സംസ്ഥാനത്ത് സ്വര്ണവിലയില് ഇന്ന് കുതിപ്പ്. ഗ്രാമിന് 35 രൂപ ഉയര്ന്ന് 9,390 രൂപയിലെത്തിയപ്പോള് പവന് വില 75,120 രൂപയായി. പവന് 280 രൂപയാണ് ഇന്നത്തെ വര്ധന. ഇന്നലെയും സ്വര്ണവില വര്ധിച്ചിരുന്നു. വിവാഹ സീസണ് സജീവമായിരിക്കേ പൊന്നിന്റെ വില വര്ധിക്കുന്നത് വില്പനയെ ബാധിക്കുമെന്ന ആശങ്ക വ്യാപാരികള്ക്കുണ്ട്.
ലൈറ്റ് വെയിറ്റ് ആഭരണങ്ങള് നിര്മിക്കാന് ഉപയോഗിക്കുന്ന 18 കാരറ്റ് സ്വര്ണത്തിന്റെ വില 30 രൂപ വര്ധിച്ച് 7,710 രൂപയായി. വെള്ളിവില 126 രൂപയില് തന്നെ നില്ക്കുന്നു. അന്താരാഷ്ട്ര വിപണിയിലെ ഉയര്ച്ചയാണ് സംസ്ഥാനത്തും സ്വര്ണത്തെ ഉയര്ത്തുന്നത്.
ഓണവും കല്യാണ സീസണും ഒരുമിച്ചെത്തിയതോടെ വലിയ തോതില് വില്പന ഉയരുമെന്ന പ്രതീക്ഷയിലാണ് വ്യാപാരികള്. കഴിഞ്ഞ ദിവസങ്ങളിലെല്ലാം നല്ലരീതിയില് ജുവലറികളില് തിരക്ക് അനുഭവപ്പെടുന്നുണ്ട്. പണിക്കൂലിയില് അടക്കം ഓഫറുകള് നല്കി ഉപയോക്താക്കളെ ആകര്ഷിക്കുന്ന തിരക്കിലാണ് വ്യാപാരികള്.
സ്വര്ണത്തിന് അനിയന്ത്രിതമായി വില ഉയര്ന്നാല് വില്പന കുറച്ചേക്കാമെന്ന ആശങ്ക വ്യാപാരികള്ക്കുണ്ട്. എന്നാല് സ്വര്ണവും മലയാളികളുടെ അഭിമാന ബോധവും പരസ്പര പൂരകങ്ങളായി കിടക്കുന്നതിനാല് വലിയ കുറവുണ്ടാകില്ലെന്ന പ്രതീക്ഷയും അവര് പങ്കുവയ്ക്കുന്നു.
ഇന്ന് ഒരു പവന് സ്വര്ണത്തിന്റെ വില 75,120 രൂപയാണെങ്കിലും ഇതേ തൂക്കത്തിലുള്ള സ്വര്ണാഭരണം വാങ്ങാന് അതിലുമേറെ നല്കേണ്ടി വരും. പണിക്കൂലി, നികുതി, ഹാള്മാര്ക്കിംഗ് ചാര്ജ് എന്നിവയും ചേര്ത്താണ് ആഭരണ വില നിശ്ചയിക്കുക. അതുപ്രകാരം കുറഞ്ഞത് അഞ്ച് ശതമാനം പണിക്കൂലി കണക്കാക്കിയാലും ഒരു പവന് സ്വര്ണാഭരണത്തിന് ഇന്ന് 81,300 രൂപയ്ക്ക് അടുത്താകും.
Read DhanamOnline in English
Subscribe to Dhanam Magazine