നടപടിക്രമങ്ങളിലെ കാലതാമസങ്ങളും ഉദ്യോഗസ്ഥ തടസങ്ങളും കാരണം ഭൂമി ഇടപാടുകളുമായി ബന്ധപ്പെട്ട നടപടികള് വളരെയധികം നീണ്ടുപോകുന്നത് സാധാരണമായിരിക്കുകയാണ്. ഫയലുകളുടെ വേഗത്തിലുള്ള തീർപ്പാക്കലും രേഖകളുടെ കൃത്യതയും ഉറപ്പാക്കുന്നതിനുളള ഏകജാലക ഓണ്ലൈന് സംവിധാനമാണ് 'എന്റെ ഭൂമി'.
കാസർഗോഡിലെ ഉജറുൾവാർ ഗ്രാമത്തിൽ നടത്തിയ പരീക്ഷണ ഘട്ടം വിജയകരമായിരുന്നു. ഒരു മാസത്തിനുള്ളിൽ ഓരോ ജില്ലയിൽ നിന്നും കുറഞ്ഞത് ഒരു ഗ്രാമത്തെയെങ്കിലും 'എന്റെ ഭൂമി' ഏകജാലക പോർട്ടലിൽ ഉൾപ്പെടുത്താൻ ഒരുങ്ങുകയാണ് അധികൃതര്.
നിലവിൽ ഉജറുൾവാറിലെ ഭൂമി ഇടപാടുകൾ 'എന്റെ ഭൂമി' പോർട്ടൽ വഴിയാണ് നടത്തുന്നത്.
വാങ്ങുന്നയാളോ വിൽക്കുന്നയാളോ പോർട്ടൽ വഴി തണ്ടപ്പർ സർട്ടിഫിക്കറ്റിനും നിർദ്ദിഷ്ട ഭൂമിയുടെ സർവേ സ്കെച്ചിനും അപേക്ഷിക്കേണ്ടതാണ്.
ഇവ യഥാക്രമം വില്ലേജ് ഓഫീസും സർവേ ഓഫീസും പോർട്ടലിലേക്ക് അപ്ലോഡ് ചെയ്യുന്നു. തുടർന്ന് ഭൂവുടമ പോർട്ടലിൽ ലഭ്യമായ ഇടപാട് രേഖയുടെ ടെംപ്ലേറ്റ് പൂരിപ്പിക്കുന്നു.
ഭൂമിയുടെ വിശദാംശങ്ങൾ ഓട്ടോമാറ്റിക് ആയി കമ്പ്യൂട്ടറില് ദൃശ്യമാകുന്നതോടെ വിൽപ്പനക്കാരന് ഇടപാടുമായി ബന്ധപ്പെട്ട ഏതെങ്കിലും പ്രത്യേക വ്യവസ്ഥകൾ പട്ടികപ്പെടുത്താൻ സാധിക്കുന്നതാണ്. തുടർന്ന് ഇത് ഓൺലൈനായി രജിസ്ട്രേഷൻ വകുപ്പിന് സമർപ്പിക്കും.
ഇടപാട് പ്രക്രിയ പൂർത്തിയാക്കിയ ശേഷം, രജിസ്ട്രേഷൻ വകുപ്പ് ബന്ധപ്പെട്ട മാറ്റങ്ങള്ക്കായി വില്ലേജ് ഓഫീസിലേക്കും ലാൻഡ് പാഴ്സൽ മാപ്പിൽ (എൽപിഎം) തുടർന്നുള്ള മാറ്റങ്ങൾക്കായി സർവേ വകുപ്പിലേക്കും രേഖ സമർപ്പിക്കുന്നതാണ്.
പോർട്ടൽ വഴി ഭൂനികുതി അടയ്ക്കാനും സാധിക്കുന്നതാണ്.
ഭൂമി കൈമാറ്റം, ഭൂമി രജിസ്ട്രേഷനുള്ള ടെംപ്ലേറ്റ്, എൻകംബ്രൻസ് സർട്ടിഫിക്കറ്റ്, ഭൂനികുതി അടയ്ക്കൽ, ന്യായവില വിവരങ്ങൾ, ലൊക്കേഷൻ സ്കെച്ച്, ഭൂമിയുടെ പുനർവർഗ്ഗീകരണം തുടങ്ങിയ സേവനങ്ങളാണ് 'എന്റെ ഭൂമി' പോർട്ടൽ വഴി വാഗ്ദാനം ചെയ്യാന് ഉദ്ദേശിക്കുന്നത്.
Kerala's 'Ente Bhoomi' portal to streamline and digitize land transactions with transparency.
Read DhanamOnline in English
Subscribe to Dhanam Magazine