മലയോരത്തിന്റെ സ്വപ്നപദ്ധതിക്ക് വീണ്ടും കാത്തിരിപ്പ്? ശബരി റെയില്‍ പദ്ധതിയുടെ ഭൂമിയേറ്റെടുപ്പ് പ്രവര്‍ത്തനങ്ങള്‍ വൈകാന്‍ സാധ്യത

കേരളത്തിലെ മലയോര മേഖലയുടെ സമഗ്ര വികസനം ലക്ഷ്യമിട്ടുളള ശബരി റെയില്‍ പദ്ധതിക്ക് ജീവന്‍ വെച്ചത് കഴിഞ്ഞ ദിവസമാണ്. പദ്ധതിക്കാവശ്യമായ ഫണ്ട് കണ്ടെത്തുന്നതില്‍ തടസമുണ്ടാകില്ലെന്ന് സംസ്ഥാനവും പദ്ധതി യാഥാര്‍ത്ഥ്യമാക്കുന്നതിന് എതിര്‍പ്പുകളിലെന്ന് റെയില്‍വെ മന്ത്രാലയവും നിലപാട് എടുത്തതോടെയാണ് വീണ്ടും വിഷയം ജനങ്ങളുടെ ശ്രദ്ധയാകര്‍ഷിക്കുന്നത്. എന്നാല്‍ തിരഞ്ഞെടുപ്പ് കാലങ്ങളില്‍ ഇടയ്ക്കിടെ സജീവ ചര്‍ച്ചകള്‍ നടക്കുമെന്നല്ലാതെ പദ്ധതിക്ക് അനക്കം വെക്കുന്നില്ലെന്ന വികാരം മലയോര മേഖലയിലെ ജനങ്ങള്‍ പങ്കുവെക്കുന്നുണ്ട്.

റെയില്‍വെ ചുമതലയുളള മന്ത്രി വി. അബ്ദുറഹ്മാൻ കഴിഞ്ഞ ദിവസങ്ങളില്‍ നടത്തിയ പ്രതികരണത്തോടെ പദ്ധതി യാഥാര്‍ത്ഥ്യമാക്കാന്‍ ആവശ്യമായ നടപടികള്‍ വേഗത്തില്‍ സ്വീകരിക്കുന്നുവെന്ന തോന്നലാണ് ഉണ്ടാക്കിയത്. എന്നാല്‍ ഭൂമി ഏറ്റെടുക്കൽ പ്രക്രിയ പുനരാരംഭിക്കുന്നത് വൈകാൻ സാധ്യതയുളളതായാണ് വിലയിരുത്തല്‍. ആവശ്യമായ സാങ്കേതിക നടപടിക്രമങ്ങൾ പൂർത്തിയാക്കാൻ സമയം എടുക്കുമെന്നതിനാലാണ് ഇത്. ഭൂമി ഏറ്റെടുക്കൽ, പുനരധിവാസം എന്നിവയിൽ നഷ്ടപരിഹാരത്തിനും സുതാര്യതയ്ക്കുമുള്ള അവകാശ നിയമം (LARR Act), 2013 അവതരിപ്പിക്കുന്നതിന് മുമ്പാണ് ശബരി പദ്ധതിക്കാവശ്യമായ ഭൂമി ഏറ്റെടുക്കുന്നതിനുള്ള പ്രാരംഭ വിജ്ഞാപനം പുറപ്പെടുവിച്ചത്. അതിനാൽ പുതിയ നിയമനിർമ്മാണത്തിന് അനുസൃതമായി മുഴുവൻ പ്രക്രിയയും പുനരാരംഭിക്കേണ്ട സാഹചര്യത്തിലാണ് സർക്കാർ.

