഖപ്പെടുത്തിയത്. ഇക്കഴിഞ്ഞ ജൂൺ പാദത്തിൽ നിയമപരമായ ഒത്തുതീർപ്പുമായി ബന്ധപ്പെട്ട് ഉണ്ടായ 668 കോടി രൂപയുടെ ഒറ്റത്തവണ നഷ്ടം ഇത്തവണ ഇല്ലാതിരുന്നതും ലാഭക്കണക്കുകൾ മെച്ചപ്പെടുന്നതിന് പിന്തുണയേകി.
ടിസിഎസിന്റെ പ്രവർത്തന മാർജിൻ (Operating Margin) 24.0 ശതമാനത്തിലും, അറ്റ മാർജിൻ 19.0 ശതമാനത്തിലും ആരോഗ്യകരമായി തുടരുന്നു.
ആഗോള ക്ലയന്റുകൾ പുതിയ സാങ്കേതിക പദ്ധതികളിൽ വലിയ നിയന്ത്രണം പാലിക്കുമ്പോഴും, കർശനമായ ചെലവുചുരുക്കൽ നടപടികളും കറൻസിയിലെ അനുകൂല വിനിമയ നിരക്കുകളും മികച്ച പ്രവർത്തന നിർവ്വഹണവുമാണ് ഉയർന്ന ലാഭം നിലനിർത്താൻ കമ്പനിയെ സഹായിച്ചത്.
വരുമാന വളർച്ച 1.3 ശതമാനത്തിൽ ഒതുങ്ങുമ്പോൾ അറ്റാദായം 4 ശതമാനം ഉയർന്നത്, പുതിയ ബിസിനസ് വോളിയം വളർച്ചയേക്കാൾ കൂടുതൽ മികച്ച മാർജിൻ സംരക്ഷണമാണ് ടിസിഎസിന്റെ ലാഭക്ഷമതയെ മുന്നോട്ട് നയിക്കുന്നതെന്ന് അടിവരയിടുന്നു.
ജൂൺ-സെപ്റ്റംബർ ത്രൈമാസ കാലയളവിലെ ഏറ്റവും നിർണായകവും ആശാവഹവുമായ ഘടകം ആർട്ടിഫിഷ്യൽ ഇന്റലിജൻസ് (AI) മേഖലയിലെ ടിസിഎസിന്റെ ദ്രുതഗതിയിലുള്ള മുന്നേറ്റമാണ്.
ടി.സി.എസിന്റെ വാർഷിക എ.ഐ വരുമാനം 310 കോടി ഡോളർ (ഏകദേശം 29,000 കോടി രൂപ) എന്ന നിർണായക നാഴികക്കല്ല് പിന്നിട്ടു. ഇത് കമ്പനിയുടെ മൊത്തം വരുമാനത്തിന്റെ 10 ശതമാനത്തിലധികമാണ്.
മുൻ ജൂൺ പാദത്തിൽ ഇത് 260 കോടി ഡോളറും മൊത്തം വരുമാനത്തിന്റെ ഏകദേശം 8.5 ശതമാനവുമായിരുന്നു.
എ.ഐ-നേറ്റീവ് സൊല്യൂഷനുകൾ, എന്റർപ്രൈസ് സംവിധാനങ്ങളുടെ എ.ഐ അധിഷ്ഠിത സമഗ്ര പരിവർത്തനം, ഓട്ടോണമസ് ഗ്ലോബൽ ബിസിനസ് സർവീസുകൾ എന്നിവയ്ക്കുള്ള ഉയർന്ന ആഗോള ഡിമാൻഡാണ് ഈ മികച്ച വളർച്ചയ്ക്ക് പ്രധാന കരുത്തായത്.
