പുലര്ച്ചെ അഞ്ചിന് വായന. പിന്നാലെ കടല്ത്തീരത്ത് ഒരു നടത്തം. ഒരു മണിക്കൂര് ടെന്നിസ്. അതിനുശേഷം യോഗ. രാത്രി വൈകിയുള്ള വിരുന്നുകളില്ല; സോഷ്യല് മീഡിയയിലെ നിരന്തര സാന്നിധ്യവുമില്ല. വിവിധ മേഖലകളിലായി വലിയ ബിസിനസ് സാമ്രാജ്യം കെട്ടിപ്പടുത്ത ഫൈസല് കൊട്ടിക്കോളന്റെ ജീവിതക്രമം അതിശയിപ്പിക്കുന്ന വിധം ലളിതമാണ്.
സ്റ്റീല് നിര്മാണം മുതല് അടിസ്ഥാനസൗകര്യം, ആരോഗ്യപരിചരണം, വിദ്യാഭ്യാസം, വെല്നെസ് വരെ വ്യത്യസ്ത മേഖലകളില് സ്വന്തം മുദ്ര പതിപ്പിച്ച ഫൈസലിന് വിജയം എന്നത് പണത്തിന്റെയോ പദവിയുടെയോ മാത്രം കണക്കല്ല. പരിഹരിച്ച പ്രശ്നങ്ങള്, രൂപപ്പെടുത്തിയ സ്ഥാപനങ്ങള്, മെച്ചപ്പെടുത്തിയ മനുഷ്യജീവിതങ്ങള് -ഇവയാണ് വിജയത്തിന്റെ യഥാര്ഥ അളവുകോലെന്ന് ധനം ടൈറ്റന്സ് ഷോയില് അദ്ദേഹം പറയുന്നു.
കെഇഎഫ് ഹോള്ഡിംഗ്സ് സ്ഥാപകനും ചെയര്മാനുമായ ഫൈസല് കൊട്ടിക്കോളനുമായി ടി.എസ് ഗീന നടത്തിയ സംഭാഷണം അദ്ദേഹത്തിന്റെ ബിസിനസ് യാത്രയെക്കാള് വിപുലമായൊരു ജീവിതകാഴ്ചപ്പാടാണ് മുന്നോട്ടുവയ്ക്കുന്നത്. അച്ചടക്കം, ആരോഗ്യം, കുടുംബമൂല്യങ്ങള്, ആത്മീയത, സാങ്കേതികവിദ്യ, മാനുഷികബന്ധങ്ങള്, ലക്ഷ്യബോധം-ഈ ഘടകങ്ങളാണ് തന്റെ ജീവിതത്തെയും സംരംഭങ്ങളെയും ഒരുപോലെ നയിക്കുന്നതെന്ന് അദ്ദേഹം വ്യക്തമാക്കുന്നു.
ക്രമബദ്ധമായ പ്രഭാതമാണ് ഫൈസലിന്റെ ദിവസത്തിന് അടിത്തറ. ജീവിതത്തെയും തത്വചിന്തയെയും കുറിച്ചുള്ള പുസ്തകങ്ങള് വായിച്ചാണ് തുടക്കം. തുടര്ന്ന് കടല്ത്തീരത്തെ നടത്തമോ ഓട്ടമോ, ടെന്നിസ്, യോഗ എന്നിവ. ശരീരത്തെ സജീവമാക്കുന്നതിനൊപ്പം ചിന്തകള്ക്ക് വ്യക്തത നല്കുന്നതാണ് ഈ ശീലങ്ങളെന്ന് അദ്ദേഹം പറയുന്നു.
പ്രഭാത ഭക്ഷണത്തിനുശേഷം ഏതാനും മണിക്കൂറുകള് ഓഫീസില് ചെലവഴിക്കും. വിവിധ ബിസിനസുകളുടെ ദൈനംദിന പ്രവര്ത്തനങ്ങള് ഇപ്പോള് പ്രൊഫഷണല് നേതൃത്വ സംഘങ്ങളാണ് കൈകാര്യം ചെയ്യുന്നത്. അതിനാല് സൂക്ഷ്മകാര്യങ്ങളില് ഇടപെടുന്നതിനുപകരം സ്ഥാപനങ്ങള്ക്ക് ദിശ നല്കുകയും അവയുടെ പ്രവര്ത്തനം വലിയ ലക്ഷ്യവുമായി ചേര്ന്നുനില്ക്കുന്നുവെന്ന് ഉറപ്പാക്കുകയുമാണ് തന്റെ പ്രധാന ചുമതലയെന്ന് ഫൈസല് വിശദീകരിക്കുന്നു.
