ഇനി മ്യൂച്വൽ ഫണ്ട് നിക്ഷേപത്തിന് ആപ്പുകൾ വേണ്ട; വാട്‌സ്ആപ്പിലൂടെ നേരിട്ട് പണമിടപാടുകള്‍, യുടിഐയുടെ പുതിയ പദ്ധതി

നിക്ഷേപ പ്രക്രിയകൾ കൂടുതൽ ലളിതമാക്കാൻ പുതിയ ഡിജിറ്റൽ സംവിധാനവുമായി രാജ്യത്തെ മുൻനിര മ്യൂച്വൽ ഫണ്ട് സ്ഥാപനമായ യുടിഐ മ്യൂച്വൽ ഫണ്ട് (UTI Mutual Fund). ഇനി മുതൽ നിക്ഷേപകർക്ക് വാട്‌സ്ആപ്പ് ചാറ്റിലൂടെ തന്നെ പൂർണ്ണമായും മ്യൂച്വൽ ഫണ്ട് നിക്ഷേപങ്ങൾ നടത്താം. ഇന്ത്യയിലാദ്യമായാണ് ഒരു മ്യൂച്വൽ ഫണ്ട് കമ്പനി വാട്‌സ്ആപ്പിൽ പൂർണ്ണമായ ഇൻ-ചാറ്റ് (In-Chat) പണമിടപാട് സൗകര്യം സജ്ജമാക്കുന്നത്.

എളുപ്പത്തിൽ, ഒരൊറ്റ സന്ദേശത്തിൽ

ദൈനംദിന ആശയവിനിമയത്തിന് ഉപയോഗിക്കുന്ന വാട്‌സ്ആപ്പിൽ സന്ദേശം അയക്കുന്നത്ര ലളിതമായി ഇനി സാധാരണക്കാർക്കും നിക്ഷേപങ്ങൾ പൂർത്തിയാക്കാനാകും. മറ്റൊരു ആപ്പിലേക്കോ വെബ്‌സൈറ്റ് ബ്രൗസറിലേക്കോ റീഡയറക്ട് ചെയ്യപ്പെടാതെ ചാറ്റിൽ തന്നെ തുടർന്നുകൊണ്ട് ഒറ്റത്തവണ പേയ്‌മെന്റുകളും യുപിഐ (UPI) വഴിയുള്ള ഇടപാടുകളും നടത്താമെന്നതാണ് ഇതിന്റെ പ്രധാന പ്രത്യേകത.

പണമിടപാടുകളിലെ തടസം ഒഴിവാക്കാം

സാധാരണയായി ആപ്പുകളിൽ നിന്ന് മറ്റ് ലിങ്കുകളിലേക്കോ പെയ്‌മെന്റ് ഗേറ്റ്‌വേകളിലേക്കോ മാറുമ്പോൾ സാങ്കേതിക തടസ്സങ്ങൾ മൂലവും നെറ്റ്‌വർക്ക് പ്രശ്നങ്ങൾ മൂലവും ഇടപാടുകൾ പരാജയപ്പെടാറുണ്ട്. എന്നാൽ ഇൻ-ചാറ്റ് സംവിധാനം നിലവിൽ വന്നതോടെ ഇത്തരം തടസങ്ങൾക്ക് പരിഹാരമാകുമെന്ന് കമ്പനി അറിയിച്ചു.

നിക്ഷേപകർ ഏറ്റവും കൂടുതൽ സമയം ചെലവഴിക്കുന്ന പ്ലാറ്റ്‌ഫോമിൽ തന്നെ നേരിട്ട് ഇത്തരം സേവനം നൽകുന്നത് മ്യൂച്വൽ ഫണ്ട് രംഗത്ത് പുതിയൊരു മാറ്റത്തിന് തുടക്കമിടുമെന്ന് യുടിഐ എഎംസി ഗ്രൂപ്പ് പ്രസിഡന്റും സെയിൽസ്, പ്രൊഡക്റ്റ് & ഡിജിറ്റൽ മേധാവിയുമായ പെഷോട്ടൻ ദസ്തൂർ വ്യക്തമാക്കി.

പ്രമുഖ സ്ഥാപനങ്ങളുടെ സഹകരണം

മെറ്റയുടെ വാട്‌സ്ആപ്പ് ബിസിനസ്സ്, പ്രമുഖ പേയ്‌മെന്റ് പാർട്ണറായ കാംസ്പേ (CAMSPay), ഡിജിറ്റൽ കോൺവർസേഷണൽ പ്ലാറ്റ്‌ഫോമായ ഗപ്ഷപ് (Gupshup) എന്നിവയുടെ സാങ്കേതിക സഹകരണത്തോടെയാണ് യുടിഐ ഈ അത്യാധുനിക സേവനം യാഥാർത്ഥ്യമാക്കിയത്.

മാറുന്ന ഡിജിറ്റൽ ലോകത്ത് ഇത്തരം ചാറ്റ് അധിഷ്ഠിത പണമിടപാടുകൾ സാമ്പത്തിക സേവന മേഖലയുടെ ഭാവിയാണെന്ന് ഗപ്ഷപ് ചീഫ് പ്രൊഡക്റ്റ് ഓഫീസർ ഗൗരവ് കച്ചാവയും, ലിങ്കുകൾ മാറുന്നതിലൂടെയുണ്ടാകുന്ന പരാജയ നിരക്ക് കുറയ്ക്കാൻ ഇത് സഹായിക്കുമെന്ന് കാംസ്പേ സിഇഒ വസന്ത് ജയപാലും കൂട്ടിച്ചേർത്തു.