എറണാകുളം-ആലപ്പുഴ യാത്രയിലെ ഗതാഗതക്കുരുക്ക് ലഘൂകരിക്കും; അതിവേഗ ഇടനാഴിയുടെ റാമ്പ് പണി പുരോഗമിക്കുന്നു

ദേശീയപാത 66-ലെ ഗതാഗതക്കുരുക്ക് കാരണം ഏറെ ബുദ്ധിമുട്ടുന്ന എറണാകുളം-ആലപ്പുഴ യാത്രക്കാർക്ക് വലിയ ആശ്വാസം നൽകാൻ ലക്ഷ്യമിട്ടുള്ള അരൂർ-തുറവൂർ അതിവേഗ ഇടനാഴിയുടെ (Elevated Highway) നിർമ്മാണം നിർണായക ഘട്ടത്തില്‍. 12.75 കിലോമീറ്റർ നീളമുള്ള ഈ ആറ് വരിപ്പാതയിലേക്ക് പ്രവേശിക്കുന്നതിനും പുറത്തുകടക്കുന്നതിനുമുളള റാമ്പുകളുടെ നിർമ്മാണമാണ് ഇപ്പോൾ പുരോഗമിക്കുന്നത്. പൂർത്തിയാകുമ്പോൾ രാജ്യത്തെ ഏറ്റവും നീളമേറിയ സിംഗിൾ-പില്ലേർഡ് ആകാശപാത (Single-pillared skyway) ആയി ഇത് മാറും.

പ്രത്യേക ടോൾ

താഴെയുള്ള തിരക്കേറിയ പ്രാദേശിക ഗതാഗതത്തെ ഒഴിവാക്കി, അതിവേഗത്തിൽ സഞ്ചരിക്കാൻ വാഹനങ്ങളെ സഹായിക്കുന്ന ഈ എലിവേറ്റഡ് ഹൈവേയിലേക്ക് പ്രവേശിക്കുന്നതിനായി മൂന്ന് പ്രത്യേക റാമ്പുകളാണ് നിർമ്മിക്കുന്നത്. അരൂർ, ചന്തിരൂർ, കുത്തിയതോട് എന്നിവിടങ്ങളിലാണ് ഈ റാമ്പുകൾ സ്ഥാപിക്കുന്നത്. ഇതിൽ 401.23 മീറ്റർ നീളമുള്ള കുത്തിയതോടിലെ റാമ്പാണ് ഏറ്റവും വലുത്.

ഈ അതിവേഗ ഇടനാഴി ഉപയോഗിക്കുന്ന വാഹനങ്ങൾ നിലവിലുള്ള ടോളിന് പുറമെ പ്രത്യേക ടോൾ നൽകേണ്ടിവരും. എന്നിരുന്നാലും, ടോൾ ഒഴിവാക്കാൻ ആഗ്രഹിക്കുന്ന യാത്രക്കാർക്ക് സമാന്തരമായ സർവീസ് റോഡ് ഉപയോഗിക്കാവുന്നതാണ്.

വെല്ലുവിളികൾ

ഈ വലിയ പദ്ധതിയുടെ വേഗതയ്ക്ക് ഇപ്പോൾ പ്രധാന തടസമായിരിക്കുന്നത് കെ.എസ്.ഇ.ബി.യുടെ എക്സ്ട്രാ ഹൈ-ടെൻഷൻ വൈദ്യുതി ലൈനുകൾ മാറ്റി സ്ഥാപിക്കുന്നതിലെ കാലതാമസമാണ്. ലൈനുകൾ എത്രയും പെട്ടെന്ന് നീക്കം ചെയ്താൽ, 2026 മാർച്ച് മാസത്തോടെ അരൂർ-തുറവൂർ പാതയുടെ പണി പൂർത്തിയാക്കാൻ കഴിയുമെന്ന് ദേശീയപാത അതോറിറ്റി (NHAI) ഉദ്യോഗസ്ഥർ അറിയിച്ചു.

വൈദ്യുതി ലൈനുകൾ നീക്കം ചെയ്യുന്നതിലെ മെല്ലെപ്പോക്ക് റാമ്പുകളുടെ നിർമ്മാണത്തെയും അതുവഴി അതിവേഗ ഇടനാഴിയുടെ കമ്മീഷനിംഗിനെയും വൈകിപ്പിക്കാൻ സാധ്യതയുണ്ടെന്നും എന്‍.എച്ച്.എ.ഐ ആശങ്കപ്പെടുന്നു. ഈ വെല്ലുവിളികൾ മറികടന്നാൽ, കേരളത്തിലെ യാത്രാ സൗകര്യങ്ങളിൽ ഈ പദ്ധതി ഒരു നാഴികക്കല്ലായി മാറും.

_{Aroor–Thuravoor elevated highway ramps under construction to ease NH 66 traffic congestion between Ernakulam and Alappuzha.}