വലിയ ബിസിനസിന്റെ ഉടമയാണെങ്കിലും തിരക്കേറിയ സാമൂഹികജീവിതത്തില് നിന്ന് അകന്നുനില്ക്കാനാണ് ഫൈസലിനും ഭാര്യ ഷബാനയ്ക്കും താല്പര്യം. രാത്രി വൈകിയുള്ള അത്താഴവിരുന്നുകള് അപൂര്വം. നേരത്തെ ഉറങ്ങുകയും വളരെ കുറച്ച് ടെലിവിഷന് മാത്രം കാണുകയും ചെയ്യുന്നു. നെഗറ്റീവ് വാര്ത്തകളുടെ നിരന്തര പ്രവാഹത്തില് നിന്ന് അകലം പാലിക്കുന്നു.
സോഷ്യല് മീഡിയയില് സജീവമല്ലാത്ത അദ്ദേഹം ബിസിനസിനും വ്യക്തിപരമായ ആശയവിനിമയത്തിനുമായി വാട്സാപ്പാണ് പ്രധാനമായും ഉപയോഗിക്കുന്നത്. അനാവശ്യമായ ബഹളവും സങ്കീര്ണതകളും കുറയുമ്പോള് ജീവിതത്തില് കൂടുതല് സമാധാനം ലഭിക്കുമെന്നാണ് അദ്ദേഹത്തിന്റെ നിലപാട്. മറ്റുള്ളവര്ക്ക് ഇത് 'വിരസമായ ജീവിതം' പോലെ തോന്നാമെങ്കിലും, താന് വിശ്വസിക്കുന്ന കാര്യങ്ങളില് ശ്രദ്ധ കേന്ദ്രീകരിക്കാന് ഈ ലാളിത്യം സഹായിക്കുന്നുവെന്ന് അദ്ദേഹം പറയുന്നു.
രക്ഷാകര്തൃത്വത്തെക്കുറിച്ചും വ്യക്തമായ നിലപാടാണ് ഫൈസലിനുള്ളത്. കുട്ടികളുടെ സ്വഭാവം രൂപപ്പെടുന്ന പ്രായത്തില് മൂല്യങ്ങളും ഉത്തരവാദിത്തവും അച്ചടക്കവും പഠിപ്പിക്കണം. അവര് ആവശ്യപ്പെടുന്നതെല്ലാം നല്കുന്നത് കരുത്തിനേക്കാള് അവകാശബോധം വളര്ത്തുമെന്നാണ് അദ്ദേഹത്തിന്റെ വിലയിരുത്തല്. 'ഇല്ല' എന്ന മറുപടി സ്വീകരിക്കാനുള്ള ശേഷിയും കുട്ടികള്ക്ക് വേണം.
ആരോഗ്യകരമായ ജീവിതത്തിന്റെ മാതൃക മാതാപിതാക്കള്തന്നെ കാണിക്കണമെന്നും അദ്ദേഹം ഓര്മിപ്പിക്കുന്നു. മദ്യത്തിന്റെയോ മയക്കുമരുന്നിന്റെയോ സഹായമില്ലാതെ കായികാഭ്യാസം, വ്യായാമം, യോഗ എന്നിവയിലൂടെ സ്വാഭാവികമായ ഊര്ജവും സന്തോഷവും നേടാം. കോളേജ് ജീവിതം ആസ്വദിക്കുമ്പോഴും സ്വപ്നങ്ങളെ യാഥാര്ഥ്യമാക്കാനുള്ള അടിത്തറയാണ് വിദ്യാഭ്യാസമെന്ന കാര്യം യുവാക്കള് മറക്കരുത്. നേരത്തെ ഉറങ്ങുക, പുലര്ച്ചെ എഴുന്നേല്ക്കുക, പ്രഭാതസൂര്യപ്രകാശം സ്വീകരിക്കുക തുടങ്ങിയ ലളിതശീലങ്ങള് വലിയ മാറ്റം സൃഷ്ടിക്കുമെന്നും അദ്ദേഹം പറയുന്നു.
