ടാറ്റ സൺസിന്റെ ഐപിഒ നിർബന്ധമോ ഒഴിവാക്കാനാകുമോ എന്ന ചർച്ച ആർബിഐയുടെ ചട്ടങ്ങൾക്കനുസരിച്ച് ശക്തമാകുന്നു. ട്രസ്റ്റുകളുടെ ലയന നിർദേശവും ബോർഡിന്റെ നിലപാടും നിർണായകമാകുമ്പോൾ, ധനകാര്യ ആസ്തികളുടെ മേൽക്കൈ തുടരുന്നുണ്ടോ എന്ന് ആർബിഐ സൂക്ഷ്മമായി പരിശോധിക്കും.
പൊതുഫണ്ടുകളിലേക്ക് (Public Funds) നേരിട്ടോ പരോക്ഷമായോ പ്രവേശനമുള്ള വൻകിട ബാങ്ക് ഇതര ധനകാര്യ സ്ഥാപനങ്ങളും (NBFC) കോർ ഇൻവെസ്റ്റ്‌മെന്റ് കമ്പനികളും (CIC) റിസർവ് ബാങ്കിൽ (ആർബിഐ) നിർബന്ധമായും രജിസ്റ്റർ ചെയ്യണമെന്ന് ഗവർണർ സഞ്ജയ് മൽഹോത്ര വ്യക്തമാക്കിയതോടെ ബിസിനസ് ലോകം ടാറ്റ ഗ്രൂപ്പിലേക്ക് ഉറ്റുനോക്കുന്നു. ഉയർന്ന തട്ടിലുള്ള (Upper Layer) ധനകാര്യ സ്ഥാപനങ്ങൾക്ക് ഓഹരി വിപണിയിലെ ലിസ്റ്റിങ് നിർബന്ധമാണെന്നും, എന്നാൽ പൊതുഫണ്ടുകൾ കൈകാര്യം ചെയ്യാത്ത സി.ഐ.സികൾക്ക് രജിസ്ട്രേഷൻ ഒഴിവാക്കാമെന്നും ഇക്കഴിഞ്ഞ വെള്ളിയാഴ്ച നടന്ന ഒരു ചടങ്ങിനിടെ അദ്ദേഹം പ്രതികരിച്ചിരുന്നു.
ഇതോടെ, നിലവിൽ 'അപ്പർ ലെയർ' വിഭാഗത്തിൽപ്പെടുന്ന ടാറ്റ ഗ്രൂപ്പിന്റെ പ്രൊമോട്ടർ കമ്പനിയായ ടാറ്റ സൺസിന് ഐപിഒ (IPO) അനിവാര്യമായി വരുമോ അതോ ഒഴിവാക്കാനാകുമോ എന്ന ചർച്ച വീണ്ടും ശക്തമായിരിക്കുകയാണ്. 2026 മാർച്ചിലെ കണക്കുകൾ പ്രകാരം ഏകദേശം 1.75 ലക്ഷം കോടി രൂപയുടെ ആസ്തിയുള്ള ടാറ്റ സൺസിന് മുന്നിൽ ഇപ്പോൾ പ്രധാനമായും രണ്ട് വഴികളാണുള്ളത്. ഒന്നുകിൽ ഡയറക്ടർ ബോർഡിന്റെ അംഗീകാരത്തോടെയുള്ള ലിസ്റ്റിങ് നടപടികളുമായി മുന്നോട്ട് പോവുക അല്ലെങ്കിൽ ടാറ്റ ട്രസ്റ്റുകൾ ആവശ്യപ്പെടുന്നതുപോലെ ഗ്രൂപ്പ് കമ്പനികളുടെ ലയന സാധ്യതകൾ പരിശോധിക്കുക. ആർബിഐ മാനദണ്ഡങ്ങളിൽ ഏത് നിബന്ധനയാകും ടാറ്റ സൺസിന് ബാധകമാവുക എന്നതിനെ ആശ്രയിച്ചിരിക്കും കമ്പനിയുടെ അടുത്ത നീക്കം.
2022 സെപ്റ്റംബറിലാണ് ടാറ്റ സൺസ് ആർബിഐയുടെ ഉയർന്ന തട്ടിലുള്ള എൻബിഎഫ്സികളുടെ വിഭാഗത്തിൽ ഉൾപ്പെട്ടത്. തുടർന്ന് ഇത്തരം കമ്പനികളുടെ ലിസ്റ്റിങ്ങിന് മൂന്നു വർഷത്തെ സാവകാശം അനുവദിച്ചു. എന്നാൽ കമ്പനിയുടെ കടം തിരിച്ചടച്ച ശേഷം 2024 മാർച്ചിൽ സി.ഐ.സി രജിസ്ട്രേഷൻ ഒഴിവാക്കാൻ ടാറ്റ സൺസ് അപേക്ഷ നൽകി. ഈ അപേക്ഷ പരിഗണനയിലിരിക്കെ 2025 സെപ്റ്റംബറിൽ ഓഹരി വിപണിയിൽ ലിസ്റ്റ് ചെയ്യാൻ അനുവദിച്ചിരുന്ന സമയപരിധി കഴിഞ്ഞു. ഈ സെപ്റ്റംബർ 11-ന് ആർ.ബി.ഐ അപേക്ഷ തള്ളുകയും ചട്ടങ്ങൾ പൂർണമായി പാലിക്കാൻ നിർദേശിക്കുകയും ചെയ്തു. 2026 സെപ്റ്റംബർ 17-ന് ടാറ്റ സൺസ് ബോർഡ്, ലിസ്റ്റിങ്ങുമായി ബന്ധപ്പെട്ട നടപടികൾക്ക് അംഗീകാരം നൽകി.
