വീഗാലാൻഡ് ഡെവലപ്പേഴ്‌സ് ഐ.പി.ഒ സെപ്റ്റംബർ 10 മുതൽ; കേരളത്തിൽ നിന്നുള്ള ആദ്യ റിയൽ എസ്റ്റേറ്റ് ലിസ്റ്റിംഗ്; ഓഹരി വില ₹140

വി-ഗാർഡ്, വണ്ടർലാ ഗ്രൂപ്പുകളുടെ സ്ഥാപകൻ കൊച്ചൗസേപ്പ് ചിറ്റിലപ്പിള്ളി പ്രൊമോട്ടറായുള്ള കൊച്ചിയിലെ റിയൽ എസ്റ്റേറ്റ് നിർമ്മാണ കമ്പനി വീഗാലാൻഡ് ഡെവലപ്പേഴ്‌സിന്റെ 210 കോടി രൂപയുടെ പ്രാരംഭ പൊതുഓഹരി വിൽപ്പന (ഐ.പി.ഒ) സെപ്റ്റംബർ 10-ന് ആരംഭിക്കുന്നു. കേരളത്തിൽ നിന്ന് പബ്ലിക് ലിസ്റ്റിംഗിനൊരുങ്ങുന്ന ആദ്യ റിയൽ എസ്റ്റേറ്റ് കമ്പനിയാണിത്. സെപ്റ്റംബർ 15-ന് ഐ.പി.ഒ അവസാനിക്കും. സെപ്റ്റംബർ 18-ന് ബി.എസ്.ഇ, എൻ.എസ്.ഇ തുടങ്ങിയ ദേശീയ സ്റ്റോക്ക് എക്സ്ചേഞ്ചുകളിൽ വീഗാലാൻഡ് ഡെവലപ്പേഴ്‌സ് ഓഹരികൾ ലിസ്റ്റ് ചെയ്യുന്നത്.

ഇഷ്യൂ ഘടനയും പ്രധാന തീയതികളും

• പ്രൈസ് ബാൻഡ്: വീഗാലാൻഡ് ഡെവലപ്പേഴ്‌സിന്റെ ഓഹരിയൊന്നിന് 130 മുതൽ 140 രൂപ വരെയാണ് ഐ.പി.ഒയിൽ പ്രൈസ് ബാൻഡ് നിശ്ചയിച്ചിരിക്കുന്നത്.

• ലോട്ട് സൈസ്: 107 ഓഹരികൾ (ചെറുകിട നിക്ഷേപകർക്ക് പരമാവധി പ്രൈസ് ബാൻഡിൽ വേണ്ടിവരുന്ന ചുരുങ്ങിയ നിക്ഷേപം 14,980 രൂപ).

• ഇഷ്യൂവിന്റെ രീതി: 1.5 കോടി ഓഹരികളുടെ പൂർണമായ ഫ്രഷ് ഇഷ്യൂ (Fresh Issue). പ്രൊമോട്ടർമാർ ഓഹരികൾ വിറ്റഴിക്കുന്ന ഓഫർ ഫൊർ സെയിൽ (OFS) ഇതിലില്ല.

• പങ്കാളിത്തം: യോ​ഗ്യരായ സ്ഥാപന നിക്ഷേപകർക്ക് (QIB) വിഭാഗത്തിന് 50 ശതമാനവും ചെറുകിട നിക്ഷേപകർക്ക് (Retail Investors) 35 ശതമാനവും സ്ഥാപനേതര നിക്ഷേപകർക്ക് (NII) 15 ശതമാനം ഓഹരികൾ വീതവും മാറ്റിവെച്ചിരിക്കുന്നു.

• അലോട്ട്മെന്റും ലിസ്റ്റിംഗും: സെപ്റ്റംബർ 16-ന് അർഹരായ നിക്ഷേപകർക്ക് വീഗാലാൻഡ് ഡെവലപ്പേഴ്‌സ് ഓഹരികളുടെ അലോട്ട്മെന്റും സെപ്റ്റംബർ 17-ന് ഓഹരി കിട്ടാത്തവർക്കുള്ള റീഫണ്ടും നടക്കും. അർഹരായ നിക്ഷേപകരുടെ ഡിമാറ്റ് അക്കൗണ്ടിലേക്ക് സെപ്റ്റംബർ 17-ന് ഓഹരികൾ ക്രെഡിറ്റ് ചെയ്യപ്പെടും.

ശക്തമായ സാമ്പത്തിക പ്രകടനം

കഴിഞ്ഞ സാമ്പത്തിക വർഷങ്ങളിൽ മികച്ച വളർച്ചയാണ് വീഗാലാൻഡ് ഡെവലപ്പേഴ്‌സ് കമ്പനി രേഖപ്പെടുത്തിയത്.

• വരുമാനം: 2024-25-ലെ 196.22 കോടി രൂപയിൽ നിന്ന് 30% വർധിച്ച് 2025-26-ൽ കമ്പനിയുടെ വരുമാനം 254.16 കോടി രൂപയായി.

• അറ്റാദായം (PAT): 30% വർധനയോടെ 26.61 കോടി രൂപയിലെത്തി.