സ്വന്തം മൂല്യങ്ങളുടെ അടിത്തറ മാതാപിതാക്കളാണെന്ന് ഫൈസല് പറയുന്നു. വിനയം അമ്മയില്നിന്നും കഠിനാധ്വാനം, ധാര്മികത, മനുഷ്യരോടുള്ള ആദരം എന്നിവ പിതാവ് പി.കെ. അഹമ്മദില് നിന്നുമാണ് പഠിച്ചത്.
കുടുംബം സാമ്പത്തികമായി മികച്ച നിലയിലായിരുന്നെങ്കിലും സമ്പത്ത് കുട്ടികളുടെ വ്യക്തിത്വമായി മാറാന് പിതാവ് അനുവദിച്ചിരുന്നില്ല. വീട്ടിലെത്തുന്ന അതിഥികള് പ്രമുഖരായാലും സാധാരണക്കാരായാലും ചായയും കാപ്പിയും നല്കേണ്ടത് കുട്ടികളായിരുന്നു. വിനയവും അതിഥി സല്ക്കാരവും ജീവിതത്തിലൂടെ പഠിപ്പിക്കുന്ന രീതിയായിരുന്നു അത്.
ഇതേ സമീപനമാണ് ഫൈസല് സ്വന്തം കുട്ടികളോടും സ്വീകരിക്കുന്നത്. കുടുംബ സമ്പത്ത് സ്വാഭാവിക അവകാശമല്ലെന്നും അടുത്ത തലമുറ അതില് പങ്കാളിയാകണമെങ്കില് പ്രവര്ത്തിക്കുകയും മൂല്യം കൂട്ടിച്ചേര്ക്കുകയും വേണമെന്നാണ് അദ്ദേഹത്തിന്റെ നിലപാട്. സമ്പത്തിന്റെ ഉടമകളെന്നതിലുപരി അതിന്റെ സൂക്ഷിപ്പുകാരായി സ്വയം കാണണമെന്നാണ് മക്കള്ക്ക് നല്കുന്ന സന്ദേശം.
മുന് രാഷ്ട്രപതി ഡോ. എ.പി.ജെ. അബ്ദുള് കലാമുമായുള്ള കൂടിക്കാഴ്ച ജീവിതത്തിലെ നിര്ണായക വഴിത്തിരിവായിരുന്നുവെന്ന് ഫൈസല് ഓര്ക്കുന്നു. ഫാക്ടറിയില് മണിക്കൂറുകളോളം ചെലവഴിച്ച കലാം, സാങ്കേതികവിദ്യയെയും മനുഷ്യരുടെ കഴിവുകളെയും സംയോജിപ്പിച്ച പ്രവര്ത്തനരീതി നേരിട്ടു കണ്ടു. ഇതേ സമീപനം ഇന്ത്യയിലെ വിദ്യാഭ്യാസ-ആരോഗ്യ മേഖലകളിലും പ്രയോഗിക്കണമെന്ന് അദ്ദേഹം നിര്ദേശിച്ചു.
പിന്നീടുള്ള പല സംരംഭങ്ങള്ക്കും ആ നിര്ദേശം ദിശ നല്കിയെന്ന് ഫൈസല് പറയുന്നു. വിദ്യാഭ്യാസത്തെയും ആരോഗ്യപരിചരണത്തെയും നൂതനാശയങ്ങളിലൂടെ സമൂഹത്തെ മാറ്റാന് കഴിയുന്ന മേഖലകളായാണ് കലാം കണ്ടത്. അദ്ദേഹത്തിന്റെ വിയോഗംവരെ കാണാനും മാര്ഗനിര്ദേശം തേടാനും ലഭിച്ച അവസരങ്ങളും ഫൈസല് അനുസ്മരിക്കുന്നു.