പുതിയ ഓഫീസുകൾ തുറക്കും

ഭൂമി ഏറ്റെടുക്കലിനുള്ള പുതിയ സർക്കാർ ഉത്തരവ് ഉടൻ പുറപ്പെടുവിക്കുമെന്നാണ് കരുതുന്നത്. ഇതിനായി പദ്ധതി ധനകാര്യ വകുപ്പ് അവലോകനം ചെയ്ത് അംഗീകരിക്കേണ്ടതുണ്ട്. വി. അബ്ദുറഹ്മാന്റെ അദ്ധ്യക്ഷതയില്‍ എറണാകുളം, ഇടുക്കി, കോട്ടയം ജില്ലാ കളക്ടർമാർ പങ്കെടുത്ത യോഗത്തില്‍ പെരുമ്പാവൂരിലെയും പാലായിലെയും ഭൂമി ഏറ്റെടുക്കൽ ഓഫീസുകൾ വീണ്ടും തുറക്കാന്‍ തീരുമാനിച്ചിട്ടുണ്ട്. മൂവാറ്റുപുഴയിലും കാഞ്ഞിരപ്പള്ളിയിലും പുതിയ ഓഫീസുകൾ സ്ഥാപിക്കും. റെയിൽവേ ലൈനിന്റെ നിലവിലുള്ള അലൈൻമെന്റ് നിലനിർത്തുന്നതാണ്. ഭൂമി ഏറ്റെടുക്കലും നിർമ്മാണവും ഒരേസമയം മുന്നോട്ട് കൊണ്ടുപോകാൻ കഴിയുന്ന തരത്തിലാണ് അധികൃതര്‍ പദ്ധതി ആസൂത്രണം ചെയ്യുന്നത്.

മൂന്ന് പതിറ്റാണ്ടിന്റെ കാത്തിരിപ്പ്

എറണാകുളം, കോട്ടയം, ഇടുക്കി ജില്ലകളിൽ ഏകദേശം 204 ഹെക്ടർ ഭൂമി കൂടി ഏറ്റെടുക്കേണ്ടി വരുമെന്നാണ് കരുതുന്നത്. അതേസമയം കാലടി മുതൽ കോട്ടയത്തെ രാമപുരം വരെയുള്ള 2,000 ത്തിലധികം കുടുംബങ്ങൾ ഏറ്റെടുക്കലിനായി ഭൂമി അടയാളപ്പെടുത്തിയതിനാൽ അവരുടെ സ്വത്തുക്കൾ വിൽക്കാനോ പണയപ്പെടുത്താനോ കഴിയാത്ത വിഷമസന്ധിയിലാണ്.

അടുത്ത മാസം ആദ്യം ഇന്ത്യൻ റെയിൽവേയിൽ നിന്നുള്ള ഉന്നതതല സംഘത്തിന്റെ സന്ദർശനത്തോടെ പദ്ധതിയുടെ പ്രവർത്തനങ്ങൾ ഔപചാരികമായി ആരംഭിക്കാന്‍ സാധിക്കുമെന്ന പ്രതീക്ഷയിലാണ് അധികൃതര്‍. 1997-98 ലെ ബജറ്റിലാണ് പാതയ്ക്ക് ആദ്യമായി അനുമതി ലഭിക്കുന്നത്. 3,810 കോടി രൂപയാണ് പദ്ധതിക്ക് കണക്കാക്കുന്ന ചെലവ്. 111.48 കിലോമീറ്റർ റെയില്‍ പാത മൂന്ന് പതിറ്റാണ്ടുകാലത്തെ കാത്തിരിപ്പിനുശേഷം യാഥാർത്ഥ്യമായാൽ മലയോര ജില്ലയായ ഇടുക്കിയിലേക്കുള്ള ആദ്യത്തെ റെയിൽവേ ലിങ്കായി മാറും ഇത്. കൂടാതെ എറണാകുളം, കോട്ടയം ജില്ലകളിലെ മലയോര മേഖലയുടെ സമഗ്ര വികസനത്തിന്റെ പ്രധാന കേന്ദ്രമായി മാറാനും പദ്ധതിക്കാകും.

_{Delays in land acquisition and legal procedures continue to stall Kerala's long-pending Sabari Rail project despite renewed government focus.}