ബിസിനസിലോ ഔദ്യോഗിക ജീവിതത്തിലോ പുതിയൊരു പ്രോജക്റ്റ് തുടങ്ങാന് ആഗ്രഹിക്കുമ്പോള് നമ്മളില് ഭൂരിഭാഗവും അഭിമുഖീകരിക്കുന്ന വലിയൊരു വെല്ലുവിളിയാണ് 'മോട്ടിവേഷന്റെ' അഭാവം. 'എനിക്കിപ്പോള് ഒരു പ്രചോദനവുമില്ല, മൂഡ് വരുമ്പോള് ചെയ്യാം' എന്ന് പറഞ്ഞ് പല പ്രധാനപ്പെട്ട ജോലികളും നമ്മള് മാറ്റിവെക്കാറുണ്ട്. എന്നാല്, പ്രശസ്ത ബെസ്റ്റ് സെല്ലര് ഗ്രന്ഥകര്ത്താവായ മാര്ക്ക് മാന്സന് പറയുന്നത്, നമ്മള് പരമ്പരാഗതമായി വിശ്വസിച്ചുപോരുന്ന മോട്ടിവേഷന് സങ്കല്പ്പം തന്നെ തെറ്റാണെന്നാണ്!
സാധാരണയായി നമ്മള് കരുതുന്നത് മനസിന് നല്ലൊരു വൈകാരിക പ്രചോദനം ഉണ്ടാകുമ്പോള് മാത്രമേ മോട്ടിവേഷന് ലഭിക്കൂ എന്നും, അതിനുശേഷം മാത്രമേ നമ്മള് പ്രവര്ത്തിക്കാന് തുടങ്ങൂ എന്നുമാണ്. എന്നാല് യാഥാര്ത്ഥ്യത്തില്, പ്രവര്ത്തനം എന്നത് മോട്ടിവേഷന്റെ ഫലം (Effect) മാത്രമല്ല, മറിച്ച് അതിന്റെ കാരണവും (Cause) കൂടിയാണ്. ഒരു കാര്യത്തിലേക്ക് എടുത്തുചാടാനുള്ള വൈകാരികമായ പ്രചോദനത്തിനായി കാത്തിരുന്നാല് പലപ്പോഴും നമ്മള് പരാജയപ്പെടും. കാരണം ഭയം, പരാജയഭീതി, ഉത്കണ്ഠ തുടങ്ങിയ നിഷേധാത്മക വികാരങ്ങളാണ് പലപ്പോഴും നമ്മെ മുന്പോട്ട് നീങ്ങുന്നതില് നിന്നും തടയുന്നത്.
ഇവിടെയാണ് മാര്ക്ക് മാന്സന്റെ 'ഡൂ സംതിങ്' (Do Something) തത്ത്വം പ്രസക്തമാകുന്നത്. നിങ്ങള്ക്ക് ഒരു ജോലി ചെയ്യാന് തീരെ പ്രചോദനമില്ലെങ്കില് പോലും, അതിലേക്ക് തികച്ചും ചെറിയൊരു ചുവടുവെപ്പ് നടത്തുക. എന്ത് ചെറിയ കാര്യവുമാകാം. ആ ചെറിയ പ്രവര്ത്തനം നിങ്ങളുടെ മനസില് ഒരു പോസിറ്റീവ് തരംഗവും തുടര്ന്ന് പ്രചോദനവും ഉണ്ടാക്കും. ഈ പ്രചോദനം നിങ്ങളെ കൂടുതല് വലിയ കാര്യങ്ങള് ചെയ്യാന് പ്രേരിപ്പിക്കുന്ന മോട്ടിവേഷനായി മാറും. ചുരുക്കത്തില്, പ്രവര്ത്തനം തന്നെയാണ് മോട്ടിവേഷന്റെ യഥാര്ത്ഥ ഇന്ധനം.
