റെസ്റ്റോറന്റ് ബില്ലുകളിൽ ഇനി എൽ.പി.ജി സർചാർജ് ഈടാക്കരുത്: ഹിഡന്‍ ചാര്‍ജുകള്‍ക്കെതിരെ കര്‍ശന നടപടിയുമായി അധികൃതര്‍

ഹോട്ടലുകളും റെസ്റ്റോറന്റുകളും ഭക്ഷണ ബില്ലുകളിൽ 'എൽപിജി ചാർജ്', 'ഗ്യാസ് സർചാർജ്' അല്ലെങ്കിൽ 'ഇന്ധന ചെലവ് വീണ്ടെടുക്കൽ' (Fuel cost recovery) തുടങ്ങിയ അധിക തുകകൾ ഈടാക്കുന്നത് നിരോധിച്ച് കേന്ദ്ര ഉപഭോക്തൃ സംരക്ഷണ അതോറിറ്റി (CCPA) . ഇത്തരം ചാർജുകൾ ഈടാക്കുന്നത് 2019 ലെ ഉപഭോക്തൃ സംരക്ഷണ നിയമപ്രകാരം 'അന്യായമായ വ്യാപാര രീതി' (Unfair trade practice) ആയി കണക്കാക്കുമെന്ന് അതോറിറ്റി വ്യക്തമാക്കി.

അതേസമയം കേരളത്തിലടക്കം വിവിധ സംസ്ഥാനങ്ങളില്‍ എല്‍പിജി പ്രതിസന്ധി രൂക്ഷമായി തുടരുകയാണ്. കേരളത്തില്‍ പല ഹോട്ടലുകളും മെനുവില്‍ മാറ്റങ്ങള്‍ വരുത്തുന്നത് അടക്കമുളള നടപടികള്‍ സ്വീകരിച്ചാണ് മുന്നോട്ടു പോകുന്നത്. പാചകം ചെയ്യുന്നതിന് തീ കൂടുതല്‍ ആവശ്യമുളള ദോശ അടക്കമുളള ഭക്ഷണങ്ങള്‍ കൊച്ചിയിലെ മിക്ക ഹോട്ടലുകളും ഒഴിവാക്കുകയാണ്.

നിരോധനത്തിന് പിന്നിലെ പ്രധാന കാരണങ്ങൾ

നിർബന്ധിത സർവീസ് ചാർജ് ഈടാക്കുന്നത് നിരോധിച്ചുകൊണ്ടുള്ള മുൻകാല മാർഗനിർദേശങ്ങളെ മറികടക്കാനുള്ള ശ്രമമായാണ് ഇത്തരം സർചാർജുകളെ സിസിപിഎ കാണുന്നത്. പുതിയ കാരണങ്ങള്‍ ചൂണ്ടിക്കാട്ടി ഇത്തരത്തില്‍ നിരക്കുകള്‍ ഈടാക്കുന്നത് നിയമപരമാകില്ല. ഉപഭോക്താവിന്റെ സമ്മതമില്ലാതെ ബില്ലിൽ റെസ്റ്റോറന്റുകള്‍ സ്വന്തമായി ചേർക്കുന്ന ഏത് അധിക ചാർജും നിയമലംഘനമായി കണക്കാക്കും.

മെനു വിലയും സുതാര്യതയും

എൽപിജി, ഇന്ധനം, വൈദ്യുതി എന്നിവ ബിസിനസ് നടത്തുന്നതിന് ആവശ്യമായ പ്രവർത്തന ചെലവുകളാണ്. അതിനാൽ ഇത്തരം ചെലവുകൾ ഭക്ഷണത്തിന്റെയും പാനീയങ്ങളുടെയും മെനു വിലയിൽ (Menu pricing) തന്നെ ഉൾപ്പെടുത്തണം എന്ന് അതോറിറ്റി നിർദ്ദേശിച്ചു. മെനുവിൽ നൽകിയിരിക്കുന്ന വില തന്നെയാകണം ഉപഭോക്താവ് നൽകേണ്ട അന്തിമ തുക, ഇതിൽ ബാധകമായ നികുതികൾ (Taxes) മാത്രമേ പിന്നീട് കൂട്ടിച്ചേർക്കാൻ പാടുള്ളൂ.

ഉപഭോക്താക്കൾക്കുള്ള നിർദേശം: നാഷണൽ കൺസ്യൂമർ ഹെൽപ്പ് ലൈനിൽ ലഭിച്ച നിരവധി പരാതികളെത്തുടർന്നാണ് ഉപഭോക്തൃ സംരക്ഷണ അതോറിറ്റിയുടെ ഈ നടപടി. ബില്ലിൽ ഇത്തരത്തിലുള്ള ഹിഡന്‍ ചാര്‍ജുകൾ ശ്രദ്ധയിൽപ്പെട്ടാൽ, ബില്ലിംഗ് ഘട്ടത്തിൽ തന്നെ അത് ഒഴിവാക്കാൻ ആവശ്യപ്പെടാം. അതിന് തയ്യാറാകാത്ത പക്ഷം ഹെൽപ്പ് ലൈൻ വഴിയോ ഓൺലൈൻ പോർട്ടലുകൾ വഴിയോ ഉപഭോക്തൃ കമ്മീഷനുകളിലോ പരാതി നൽകാവുന്നതാണ്.

ഹോട്ടൽ വ്യവസായത്തെ തങ്ങളുടെ വില നിലവാരം പുനഃക്രമീകരിക്കാൻ പ്രേരിപ്പിക്കുന്നതാണ് ഈ നിര്‍ദേശം. ചെലവ് വർദ്ധിക്കുന്ന സാഹചര്യത്തിൽ, ബില്ലിന്റെ അവസാനം ചാർജുകൾ കൂട്ടിച്ചേർക്കുന്നതിന് പകരം മെനു വിലയിൽ തന്നെ മാറ്റം വരുത്താൻ ഹോട്ടലുകൾ നിർബന്ധിതരാകും.

_{CCPA bans LPG surcharge like hidden charges in restaurant bills, mandating transparent menu pricing and protecting consumer rights.}