സെപ്റ്റംബർ പാദത്തിൽ 960 കോടി ഡോളറിന്റെ (ഏകദേശം 93,000 കോടി രൂപ) പുതിയ കരാറുകൾ (TCV) സ്വന്തമാക്കാൻ ടിസിഎസിന് സാധിച്ചു. മുൻ പാദത്തിലെ 950 കോടി ഡോളറുമായി താരതമ്യം ചെയ്യുമ്പോൾ ഇത് സ്ഥിരത പുലർത്തുന്നുണ്ടെങ്കിലും, പോർഷെ (Porsche)യുടെ ഉൾപ്പെടെ ഏതാനും വമ്പൻ കരാറുകൾ നേടുമെന്ന് പ്രതീക്ഷിച്ചിരുന്ന ചില ബ്രോക്കറേജുകളുടെ 1,000–1,100 കോടി ഡോളർ പുതിയ കരാറുകളുടെ മൂല്യം എന്ന ഉയർന്ന അനുമാനം എത്തിപ്പിടിക്കാൻ കഴിഞ്ഞില്ല.
വൻകിട പരിവർത്തന കരാറുകൾ വരുമാനത്തിലേക്ക് പൂർണമായി മാറിത്തുടങ്ങാൻ ഒന്നിലധികം സാമ്പത്തിക പാദങ്ങൾ എടുക്കുമെന്നതും, പണപ്പെരുപ്പവും ജിയോപൊളിറ്റിക്കൽ സംഘർഷങ്ങളും കാരണം ക്ലയന്റുകൾ തങ്ങളുടെ വിവേചനാധികാര ചെലവഴിക്കലുകൾ (Discretionary spending) വെട്ടിച്ചുരുക്കി ചെലവുചുരുക്കലിനും സൈബർ സുരക്ഷയ്ക്കും കൂടുതൽ മുൻഗണന നൽകുന്നതും വരുമാന വളർച്ചയെ പരിമിതപ്പെടുത്തുന്നു.
ഓഹരിയൊന്നിന് 12 രൂപ നിരക്കിൽ ടിസിഎസ് ഓഹരി ഉടമകൾക്കുള്ള രണ്ടാം ഇടക്കാല ലാഭവിഹിതം (Interim Dividend) ഡയറക്ടർ ബോർഡ് പ്രഖ്യാപിച്ചു. ഇതിനായുള്ള റെക്കോഡ് തീയതി 2026 ഒക്ടോബർ 14 ആണ്. ഒക്ടോബർ 30-നകം ഡിവിഡന്റ് വിതരണം ചെയ്യും.
2027 കലണ്ടർ വർഷത്തിലെ പുതിയ കോർപ്പറേറ്റ് ഐ.ടി ബജറ്റുകൾ, ബാങ്കിംഗ്-ഫിനാൻഷ്യൽ (BFSI) മേഖലയിലെ ഡിമാൻഡ് ഉണർവ്, പുതിയ കരാറുകൾ എത്ര വേഗത്തിൽ കമ്പനിയുടെ വരുമാനമായി മാറുന്നു എന്നതിനൊപ്പം പരമ്പരാഗത ഐ.ടി സേവനങ്ങളുടെ ബില്ലിംഗിനെ എ.ഐ വരുമാനം എങ്ങനെ സ്വാധീനിക്കുന്നു എന്നിവയാകും വരും പാദങ്ങളിൽ വിപണി നിരീക്ഷിക്കുക.
ബുധനാഴ്ചത്തെ വ്യാപാരത്തിനൊടുവിൽ നേരിയ ഇടിവോടെ 2,077 രൂപയിലാണ് ടിസിഎസ് ഓഹരി ക്ലോസ് ചെയ്തത്. വ്യാപാരത്തിന്റെ ഏറിയപങ്കും മികച്ച നേട്ടത്തിലായിരുന്നെങ്കിലും അവസാന ഘട്ടത്തിലാണ് ഓഹരി നഷ്ടത്തിലേക്ക് വഴിമാറിയത്. ഇന്നത്തെ വ്യാപാരം അവസാനിച്ചതിനു ശേഷമാണ് കമ്പനിയുടെ പാദഫലം പുറത്തുവന്നതിനാൽ വ്യാഴാഴ്ച രാവിലെയാകും ടിസിഎസ് ഓഹരിയിൽ ഇതിന്റെ പ്രതിഫലനം കാണാനാകുക.
Read DhanamOnline in English
Subscribe to Dhanam Magazine