ഒരു സ്ഥാപനത്തില്‍ പുതിയൊരു ആശയം നടപ്പാക്കാന്‍ തീരുമാനിക്കുന്നു. ഉടമയ്ക്ക് നല്ല ആവേശമാണ്. സമയം ലാഭിക്കാം, പിഴവുകള്‍ കുറയ്ക്കാം, കൂടുതല്‍ കാര്യങ്ങള്‍ ചെയ്യാം. ജീവനക്കാര്‍ക്ക് സംവിധാനം പരിചയപ്പെടുത്തുന്നു. ഇനി എല്ലാവരും അതനുസരിച്ച് പ്രവര്‍ത്തിക്കണമെന്ന് നിര്‍ദേശവും നല്‍കുന്നു. കുറച്ചുദിവസം കഴിഞ്ഞ് നോക്കുമ്പോള്‍ കാര്യങ്ങള്‍ക്ക് വലിയ മാറ്റമില്ല. ചിലര്‍ പുതിയ രീതി ഉപയോഗിക്കുന്നു. മറ്റു ചിലര്‍ പഴയ രീതിയില്‍ത്തന്നെ തുടരുന്നു. ഓരോ തവണ ഓര്‍മിപ്പിക്കുമ്പോഴും ശ്രമമുണ്ടാകും. പിന്നീട് വീണ്ടും പഴയപടി. ഇതോടെ ജീവനക്കാര്‍ക്ക് താല്‍പ്പര്യമില്ലെന്ന നിഗമനത്തിലെത്താന്‍ എളുപ്പമാണ്. എന്നാല്‍ ആ തീരുമാനത്തിലേക്ക് എത്തുന്നതിനുമുമ്പ് അന്വേഷിക്കേണ്ട ചില കാര്യങ്ങളുണ്ട്.
ഒരു കടയില്‍ പുതിയ ബില്ലിങ് സോഫ്റ്റ്‌വെയര്‍ കൊണ്ടുവരുന്ന സാഹചര്യം ഉദാഹരണമായി എടുക്കാം. ഉടമയ്ക്ക് വില്‍പനയും സ്റ്റോക്കും കൃത്യമായി അറിയാന്‍ അത് സഹായിക്കും. കണക്കെടുക്കാനുള്ള സമയവും കുറയും. പക്ഷേ, കൗണ്ടറിലെ ജീവനക്കാരന്റെ അനുഭവം വ്യത്യസ്തമായിരിക്കാം. തിരക്കിനിടയില്‍ പുതിയ സംവിധാനം പഠിക്കാന്‍ സമയം കിട്ടുന്നില്ല. തെറ്റായ ബില്‍ നല്‍കിയാല്‍ തിരുത്താന്‍ അറിയില്ല. ഉപഭോക്താക്കള്‍ കാത്തുനില്‍ക്കുമ്പോള്‍ സഹായിക്കാന്‍ ആരുമില്ല. അതുകൊണ്ട് പരിചിതമായ പഴയ രീതിയിലേക്ക് അയാള്‍ മടങ്ങുന്നു. ഇവിടെ വീണ്ടും നിര്‍ദേശം നല്‍കിയതുകൊണ്ട് മാത്രം പ്രശ്‌നം തീരില്ല. തിരക്കില്ലാത്ത സമയത്ത് പരിശീലനം നല്‍കണം. സംശയങ്ങള്‍ ചോദിക്കാന്‍ ഒരാള്‍ വേണം. ആദ്യ ദിവസങ്ങളില്‍ ജോലി അല്‍പ്പം വൈകാനുള്ള സാധ്യതയും കണക്കിലെടുക്കണം. മാറ്റത്തിന്റെ ഗുണം വിശദീകരിക്കുന്നതിനൊപ്പം അത് പ്രായോഗികമാക്കാനുള്ള സൗകര്യവും ഒരുക്കണം.
