വിജയം ഒരു ദിവസം കൊണ്ട് ഉണ്ടാവുന്നതല്ല. ഓരോ ദിവസവും ആവര്ത്തിക്കുന്ന ചെറിയ, സ്ഥിരതയുള്ള പരിശ്രമങ്ങളിലൂടെയാണ് വിജയം രൂപപ്പെടുന്നത്. ചിലപ്പോള് പുരോഗതി വളരെ മന്ദഗതിയിലാണെന്ന് തോന്നാം. നമ്മുടെ പരിശ്രമം ആരും ശ്രദ്ധിക്കുന്നില്ലെന്നും ശരിയായ വഴിയിലാണോ സഞ്ചരിക്കുന്നതെന്നും സംശയിച്ചേക്കാം. എന്നാല് ഓരോ ചെറിയ ചുവടും പ്രധാനമാണ്.
ചെറിയ ചുവടുകളുടെ വലിയ കണക്ക്
ചെറിയ പ്രവര്ത്തനങ്ങള് ഒന്നിനുമേല് ഒന്നായി ചേര്ന്ന് ഒടുവില് അവഗണിക്കാനാകാത്ത ഫലമായി മാറുന്നതിനെയാണ് കോമ്പൗണ്ട് ഇഫക്ട് എന്ന് വിശേഷിപ്പിക്കുന്നത്. സേവിംഗ്സ് അക്കൗണ്ടിലെ പലിശ വളരുന്നതുപോലെയാണ് ഇത്. ദിവസേനയുള്ള മാറ്റം ശ്രദ്ധയില്പ്പെടണമെന്നില്ല. എന്നാല് അതേ ചെറിയ പ്രവര്ത്തനം മാസങ്ങളോളം തുടര്ന്നാല് വളര്ച്ചയുടെ വേഗം നമ്മെ അമ്പരപ്പിക്കും.
വായന തന്നെ ഉദാഹരണമായി എടുക്കാം. ദിവസവും പത്ത് പേജ് വീതം വായിച്ചാല് ഒരു വര്ഷത്തില് 3,650 പേജാകും -വലിയ സമ്മര്ദമില്ലാതെ ഏകദേശം എല്ലാ മാസവും ഒരു പുസ്തകം പൂര്ത്തിയാക്കുന്നതിന് തുല്യം. ഒരൊറ്റ ദിവസം വലിയ മാറ്റം സംഭവിച്ചതായി തോന്നില്ല. എന്നാല് ആ ദിവസങ്ങളുടെയെല്ലാം ആകെ ഫലമാണ് പിന്നീട് വലിയ വിജയമായി മാറുന്നത്.
പ്രചോദനം എല്ലായ്പ്പോഴും ഒരേപോലെ നിലനില്ക്കില്ല. നമ്മുടെ മാനസികാവസ്ഥ, ഉറക്കം, ജോലി, ജീവിതസാഹചര്യങ്ങള് എന്നിവയെ ആശ്രയിച്ച് അത് കൂടുകയും കുറയുകയും ചെയ്യും. എന്നാല് സ്ഥിരതയ്ക്ക് എല്ലായ്പ്പോഴും ശക്തമായ പ്രചോദനം ആവശ്യമില്ല. ഒരു പ്രവൃത്തി വീണ്ടും വീണ്ടും ചെയ്യുമ്പോള് അതുമായി ബന്ധപ്പെട്ട നാഡീപാതകള് തലച്ചോറില് കൂടുതല് ശക്തമാകുന്നു. ന്യൂറോപ്ലാസ്റ്റിസിറ്റി എന്ന് വിളിക്കപ്പെടുന്ന ഈ പ്രക്രിയയിലൂടെ ആദ്യം ഏറെ പരിശ്രമം ആവശ്യമായിരുന്ന കാര്യങ്ങള് പിന്നീട് സ്വാഭാവികമായ ശീലമായി മാറുന്നു.
എളുപ്പമുള്ള ദിവസങ്ങളേക്കാള് പ്രയാസമുള്ള ദിവസങ്ങളില് സ്ഥിരതയോടെ നില്ക്കുന്നതാണ് പ്രധാനപ്പെട്ടത്. നിങ്ങള് ആ ദിവസത്തെ മാത്രം അതിജീവിക്കുകയല്ല -നാളെയുടെ സ്വാഭാവിക ശീലത്തെ പരിശീലിപ്പിക്കുകയാണ്.
* വെല്ലുവിളികള് ഉണ്ടായാലും പഠനം തുടരുക.
* പ്രചോദനം കുറഞ്ഞാലും മുന്നോട്ടുവരിക.
* ഫലം വൈകിയാലും സ്വയം വിശ്വസിക്കുക.
ഇവയ്ക്കൊന്നും അമിതമായ ആവേശമോ വലിയ തീവ്രതയോ ആവശ്യമില്ല. വേണ്ടത് ആവര്ത്തനവും സ്ഥിരതയും മാത്രമാണ്.
ചെറിയ വിജയങ്ങള് പോലും ആഘോഷിക്കുകയും അംഗീകരിക്കുകയും ചെയ്യുന്നത് മുന്നോട്ടുപോകാനുള്ള ഊര്ജവും ആത്മവിശ്വാസവും നല്കുന്നു. ലക്ഷ്യനിര്ണയവുമായി ബന്ധപ്പെട്ട ഒരു പഠനമനുസരിച്ച്, സ്വന്തം പുരോഗതി രേഖപ്പെടുത്തുകയും തിരിച്ചറിയുകയും ചെയ്യുന്നത് വിജയസാധ്യത 42% വരെ വര്ധിപ്പിച്ചേക്കാം എന്നാണ്.
എത്ര വേഗത്തില് ലക്ഷ്യത്തിലെത്തുന്നു എന്നതല്ല വളര്ച്ചയുടെ അളവുകോല്. എത്ര സ്ഥിരതയോടെ മുന്നോട്ടുപോകുന്നു എന്നതാണ് പ്രധാനം. ഒരു ദിവസം മുടങ്ങുന്നത് സാധാരണയായി നിങ്ങളുടെ യാത്രയെ തകര്ക്കില്ല. എന്നാല് തുടര്ച്ചയായി ഒഴിവാക്കുന്നതും വീണ്ടും ആരംഭിക്കാതിരിക്കുന്നതുമാണ് യഥാര്ഥ തടസ്സം.
അതുകൊണ്ട് നിങ്ങളുടെ വേഗത മറ്റുള്ളവരുടേതുമായി താരതമ്യം ചെയ്യരുത്. താരതമ്യം നിങ്ങളുടെ സ്വന്തം യാത്രയ്ക്കായി ഉപയോഗിക്കേണ്ട ഊര്ജമാണ് കവര്ന്നെടുക്കുന്നത്. മുന്നോട്ടുപോകാന് തീരുമാനിക്കുന്ന ഓരോ ദിവസവും നിങ്ങള്ക്കു മാത്രം പൂര്ണമായി കാണാനാകുന്ന വഴിയില് വെക്കുന്ന ഓരോ ഇഷ്ടികയാണ്. ചിലപ്പോള് അത് മതിയാകുന്നില്ലെന്ന് തോന്നിയേക്കാം. പക്ഷേ അതുമതി.
Read DhanamOnline in English
Subscribe to Dhanam Magazine