വ്യവസായ ലോകത്തും വ്യക്തിജീവിതത്തിലും അതിവേഗ ഫലങ്ങൾ തേടിയുള്ള ഓട്ടത്തിലാണ് ഭൂരിഭാഗം പേരും. "ഒരു മാസം കൊണ്ട് വരുമാനം ഇരട്ടിയാക്കാം", "ആഴ്ചകൾ കൊണ്ട് കമ്പനിയുടെ വലിപ്പം വർധിപ്പിക്കാം" തുടങ്ങിയ ആകർഷകമായ വാഗ്ദാനങ്ങൾക്ക് പിന്നാലെ പായുമ്പോൾ വലിയ പ്രതിസന്ധികളിലേക്ക് വഴുതിവീഴാനുള്ള സാധ്യതയും ഏറുന്നു. എന്നാൽ, ബിസിനസിലും കരിയറിലും സുസ്ഥിരമായ വിജയം നേടാൻ വേഗതയല്ല, മറിച്ച് ലക്ഷ്യബോധത്തോടെയുള്ള പതുക്കെയുള്ള മുന്നേറ്റമാണ് ('Deliberate Slowness') ആവശ്യം.
സോഫ്റ്റ്‌വെയർ ഡെവലപ്‌മെന്റ് രംഗത്ത് പ്രശസ്തമായ ഒരു തത്ത്വമുണ്ട്: "ഒരു പ്രോജക്റ്റിനായി നിങ്ങൾ കണക്കാക്കുന്ന ഏറ്റവും കൂടിയ സമയം എത്രയാണോ, അതിന്റെ ഇരട്ടി സമയം യാഥാർത്ഥ്യബോധമുള്ള ഡെഡ്‌ലൈനായി നിശ്ചയിക്കുക." ഹ്രസ്വകാലയളവിൽ കൈവരിക്കാവുന്ന നേട്ടങ്ങളെ നാം അമിതമായി വിലയിരുത്തുകയും (Overestimate) എന്നാൽ ദീർഘകാലയളവിൽ ഉണ്ടാക്കാൻ സാധിക്കുന്ന വലിയ മാറ്റങ്ങളെ ലഘൂകരിച്ച് കാണുകയും (Underestimate) ചെയ്യുന്നു എന്നതാണ് പലരുടെയും പ്രധാന പിഴവ്.
ഒരു ബിസിനസ് ആരംഭിക്കുമ്പോൾ തന്നെ പെട്ടെന്ന് വൻ ലാഭമുണ്ടാക്കണമെന്ന ലക്ഷ്യത്തോടെ തുടക്കത്തിൽ വലിയ വേഗത്തിൽ ഓടുന്നത് സ്വാഭാവികമാണ്. എന്നാൽ ഇത്തരം വേഗത്തിലുണ്ടാകുന്ന താത്കാലിക വളർച്ചയ്ക്ക് ഉറപ്പുള്ള അടിത്തറയുണ്ടാകില്ല. ഏതെങ്കിലും തരത്തിലുള്ള സാമ്പത്തിക ബാധ്യതയോ വിപണിയിലെ മാറ്റങ്ങളോ ഉണ്ടായാൽ തകർന്നു വീഴാൻ ഇത് കാരണമാകും.
മാസങ്ങൾ കൊണ്ട് പെട്ടെന്ന് വരുമാനത്തിൽ 50 ശതമാനം വർധനയുണ്ടാക്കുന്നതിനേക്കാൾ എത്രയോ മൂല്യമുള്ളതാണ് ദീർഘകാല അടിസ്ഥാനത്തിൽ സ്ഥിരതയോടെ നിലനിൽക്കുന്ന 5 ശതമാനം വളർച്ച. കാലിടറാതെ കൃത്യമായ പടവുകൾ കയറുമ്പോൾ മാത്രമാണ് ശക്തമായ ഒരു ബിസിനസ് അടിത്തറ രൂപപ്പെടുന്നത്.
വേഗത്തിലുള്ള വളർച്ചയ്ക്ക് പിന്നാലെ ഓടി അടിത്തറ ഇളകിയതിന് ഇന്ത്യൻ ബിസിനസ് ലോകത്തെ ഏറ്റവും വലിയ ഉദാഹരണമാണ് എഡ്‌ടെക് വമ്പനായ ബൈജൂസ്. കോവിഡ് കാലത്തെ ഓൺലൈൻ വിദ്യാഭ്യാസ തരംഗം മുതലെടുത്ത് പതിനായിരക്കണക്കിന് കോടി രൂപയുടെ മൂല്യത്തിലേക്ക് കമ്പനി അതിവേഗം കുതിച്ചുയർന്നു. പ്രൊഫഷണൽ കോഴ്‌സുകൾ മുതൽ വിദേശ കമ്പനികൾ വരെ കോടികൾ എറിഞ്ഞ് ഏറ്റെടുക്കാനായിരുന്നു അന്ന് ബൈജൂസിന്റെ തിടുക്കം.