ഏതൊരു രംഗത്തെയും വിജയം എന്നത് നിങ്ങളുടെ അറിവിനെയോ കഴിവുകളെയോ മാത്രം ആശ്രയിച്ചുള്ളതല്ല, മറിച്ച് നിങ്ങള് എടുക്കുന്ന നിരന്തരമായ പ്രവര്ത്തനങ്ങളെ ആശ്രയിച്ചാണ് ഇരിക്കുന്നത്.മാര്ക്ക് മാന്സന്
വിജയം ഉറപ്പാക്കാന് മൂന്ന് പ്രധാന ചുവടുകള്
മനുഷ്യന്റെ ഇച്ഛാശക്തി (Willpower) എന്നത് പരിമിതമായ ഒന്നാണ്. അതിനാല് ദിനംപ്രതി എന്തൊക്കെ ചെയ്യണമെന്ന് ഓരോ നിമിഷവും ചിന്തിച്ച് സമയം കളയാതെ, നിശ്ചിത സമയത്തും സ്ഥലത്തും ചെയ്യേണ്ട കാര്യങ്ങളുടെ ഒരു വ്യക്തമായ റിച്വല് (Ritual) ഉണ്ടാക്കിയെടുക്കുക. തുടക്കത്തില് 'ഡൂ സംതിങ്' തത്ത്വം ഉപയോഗിച്ച് ചെറിയൊരു പ്രവര്ത്തനം വഴി ഈ ദിനചര്യ ആരംഭിച്ചാല്, മനസിന്റെ മരവിപ്പ് മാറി സ്വാഭാവികമായ മുന്നേറ്റം കൈവരിക്കാനാകും.
ഡിജിറ്റല് യുഗത്തിലെ ഏറ്റവും വലിയ ശത്രു ശ്രദ്ധവഴിമാറലാണ്. സോഷ്യല് മീഡിയയിലെ പോസ്റ്റുകളും മെസേജുകളും താല്ക്കാലികമായി മനസിന് ഡോപ്പാമിന് നല്കുമെങ്കിലും, വലിയ ലക്ഷ്യങ്ങളിലേക്ക് എത്തുന്നതിനുള്ള നിങ്ങളുടെ ഊര്ജ്ജത്തെയും മോട്ടിവേഷനെയും അത് ചോര്ത്തിക്കളയുന്നു. ബിസിനസിലും കരിയറിലും വലിയ വിജയം സ്വന്തമാക്കാന് ഇത്തരം തടസങ്ങളെ പൂര്ണമായും വെട്ടിമാറ്റേണ്ടതുണ്ട്.
എത്ര ശ്രമിച്ചിട്ടും നിങ്ങള്ക്ക് ഒരു ജോലി ചെയ്യാന് താല്പര്യം തോന്നുന്നില്ലെങ്കില്, അതിനു പിന്നില് ഏതെങ്കിലും തരത്തിലുള്ള അസ്വസ്ഥതകളോ ഭയമോ ആകാം. അത്തരം മനഃശാസ്ത്രപരമായ തടസങ്ങളെ ഒളിച്ചോടാതെ അഭിമുഖീകരിക്കാനും പ്രശ്നങ്ങള് തുറന്നു സംസാരിച്ച് പരിഹരിക്കാനും തയ്യാറാകുക. നിങ്ങളുടെ അസ്വസ്ഥതകളെയും ഭയത്തെയും ധൈര്യത്തോടെ അഭിമുഖീകരിക്കുന്നിടത്താണ് യഥാര്ത്ഥ വ്യക്തിഗത വളര്ച്ച ആരംഭിക്കുന്നത്.
നിങ്ങള് ഒരു സംരംഭകനോ, കോര്പ്പറേറ്റ് എക്സിക്യൂട്ടീവോ ആകട്ടെ; വന്കിട പ്രോജക്റ്റുകള് മുന്നില്ക്കണ്ട് മടിച്ചുനില്ക്കാതെ ഇന്ന് തന്നെ, ഈ നിമിഷം തന്നെ അതിലെ ഏറ്റവും ചെറിയൊരു കാര്യം ചെയ്തു തുടങ്ങുക. ആ ചെറിയ ചുവടുവെപ്പ് നിങ്ങളെ വലിയ വിജയങ്ങളിലേക്ക് നയിക്കും!
Read DhanamOnline in English
Subscribe to Dhanam Magazine