ഇന്ത്യന് ബഹിരാകാശ ഗവേഷണ കേന്ദ്രം (ഐ.എസ്.ആര്.ഒ) ഇലോണ് മസ്കിന്റെ ഉടമസ്ഥതയിലുള്ള സ്പേസ് എക്സുമായി കൈകോര്ത്തു. സ്പേസ് എക്സിന്റെ ഫാല്ക്കണ്-9 റോക്കറ്റില് ആശയവിനിമയ ഉപഗ്രഹമായ ജിസാറ്റ്-എന് 2 വിക്ഷേപിക്കുമെന്ന് ഐ.എസ്.ആര്.ഒ അറിയിച്ചു. ഈ വര്ഷം ഏപ്രിലിനും ജൂണിനും ഇടയില് ഫ്ളോറിഡയിലെ കെന്നഡി സ്പേസ് സെന്ററില് നിന്നാണ് വിക്ഷേപണം.
ഐ.എസ്.ആര്.ഒയുടെ ഈ വര്ഷത്തെ പ്രധാന ഉപഗ്രഹവിക്ഷേപണ ദൗത്യങ്ങളിലൊന്നാണിത്. ഫാല്ക്കാന് 9 റോക്കറ്റ് ജിസാറ്റ് എന് 2വിനെ ഭൂമിയില് നിന്ന് 37,000 കിലോമീറ്റര് അകലെയുള്ള ജിയോ സിങ്ക്രണൈസ് ഭ്രമണപഥത്തില് എത്തിക്കും. ഐ.എസ്.ആര്.ഒയുടെ വാണിജ്യവിഭാഗമായ ന്യൂ സ്പേസ് ഇന്ത്യ ലിമിറ്റഡാണ് (എന്.എസ്.ഐ.എല്) ജിസാറ്റ്-എന് 2വിന്റെ തുടര്പ്രവര്ത്തനങ്ങളും നിയന്ത്രണവും കൈകാര്യം ചെയ്യുക.
ഭാരം കൂടിയ ഉപഗ്രഹമായതിനാലാണ് ജിസാറ്റ്-എന് 2വിന്റെ വിക്ഷേപണത്തിന് ഹെവി ലിഫ്റ്റ് ലോഞ്ചറായ ഫാല്ക്കണ് 9 റോക്കറ്റിന്റെ സേവനം തേടുന്നത്. 4,700 കിലോ ഗ്രാമാണ് ജിസാറ്റ് -20യുടെ ഭാരം. നിലവില് ഐ.എസ്.ആര്.ഒയുടെ പക്കലുള്ള ഏറ്റവും ശക്തമായ എല്.വി.എം 3 റോക്കറ്റിന് 4,000 കിലോ വരെ മാത്രമേ വഹിക്കാനാകൂ. ജിസാറ്റ് ശ്രേണിയില് ജിസാറ്റ്-24 ആണ് ഇതിന് മുന്പ് വിക്ഷേപിച്ചത്.
വിദൂര പ്രദേശങ്ങളില് ബ്രോഡ് ബാന്ഡ് ഇന്റര്നെറ്റ് സേവനം ലഭ്യമാക്കാന് ലക്ഷ്യമിട്ടാണ് ജിസാറ്റ്-എന് 2 വിക്ഷേപിക്കുന്നത്. ലക്ഷദ്വീപ്, ആന്ഡമാന് നിക്കോബാര് ദ്വീപുകള് എന്നിവ ഉള്പ്പെടെ രാജ്യം മുഴുവന് 48 ജി.ബി.പി.എസ് കപ്പാസിറ്റിയില് ഇന്റര്നെറ്റ് സേവനം ലഭിക്കും. നിലവില് 11 ആശയവിനിമയ ഉപഗ്രഹങ്ങളാണ് ന്യൂ സ്പേസ് ഇന്ത്യ സ്വന്തമായി പ്രവര്ത്തിപ്പിക്കുന്നത്.
Read DhanamOnline in English
Subscribe to Dhanam Magazine