ബിസിനസ് അതിവേഗം വളര്ന്ന ഘട്ടത്തിലാണ് ഭാര്യ ഷബാനയെ സ്ഥാപനത്തിന്റെ ഭാഗമാകാന് ഫൈസല് ക്ഷണിച്ചത്. ഔദ്യോഗിക ബിസിനസ് പരിചയമില്ലാത്തതിനാല് അവര് ആദ്യം മടിച്ചു. എന്നാല് നാലു കുട്ടികളെ വളര്ത്തിയ അനുഭവത്തില് സങ്കീര്ണമായ മനുഷ്യബന്ധങ്ങളും ഉത്തരവാദിത്തങ്ങളും കൈകാര്യം ചെയ്യാനുള്ള കഴിവ് ഫൈസല് കണ്ടിരുന്നു.
മേധാവിയോട് തുറന്നു പറയാന് മടിക്കുന്ന പ്രശ്നങ്ങള് ജീവനക്കാര്ക്ക് വിശ്വാസത്തോടെ പങ്കുവയ്ക്കാന് കഴിയുന്ന ഒരാളെയായിരുന്നു സ്ഥാപനത്തിന് വേണ്ടത്. പാര്ട്ട് ടൈമായി തുടങ്ങിയ ഷബാന പിന്നീട് ഹ്യൂമന് റിസോഴ്സസിന്റെയും അഡ്മിനിസ്ട്രേഷന്റെയും ചുമതല ഏറ്റെടുത്തു. അവരുടെ സഹാനുഭൂതി ജീവനക്കാരുടെ സ്ഥാപനത്തോടുള്ള ആത്മബന്ധം ശക്തിപ്പെടുത്തി. അതേസമയം സാങ്കേതികവിദ്യയിലും ഉല്പ്പാദനത്തിലും കൂടുതല് ശ്രദ്ധ കേന്ദ്രീകരിക്കാന് ഫൈസലിന് സാധിച്ചു.
കരുതലും അനുകമ്പയും നേതൃത്വത്തിലെ ദൗര്ബല്യങ്ങളല്ലെന്നും സ്ഥാപനത്തിന്റെ കരുത്തായി അവ മാറാമെന്നും ഈ അനുഭവം തെളിയിച്ചതായി അദ്ദേഹം പറയുന്നു. സ്ത്രീകള് നേതൃത്വത്തിലേക്ക് കൊണ്ടുവരുന്ന സംയമനം, സന്തുലിതാവസ്ഥ, സഹാനുഭൂതി എന്നിവയ്ക്ക് സ്ഥാപനങ്ങള് കൂടുതല് വില നല്കണമെന്നും ഫൈസല് അഭിപ്രായപ്പെടുന്നു.
വിവിധ സംരംഭങ്ങളില് തുലാഹിനാണ് ഫൈസലിന്റെ മനസില് പ്രത്യേക സ്ഥാനം. മനുഷ്യരുടെ ആരോഗ്യം മെച്ചപ്പെടുത്തുകയും രോഗമുക്തിക്ക് സഹായിക്കുകയും ചെയ്യുന്ന വലിയ ലക്ഷ്യവുമായി അത് ബന്ധപ്പെട്ടിരിക്കുന്നു. ഒരു വ്യക്തിയുടെ ജീവിതം മെച്ചപ്പെട്ടുവെന്ന പ്രതികരണം നല്കുന്ന ആത്മസംതൃപ്തി സാമ്പത്തിക വിജയത്തിലൂടെ മാത്രം ലഭിക്കില്ലെന്ന് അദ്ദേഹം പറയുന്നു.
മെയ്ത്ര ആശുപത്രി, തുലാഹ്, ഫൗണ്ടേഷന്റെ വിദ്യാഭ്യാസ-ആരോഗ്യ പ്രവര്ത്തനങ്ങള് എന്നിവയെല്ലാം ഇതേ ലക്ഷ്യത്തിന്റെ ഭാഗമാണ്. വിദ്യാഭ്യാസം തലമുറകളെ രൂപപ്പെടുത്തുന്നു; ആരോഗ്യപരിചരണം മനുഷ്യരുടെ ക്ഷേമം സംരക്ഷിക്കുന്നു. എന്നാല് അടിസ്ഥാനലക്ഷ്യം മറന്നാല് ഈ മേഖലകള് അമിത വാണിജ്യവല്ക്കരണത്തിലേക്കും അധാര്മിക രീതികളിലേക്കും വഴുതിപ്പോകാന് സാധ്യതയുണ്ടെന്ന മുന്നറിയിപ്പും അദ്ദേഹം നല്കുന്നു.
