രാജ്യം മുഴുവന് ജനുവരി രണ്ട് മുതല് കോവിഡ് വാക്സിന് ഡ്രൈ റണ്. കോവിഡ് വാക്സിന്റെ ഉപയോഗത്തിന് ഡ്രഗ്സ് കണ്ട്രോളര് ജനറല് ഡോ. വിജി സോമനി ഉടന് അനുമതി ഒപ്പിട്ടേക്കുമെന്നാണ് പുറത്തുവരുന്ന റിപ്പോര്ട്ടുകള്. കോവിഡ് വാക്സിന്റെ അടിയന്തിര ഉപയോഗത്തിന് അനുമതി നല്കുന്നതുമായി ബന്ധപ്പെട്ട് വെള്ളിയാഴ്ച നിര്ണായക യോഗം ചേരാനിരിക്കെയാണ് ഡ്രഗ്സ് കണ്ട്രോളര് ജനറലിന്റെ സൂചന.
ഇതിനോടകം നാല് സംസ്ഥാനങ്ങളില് രണ്ട് ദിവസത്തെ ഡ്രൈ റണ് വിജയകരമായി സംഘടിപ്പിച്ചിരുന്നു. ആന്ധ്ര പ്രദേശിലെ കൃഷ്ണ, ഗുജറാത്തിലെ രാജ്കോട്ട്, ഗാന്ധി നഗര്, ലുധിയാന, പഞ്ചാബിലെ ഷഹീദ് ഭഗത് സിംഗ് നഗര് (നവന്ഷഹര്), അസമിലെ സോണിത്പുര്, നല്ബാരി എന്നീ ജില്ലകളിലാണ് രണ്ട് ദിവസത്തെ ഡ്രൈ റണ് നടത്തിയത്. ജനുവരി 2 മുതല് എല്ലാ സംസ്ഥാനങ്ങളിലേക്കും ഡ്രൈ റണ് വ്യാപിപ്പിക്കാനുള്ള അന്തിമ തയ്യാറെടുപ്പുകള് നടക്കുന്നതായി കേന്ദ്ര ആരോഗ്യ മന്ത്രാലയവുമായി ബന്ധപ്പെട്ട വൃത്തങ്ങള് പറഞ്ഞു.
വ്യാഴാഴ്ച നടന്ന ഉന്നതതല യോഗത്തിലെ തീരുമാനത്തെതുടര്ന്ന് സംസ്ഥാന-ജില്ല പ്രോഗ്രാം ഓഫീസര്മാരുമായി ചേര്ന്ന് ആരോഗ്യമന്ത്രാലയം ജോയിന്റ് സെക്രട്ടറി അവലോകന യോഗം നടത്തിയിരുന്നു. ഡ്രൈറണ് വിജയകരമായി പൂര്ത്തിയാക്കിയതായി വ്യക്തമായതിനെ തുടര്ന്നാണ് എല്ലാ സംസ്ഥാനങ്ങളിലും ദ്രുതഗതിയില് ഡ്രൈറണ് സംഘടിപ്പിക്കുന്നതെന്ന് ആരോഗ്യമന്ത്രാലയം വ്യക്തമാക്കി.
കോവിഡ് വാക്സിന് വിതരണ സംവിധാനം സജ്ജമാക്കല്, വിവരങ്ങള് അപ്ലോഡ് ചെയ്യല്, ജില്ലകളില് വാക്സിനുകള് സ്വീകരിക്കുന്നതും വാക്സിനേഷന് അനുവദിക്കുന്നതുമായി ബന്ധപ്പെട്ട കാര്യങ്ങള്, വാക്സിനേഷന് ടീമിനെ വിന്യസിക്കല്, സെഷന് സൈറ്റില് സാധനങ്ങള് എത്തിക്കല്, വാക്സിനേഷന് നടത്തുന്നതിന്റെ മോക്ക് ഡ്രില്, ബ്ലോക്ക്-ജില്ല-സംസ്ഥാന തല യോഗങ്ങളിലെ റിപ്പോര്ട്ടിംഗ്, അവലോകനം എന്നിവയെല്ലാം സാങ്കേതികതയുടെ സഹായത്തോടെ തന്നെ ചെയ്യും.
Read DhanamOnline in English
Subscribe to Dhanam Magazine