• എബിറ്റ്ഡാ (EBITDA): 33.77 കോടി രൂപയിൽ നിന്ന് 42.64 കോടി രൂപയായി ഉയർന്നു (മാർജിൻ 16.78%).

• റിട്ടേൺ നിരക്കുകൾ: റിട്ടേൺ ഓൺ ഇക്വിറ്റി (ROE) 16.02 ശതമാനവും റിട്ടേൺ ഓൺ ക്യാപിറ്റൽ എംപ്ലോയ്ഡ് (ROCE) 11.89 ശതമാനവുമാണ്.

• കടബാധ്യത: കടം-ഇക്വിറ്റി അനുപാതം (Debt/Equity Ratio) 0.32 എന്ന സുരക്ഷിതമായ നിലവാരത്തിലാണ് ഉള്ളത്. മുൻ വർഷത്തെ 176.97 കോടി രൂപയിൽ നിന്ന് മൊത്തം കടം 85.59 കോടി രൂപയായി കുറയ്ക്കാനും കമ്പനിക്ക് സാധിച്ചു.

ഫണ്ട് വിനിയോഗവും പ്രൊമോട്ടർ പശ്ചാത്തലവും

ഐ.പി.ഒ വഴി ലഭ്യമാകുന്ന 119.83 കോടി രൂപ നിർമ്മാണം പുരോഗമിക്കുന്നതും പുതിയതുമായ പദ്ധതികൾക്കായി വിനിയോഗിക്കും. ശേഷിക്കുന്ന തുക സ്ഥലം ഏറ്റെടുക്കലിനും പൊതു കോർപ്പറേറ്റ് ആവശ്യങ്ങൾക്കുമായി മാറ്റിവെക്കും എന്നാണ് വീഗാലാൻഡ് ഡെവലപ്പേഴ്‌സ് വ്യക്തമാക്കിയിട്ടുള്ളത്.

2007-ൽ പ്രവർത്തനം ആരംഭിച്ച കമ്പനി ഇതുവരെ 11.05 ലക്ഷം ചതുരശ്ര അടി വിസ്തീർണ്ണമുള്ള 10 റെസിഡൻഷ്യൽ പ്രോജക്ടുകൾ പൂർത്തിയാക്കിയിട്ടുണ്ട്. വി-ഗാർഡ് (BSE: 532953, NSE: VGUARD), വണ്ടർലാ ഹോളിഡേയ്സ് (BSE: 538268, NSE: WONDERLA) എന്നിവയ്ക്ക് ശേഷമുള്ള കൊച്ചൗസേപ്പ് ചിറ്റിലപ്പിള്ളിയുടെ മൂന്നാമത്തെ ലിസ്റ്റഡ് സംരംഭമായി വീഗാലാൻഡ് ഡെവലപ്പേഴ്‌സ് മാറും. ഐ.പി.ഒയ്ക്ക് മുൻപ് കമ്പനിയിൽ പ്രൊമോട്ടർമാർക്ക് 92% ഓഹരി പങ്കാളിത്തമുണ്ട്.

ഐ.പി.ഒയിൽ നിശ്ചയിച്ചിട്ടുള്ള ഉയർന്ന പ്രൈസ് ബാൻഡായ 140 രൂപ അടിസ്ഥാനമാക്കി വീഗാലാൻഡ് ഡെവലപ്പേഴ്‌സിന്റെ വിപണി മൂല്യം (Market Cap) 682.50 കോടി രൂപയായി കണക്കാക്കുന്നു. ഇഷ്യൂവിന് ശേഷമുള്ള പി.ഇ അനുപാതം 25.64 മടങ്ങിലാണ്. നിലവിൽ ഓഹരിയുടെ ഗ്രേ മാർക്കറ്റ് പ്രീമിയം (GMP) 14 രൂപ ലെവലിലാണ് രേഖപ്പെടുത്തുന്നത്. അതായത് അനൗദ്യോ​ഗിക വിപണിയിൽ വീഗാലാൻഡ് ഡെവലപ്പേഴ്‌സ് ഓഹരിക്ക് 10 ശതമാനം വരെ അധിക വില നൽകി വാങ്ങാൻ ഇപ്പോൾ നിക്ഷേപകർ താത്പര്യപ്പെടുന്നുണ്ടെന്ന് സാരം.

(Disclaimer: പഠനാവശ്യം മുന്‍നിര്‍ത്തി പങ്കുവെക്കുന്ന ഈ വിവരങ്ങള്‍ നിക്ഷേപ തീരുമാനങ്ങള്‍ക്കുള്ള ശുപാര്‍ശയല്ല. ഓഹരി നിക്ഷേപം വിപണിയുടെ ലാഭനഷ്ട സാധ്യതകള്‍ക്ക് വിധേയമായതിനാല്‍ നിക്ഷേപത്തിന് മുമ്പ് സ്വന്തം നിലയില്‍ കമ്പനിയെ കുറിച്ച് കൂടുതല്‍ പഠിക്കുകയോ, സെബി (SEBI) അംഗീകൃത സാമ്പത്തിക വിദഗ്ധരുടെ സേവനം തേടുകയോ ചെയ്യേണ്ടതുണ്ട്.)