ഒരു സ്ഥാപനം സാധാരണക്കാരന്റെ ജീവിതത്തെ സ്പര്ശിച്ചുവെന്ന് അറിയുന്നതാണ് പദവിയെയും പ്രശസ്തിയെയുംക്കാള് വലിയ പ്രതിഫലമെന്ന് ഫൈസല് പറയുന്നു.
പ്രയാസമുള്ള പ്രശ്നങ്ങള്ക്ക് പരിഹാരം കണ്ടെത്തുന്നതാണ് ഇപ്പോഴും തന്നെ ഏറ്റവും കൂടുതല് ആവേശഭരിതനാക്കുന്നതെന്ന് ഫൈസല് പറയുന്നു. കൂടുതല് ശുദ്ധമായ മെറ്റലര്ജി സാങ്കേതികവിദ്യ വികസിപ്പിച്ചതായാലും പ്രീഫാബ്രിക്കേഷനിലൂടെ നിര്മാണരംഗത്ത് മാറ്റം കൊണ്ടുവന്നതായാലും ആരോഗ്യരംഗത്ത് പുതിയ പരിഹാരങ്ങള് തേടുന്നതായാലും, മറ്റുള്ളവര് അസാധ്യമെന്ന് കരുതുന്ന കാര്യങ്ങള് പരീക്ഷിക്കുന്നതിലാണ് യഥാര്ഥ സംരംഭകത്വമെന്ന് അദ്ദേഹം വിശ്വസിക്കുന്നു.
ഒരു സംരംഭകന് കുട്ടിയുടെ കൗതുകം നിലനിര്ത്തണം. നിലവിലുള്ള മാതൃകകളുടെ പകര്പ്പ് നിര്മിക്കുന്നതിലല്ല, യഥാര്ഥ പ്രശ്നത്തിന് വ്യത്യസ്തമായ പരിഹാരം സൃഷ്ടിക്കുന്നതിലാണ് സംരംഭത്തിന്റെ പ്രസക്തി. ഒരു ആശയം നടക്കില്ലെന്ന് മറ്റുള്ളവര് പറയുമ്പോള് അത് പിന്തുടരാനുള്ള ഊര്ജം തനിക്ക് കൂടാറുണ്ടെന്നും അദ്ദേഹം വ്യക്തമാക്കുന്നു.
കരിയറോ ബിസിനസോ തിരഞ്ഞെടുക്കുന്നതിന് മുമ്പ് എന്തിനാണ് അത് ചെയ്യുന്നതെന്ന് ഓരോരുത്തരും സ്വയം ചോദിക്കണമെന്ന് ഫൈസല് നിര്ദേശിക്കുന്നു. പണം മാത്രമാണ് ലക്ഷ്യമെങ്കില് ഒരുഘട്ടത്തില് അസംതൃപ്തി ഉടലെടുക്കാം. ജോലിക്ക് ആഴത്തിലുള്ള ലക്ഷ്യവും അതിനോടുള്ള യഥാര്ഥ താല്പര്യവും വേണം.
എല്ലാ തൊഴിലുകള്ക്കും അര്ഥവത്തായ ലക്ഷ്യമുണ്ടാകാമെന്നാണ് അദ്ദേഹത്തിന്റെ കാഴ്ചപ്പാട്. ഒരു മാധ്യമപ്രവര്ത്തകന് വ്യക്തികളില്നിന്ന് മികച്ച ആശയങ്ങള് പുറത്തുകൊണ്ടുവന്ന് പ്രയോജനകരമായ അറിവ് സമൂഹത്തിലെത്തിക്കാം. ജോലിയെ വലിയൊരു ലക്ഷ്യവുമായി ബന്ധിപ്പിക്കുമ്പോഴാണ് അത് കൂടുതല് സംതൃപ്തി നല്കുക. ഭാരതീയ തത്വചിന്തയിലെ 'ധര്മം' എന്ന ആശയവുമായി ഇതിനെ ഫൈസല് ബന്ധിപ്പിക്കുന്നു.