എന്നാൽ, സാമ്പത്തിക അച്ചടക്കവും വ്യക്തമായ ബിസിനസ് അടിത്തറയും ഉറപ്പാക്കാതെയുള്ള ഈ അതിവേഗ മുന്നേറ്റം കോവിഡിന് ശേഷം കമ്പനിക്ക് കടുത്ത തിരിച്ചടിയായി. ദീർഘകാല സുസ്ഥിരതയ്ക്ക് പകരം ഹ്രസ്വകാല വാല്യുവേഷനും അതിവേഗ വളർച്ചയ്ക്കും മുൻഗണന നൽകിയതാണ് ഒടുവിൽ വലിയ സാമ്പത്തിക പ്രതിസന്ധിയിലേക്കും നിയമപോരാട്ടങ്ങളിലേക്കും കമ്പനിയെ തള്ളിയിട്ടത്. 'ഡെലിബറേറ്റ് സ്ലോനെസ്' കൈവിട്ട് അമിതവേഗതയിൽ ഓടിയാൽ എത്ര വലിയ സാമ്രാജ്യവും തകരുമെന്നതിന്റെ വ്യക്തമായ മുന്നറിയിപ്പാണ് ബൈജൂസ്.
നിങ്ങളുടെ പ്രധാന ലക്ഷ്യം കൈവരിക്കാൻ നിശ്ചയിച്ചിരിക്കുന്ന സമയപരിധി നീട്ടിനൽകുന്നത് വഴി വിജയസാധ്യത വർധിക്കുകയാണ് ചെയ്യുന്നത്. മൂന്ന് വർഷത്തിനുള്ളിൽ ലക്ഷ്യം പൂർത്തിയാക്കാൻ ശ്രമിക്കുമ്പോൾ ഉണ്ടാകുന്ന സമ്മർദ്ദവും തെറ്റുകളും ഒഴിവാക്കാൻ അഞ്ച് വർഷത്തെ ദീർഘകാല കാഴ്ചപ്പാട് സഹായിക്കും.
ബിസിനസ് തന്ത്രങ്ങൾ നിശ്ചയിക്കുമ്പോൾ ദീർഘകാല പദ്ധതികൾക്ക് പ്രാധാന്യം നൽകുന്നത് വഴി പ്രവർത്തനങ്ങളിൽ സ്ഥിരത ഉറപ്പാക്കാൻ സാധിക്കും. പ്രക്രിയകളിൽ (Process) ശ്രദ്ധ കേന്ദ്രീകരിക്കുമ്പോൾ തെറ്റുകൾ തിരുത്താനും മികച്ച ശീലങ്ങളും പ്രവർത്തനരീതികളും സ്ഥാപനത്തിൽ വളർത്തിയെടുക്കാനും അവസരം ലഭിക്കുന്നു.
പേഴ്‌സണൽ ഡെവലപ്‌മെന്റിലായാലും സംരംഭകത്വത്തിലായാലും ചെറിയ മാറ്റങ്ങൾ ദീർഘകാലയളവിൽ വൻ മുന്നേറ്റങ്ങൾക്ക് വഴിതുറക്കും. സാമ്പത്തികമായും പ്രവർത്തനപരമായും വരുത്തുന്ന ഓരോ ചെറിയ മെച്ചപ്പെടുത്തലുകളും കോമ്പൗണ്ടിംഗ് തത്ത്വം പോലെ വലിയ വളർച്ചയിലേക്ക് നയിക്കും.
തുടക്കത്തിൽ സാവധാനത്തിലാണെന്ന് തോന്നാമെങ്കിലും, അടിത്തറ ഉറപ്പിച്ചു മുന്നേറുന്ന ബിസിനസുകളാണ് വിപണിയിലെ തിരിച്ചടികളെ പ്രതിരോധിച്ച് വിജയകരമായി നിലനിൽക്കുന്നത്. വേഗത്തിൽ ഓടി വീഴുന്നതിനേക്കാൾ കൃത്യമായ ഇടവേളകളിൽ ചുവടുകൾ ഉറപ്പിച്ചു മുന്നേറുന്നതാണ് ബിസിനസിലെ ബുദ്ധിപൂർവ്വമായ തന്ത്രം.
Byju's rapid expansion and eventual struggle highlight why businesses need deliberate slowness over aggressive short-term scaling.
Read DhanamOnline in English
Subscribe to Dhanam Magazine