എട്ടാം ശമ്പള കമ്മീഷൻ വൈകിയാൽ ജീവനക്കാർക്കും പെൻഷൻകാർക്കും പണം നഷ്ടപ്പെടുമോ? എത്ര പണം നഷ്ടമാകും?

ഏഴാം ശമ്പള കമ്മീഷന്റെ കാലാവധി 2025 ഡിസംബർ 31 ന് അവസാനിക്കും. അതനുസരിച്ച് എട്ടാം ശമ്പള കമ്മീഷൻ 2026 ജനുവരി 1 മുതൽ പ്രാബല്യത്തിൽ വരേണ്ടതാണ്. എന്നാല്‍ 2025 നവംബറിൽ ധനകാര്യ മന്ത്രാലയം എട്ടാം ശമ്പള കമ്മീഷന് റിപ്പോർട്ട് സമർപ്പിക്കാൻ 18 മാസത്തെ സമയം നൽകി. അതിനാല്‍ കമ്മീഷന്റെ ശുപാർശകൾ നടപ്പിലാക്കുന്നത് 2028 വരെ വൈകിയേക്കാം. ശമ്പള പരിഷ്കരണം മുൻകാല പ്രാബല്യത്തോടെ നടപ്പിലാക്കിയാലും ചില ആനുകൂല്യങ്ങൾ മുൻകാല പ്രാബല്യത്തോടെ (Arrears) ലഭിക്കില്ല എന്നതാണ് ജീവനക്കാർ നേരിടുന്ന പ്രധാന വെല്ലുവിളി.

എത്ര രൂപ നഷ്ടമാകും?

ഒരു ജീവനക്കാരന്റെ അടിസ്ഥാന ശമ്പളം (Basic Pay) 76,500 രൂപയാണെങ്കിൽ, രണ്ട് വർഷത്തെ കാലതാമസം മൂലം ഏകദേശം 3.8 ലക്ഷം രൂപ വരെ നഷ്ടപ്പെടാൻ സാധ്യതയുണ്ട്. ഇതിന്റെ പ്രധാന കാരണം വീട്ടുവാടക അലവൻസ് (HRA) ആണ്.

എന്തുകൊണ്ട് ഈ നഷ്ടം സംഭവിക്കുന്നു? ശമ്പള പരിഷ്കരണം വൈകുമ്പോൾ, അടിസ്ഥാന ശമ്പളത്തിന്റെ കുടിശ്ശിക പിന്നീട് ലഭിക്കുമെങ്കിലും, താഴെ പറയുന്ന അലവൻസുകൾക്ക് കുടിശ്ശിക ലഭിക്കാറില്ല:

വീട്ടുവാടക അലവൻസ് (HRA): പുതിയ ശമ്പള പരിഷ്കരണം നടപ്പിലാക്കുന്ന തീയതി മുതൽ മാത്രമേ വർധിപ്പിച്ച HRA ലഭിക്കൂ. 2026 ജനുവരിയിൽ ലഭിക്കേണ്ട വർധനവ് 2028-ലാണ് ലഭിക്കുന്നതെങ്കിൽ, ഇടയിലുള്ള രണ്ട് വർഷത്തെ വർധനവ് ജീവനക്കാരന് നഷ്ടമാകും.

യാത്രാ അലവൻസ് (TA), യൂണിഫോം അലവൻസ്: ഇത്തരം ഫിക്സഡ് അലവൻസുകൾക്കും കുടിശ്ശിക ലഭിക്കില്ല.

ക്ഷാമബത്ത (DA): പുതിയ പേ കമ്മീഷൻ വരുമ്പോൾ DA അടിസ്ഥാന ശമ്പളത്തിൽ ലയിപ്പിക്കുകയാണ് (Fitment Factor) പതിവ്. അതിനാൽ DA കുടിശ്ശികയും ലഭിക്കില്ല.

ചുരുക്കത്തിൽ ശമ്പള കമ്മീഷൻ നടപ്പിലാക്കുന്നത് എത്രത്തോളം വൈകുന്നുവോ, അത്രത്തോളം വലിയ തുകയായിരിക്കും HRA പോലുള്ള ആനുകൂല്യങ്ങളുടെ രൂപത്തിൽ ജീവനക്കാർക്കും പെൻഷൻകാർക്കും നഷ്ടപ്പെടുക.

_{Delays in the 8th Pay Commission could cost employees and pensioners lakhs due to missed allowances like HRA.}