നൂറുകണക്കിന് സന്ദേശങ്ങള് ലഭിച്ചാലും വ്യക്തിപരമായി മറുപടി നല്കാന് ശ്രമിക്കുന്ന ശീലം ഫൈസല് തുടരുന്നു. ആശയവിനിമയം ആത്മാര്ഥമായിരിക്കണമെന്നും അഭിനന്ദനവും അംഗീകാരവും മനസില്നിന്ന് വരണമെന്നും അദ്ദേഹം പറയുന്നു.
ഒരു നേതാവ് യഥാര്ഥമാണോ കൃത്രിമമാണോ എന്ന് ജീവനക്കാര്ക്ക് തിരിച്ചറിയാനാകും. നേതാവിന്റെ ഉദ്ദേശ്യങ്ങളില് വിശ്വാസമുണ്ടാകുമ്പോള് അവര് കൂടുതല് ഊര്ജവും പ്രതിബദ്ധതയും സ്ഥാപനത്തിനായി നല്കും. വിശ്വാസം മനുഷ്യബന്ധം സൃഷ്ടിക്കും; ആ ബന്ധം ബിസിനസിനെ ശക്തിപ്പെടുത്തും; മികച്ച പ്രവര്ത്തനഫലം അതിനു പിന്നാലെ വരും. അതിനാല് ബിസിനസിന്റെ ഏറ്റവും അടിസ്ഥാനഘടകം മനുഷ്യന് മനുഷ്യനുമായി സത്യസന്ധമായി ബന്ധപ്പെടുന്നതാണെന്നാണ് ഫൈസലിന്റെ വിലയിരുത്തല്.
നമുക്ക് മികച്ച ശ്രമം നടത്താനാകുമെങ്കിലും എല്ലാ ഫലങ്ങളെയും നിയന്ത്രിക്കാനാകില്ലെന്ന് ഫൈസല് പറയുന്നു. ആ യാഥാര്ഥ്യം അംഗീകരിക്കാന് വിശ്വാസം സഹായിക്കുന്നു. പരാജയം സംഭവിച്ചോ എന്നതിലുപരി അതിനോട് എങ്ങനെ പ്രതികരിച്ചു എന്നതാണ് നിര്ണായകം.
തിരിച്ചടികളെയും പ്രയാസഘട്ടങ്ങളെയും ജീവിതത്തിന്റെ ഭാഗമായി സ്വീകരിക്കുകയും അതില്നിന്ന് പഠിക്കുകയും നിരാശയില് കുടുങ്ങാതെ മുന്നോട്ടുപോകുകയും വേണം. അംഗീകരിക്കാനുള്ള കഴിവാണ് പ്രതിസന്ധികളെ അതിജീവിക്കാനുള്ള കരുത്ത് നല്കുന്നതെന്നും അദ്ദേഹം ചൂണ്ടിക്കാട്ടുന്നു.
വേദാന്തത്തെ ഒരു പ്രത്യേക മതത്തിന്റെ ഭാഗമായി മാത്രമല്ല, ജീവിതത്തെയും ആത്മബോധത്തെയും കുറിച്ചുള്ള തത്വചിന്തയായാണ് ഫൈസല് കാണുന്നത്. ദീപക് ചോപ്രയുടെ ദ സെവന് സ്പിരിച്വല് ലോസ് ഓഫ് സക്സസ് (The seven spiritual laws of success) ഉള്പ്പെടെയുള്ള പുസ്തകങ്ങളും അദ്ദേഹത്തെ സ്വാധീനിച്ചിട്ടുണ്ട്.