പുതിയ സംവിധാനം ഉപയോഗിക്കാന്‍ അറിയാമെങ്കിലും ചിലര്‍ മടിക്കും. അതിന് പിന്നില്‍ മറ്റൊരു ആശങ്കയുണ്ടാകാം. വര്‍ഷങ്ങളായി സ്ഥാപനത്തിലെ കണക്കുകള്‍ കൈകാര്യം ചെയ്യുന്ന ഒരാള്‍ക്ക്, പുതിയ സോഫ്റ്റ്‌വെയര്‍ വരുന്നതോടെ തന്റെ പ്രാധാന്യം കുറയുമെന്ന് തോന്നാം. സ്വന്തം അനുഭവത്തിന്റെ അടിസ്ഥാനത്തില്‍ തീരുമാനങ്ങളെടുത്തിരുന്ന മാനേജര്‍ക്ക്, ഓട്ടോമേഷന്‍ തന്റെ കഴിവിനെ ചോദ്യം ചെയ്യുന്നതായി അനുഭവപ്പെടാം. ഇത്തരം ആശങ്കകള്‍ എല്ലാവരും തുറന്നുപറയണമെന്നില്ല. പകരം, പുതിയ രീതിയുടെ പോരായ്മകള്‍ മാത്രം ചൂണ്ടിക്കാട്ടുകയോ അത് ഉപയോഗിക്കുന്നത് നീട്ടിവയ്ക്കുകയോ ചെയ്‌തേക്കാം. അവരുടെ അനുഭവം എങ്ങനെ തുടര്‍ന്നും പ്രയോജനപ്പെടുത്താമെന്ന് ചര്‍ച്ച ചെയ്യുക. സംവിധാനം തിരഞ്ഞെടുക്കുമ്പോഴും പരീക്ഷിക്കുമ്പോഴും അഭിപ്രായം തേടുക. ഉത്തരവാദിത്തങ്ങളില്‍ എന്ത് മാറ്റമുണ്ടാകുമെന്ന് വ്യക്തമായി പറയുക. യഥാര്‍ഥത്തില്‍ നഷ്ടസാധ്യതയുണ്ടെങ്കില്‍ അതും സത്യസന്ധമായി സംസാരിക്കണം.
ജീവനക്കാരുടെ മടിയുടെ കാരണം ഊഹിച്ചറിയാന്‍ ശ്രമിക്കുന്നതിനെക്കാള്‍ നല്ലത് അവരോട് നേരിട്ട് സംസാരിക്കുന്നതാണ്. കുറ്റപ്പെടുത്തലില്‍ തുടങ്ങുന്ന സംഭാഷണത്തില്‍ നിന്ന് തുറന്ന മറുപടി പ്രതീക്ഷിക്കാനാവില്ല. ജോലി ചെയ്യുമ്പോള്‍ എവിടെയാണ് ബുദ്ധിമുട്ട് വരുന്നതെന്ന് വിശദീകരിക്കാന്‍ അവസരം നല്‍കണം. ആദ്യ സംഭാഷണത്തില്‍ എല്ലാം അറിയണമെന്നുമില്ല. ആദ്യം സമയക്കുറവ് പറയുന്ന ജീവനക്കാരന്‍, പിന്നീട് മാത്രമായിരിക്കും പുതിയ സംവിധാനം കൈകാര്യം ചെയ്യാനാകുമോ എന്ന ഭയം പങ്കുവയ്ക്കുന്നത്. കേട്ട കാര്യങ്ങളില്‍ ചെറിയൊരു പരിഹാരം നടപ്പാക്കുന്നതു പോലും സഹായിക്കും. പരിശീലനത്തിന് സമയം അനുവദിക്കുക, അനാവശ്യമായ ഒരു ഘട്ടം ഒഴിവാക്കുക, സഹായത്തിന് ഒരാളെ നിയോഗിക്കുക. അഭിപ്രായം പറഞ്ഞാല്‍ ഫലമുണ്ടാകുമെന്ന് കണ്ടാല്‍ അടുത്ത തവണ ആളുകള്‍ കൂടുതല്‍ തുറന്നു സംസാരിക്കും.
ഒരു നല്ല ആശയം അവതരിപ്പിക്കുന്നതില്‍ സംരംഭകന്റെ ജോലി അവസാനിക്കുന്നില്ല. അത് ദിവസവും ഉപയോഗിക്കേണ്ടവരുടെ അനുഭവം കൂടി മനസ്സിലാക്കണം. അടുത്ത തവണ ടീം പഴയ രീതിയില്‍ തുടരുന്നത് കാണുമ്പോള്‍, വീണ്ടും ഓര്‍മിപ്പിക്കുന്നതിന് മുമ്പ് അവര്‍ക്കൊപ്പം കുറച്ചുനേരം ജോലി ശ്രദ്ധിച്ചുനോക്കൂ. മീറ്റിങ്ങില്‍ കണ്ടെത്താനാകാത്ത തടസം അവിടെ കാണാനായേക്കാം.
Read DhanamOnline in English
Subscribe to Dhanam Magazine