ജീവചരിത്രങ്ങള് വായിക്കുന്നതിലും താല്പര്യമുള്ള ഫൈസല്, ജെ.ആര്.ഡി. ടാറ്റയെയും ടാറ്റയുടെ കോര്പ്പറേറ്റ് പാരമ്പര്യത്തെയും പ്രധാന പ്രചോദനമായി ചൂണ്ടിക്കാട്ടുന്നു. മൂല്യങ്ങളും ധാര്മികതയും തത്വങ്ങളും കൈവിടാതെ വലിയ ബിസിനസ് സ്ഥാപനം എങ്ങനെ നടത്താമെന്ന് ടാറ്റ കാണിച്ചുതന്നു. ബിസിനസിന് ടാറ്റയുടെ ദര്ശനവും ജീവിതത്തിന് വേദാന്തത്തിന്റെ കാഴ്ചപ്പാടുമാണ് താന് ഉള്ക്കൊള്ളുന്നതെന്ന് അദ്ദേഹം പറയുന്നു.
മതപരമായ തിരിച്ചറിവുകള്ക്ക് അപ്പുറം മനുഷ്യന്റെ മൂല്യങ്ങള്ക്കും ആന്തരിക സ്വഭാവത്തിനും പ്രാധാന്യം നല്കുന്ന ആത്മീയതയിലാണ് ഫൈസലിന്റെ വിശ്വാസം. വിവിധ മതപാരമ്പര്യങ്ങളുടെയും അടിസ്ഥാനസന്ദേശം നല്ല മനുഷ്യനാകുകയും മറ്റുള്ളവരോട് നന്മയോടെ പെരുമാറുകയും ചെയ്യുക എന്നതാണെന്ന് അദ്ദേഹം പറയുന്നു. വിശ്വാസം തീവ്രവാദപരമാകുകയും മനുഷ്യരെ വിഭജിക്കുകയും ചെയ്യുമ്പോഴാണ് പ്രശ്നങ്ങള് ആരംഭിക്കുന്നത്.
സംഗീതവും യാത്രയും വ്യത്യസ്തരായ മനുഷ്യരുമാണ് ജോലിക്ക് പുറത്തുള്ള അദ്ദേഹത്തിന്റെ ഊര്ജസ്രോതസ്സുകള്. ഓരോ വ്യക്തിയുടെയും പശ്ചാത്തലവും പോരാട്ടങ്ങളും ജീവിതാനുഭവങ്ങളും മനസിലാക്കാനുള്ള കൗതുകം ജീവിതത്തെ സജീവമാക്കുന്നു.
മറ്റൊരാളെ എങ്ങനെ സഹായിക്കാം, മനുഷ്യരോടും മറ്റു ജീവജാലങ്ങളോടും എങ്ങനെ നന്മയോടെ പെരുമാറാം -ഇതാണ് സ്വന്തം ജീവിതത്തിന്റെ വലിയ ലക്ഷ്യമെന്ന് ഫൈസല് പറയുന്നു. എല്ലാറ്റിന്റെയും കേന്ദ്രത്തില് സ്വയം പ്രതിഷ്ഠിക്കുന്നതിനുപകരം മറ്റുള്ളവര്ക്കായി എന്ത് സംഭാവന നല്കാനാകുമെന്ന് ചിന്തിക്കുകയാണ് വേണ്ടത്.
അച്ചടക്കത്തോടെയുള്ള ജീവിതം, ആരോഗ്യത്തിന് നല്കുന്ന മുന്ഗണന, മനുഷ്യരിലുള്ള വിശ്വാസം, അസാധ്യമായതിനെ പരീക്ഷിക്കാനുള്ള കൗതുകം, പണത്തിനപ്പുറമുള്ള ലക്ഷ്യബോധം -ഫൈസല് കൊട്ടിക്കോളന്റെ വിജയത്തിന് പിന്നിലെ ശീലങ്ങള് ഇവയാണ്. വലിയ സ്ഥാപനങ്ങള് പണിയുന്നതിലല്ല, അവയിലൂടെ എത്ര ജീവിതങ്ങള് മെച്ചപ്പെട്ടു എന്നതിലാണ് യഥാര്ഥ വിജയമെന്ന സന്ദേശമാണ് ഫൈസല് കൊട്ടിക്കോളന് കൈമാറുന്നത്.
Read DhanamOnline in English
Subscribe to Dhanam Magazine