66 ശതമാനം ഓഹരി വിഹിതം സ്വന്തമായുള്ള ടാറ്റ ട്രസ്റ്റുകൾ, ടാറ്റ ഇലക്ട്രോണിക്സ് സിസ്റ്റംസ് സൊല്യൂഷൻസ് (TESS), ടാറ്റ കൺസൾട്ടിങ് എൻജിനീയേഴ്സ് (TCE) എന്നിവയെ ടാറ്റ സൺസിൽ ലയിപ്പിക്കണമെന്ന് ബോർഡിനോട് ആവശ്യപ്പെട്ടു. ലയനം യാഥാർഥ്യമായാൽ, 2026 മാർച്ച് 31-ലെ കണക്കുകൾപ്രകാരം ടാറ്റ സൺസിന്റെ മൊത്തം പ്രവർത്തന വരുമാനം 1,05,043 കോടി രൂപയായി വർധിക്കും. മറുവശത്ത് ധനകാര്യ ആസ്തികളിൽ നിന്നുള്ള വരുമാനം 40,072 കോടി രൂപയായി പരിമിതപ്പെടും എന്നാണ് ട്രസ്റ്റുകളുടെ വിലയിരുത്തൽ.
ഇതോടെ ടാറ്റ സൺസിന്റെ പ്രധാന വരുമാന സ്രോതസ്സ്, ധനകാര്യ ബിസിനസിൽ നിന്നുമല്ലാതാകുമെന്നും, അതിനാൽ വൻകിട എൻബിഎഫ്സികൾക്കുള്ള കടുത്ത ആർബിഐ മാനദണ്ഡങ്ങളിൽ നിന്ന് ഇളവ് ലഭിക്കുമെന്നുമാണ് ട്രസ്റ്റുകളുടെ കണക്കുകൂട്ടൽ. എങ്കിലും ഈ നീക്കം അത്ര എളുപ്പമാകില്ല. ആർബിഐയുടെ നിലപാടും ബോർഡിന്റെ അന്തിമ തീരുമാനവുമായിരിക്കും ടാറ്റയുടെ കോർപ്പറേറ്റ് ഘടനയിൽ വരാനിരിക്കുന്ന ഈ വൻ മാറ്റത്തെ നിർണ്ണയിക്കുക.
ടാറ്റ സൺസിനെ ലയിപ്പിക്കാനുള്ള നീക്കങ്ങൾ സജീവമാണെങ്കിലും, റിസർവ് ബാങ്കിന്റെ ചട്ടക്കൂടുകൾ മറികടക്കാൻ താഴെ പറയുന്ന രണ്ട് ഘടകങ്ങൾ നിർണായകമാകും.
യഥാർഥ ആസ്തിഘടനയുടെ പരിശോധന: ടാറ്റ സൺസിന്റെ വരുമാന അനുപാതത്തിൽ മാറ്റം വന്നതുകൊണ്ട് മാത്രം ആർബിഐ തങ്ങളുടെ നിലപാട് മാറ്റണമെന്നില്ല. ലയനത്തിലൂടെ ധനകാര്യ ഇതര ബിസിനസിൽ നിന്നുള്ള വരുമാനം വർധിച്ചാലും, ടാറ്റ സൺസിന്റെ ആകെ ആസ്തിഘടനയിൽ ധനകാര്യ ആസ്തികളുടെ (Financial Assets) മേൽക്കൈ തുടരുന്നുണ്ടോ എന്ന് ആർബിഐ സൂക്ഷ്മമായി പരിശോധിക്കും. കമ്പനിയുടെ യഥാർഥ പ്രവർത്തന സ്വഭാവത്തെ അടിസ്ഥാനമാക്കിയാകും ആർബിഐയുടെ അന്തിമ വിലയിരുത്തൽ.
പരോക്ഷ ഫണ്ടിങ് (Indirect Access) വ്യവസ്ഥ: പൊതുഫണ്ടുകളിലേക്കുള്ള 'പരോക്ഷ പ്രവേശനത്തെ' കുറിച്ച് ആർബിഐ ഗവർണർ വെള്ളിയാഴ്ച നടന്ന ചടങ്ങിൽ പ്രതികരിക്കവേ പ്രത്യേകം എടുത്തുപറഞ്ഞിരുന്നു. ഓഹരി വിപണിയിൽ ലിസ്റ്റ് ചെയ്തിട്ടുള്ള മറ്റ് ഗ്രൂപ്പ് കമ്പനികളുമായുള്ള ടാറ്റ സൺസിന്റെ സാമ്പത്തിക ബന്ധങ്ങൾ പരോക്ഷ പൊതുഫണ്ടിങ്ങായി കണക്കാക്കാമെന്ന വിശാലമായ വ്യാഖ്യാനം ചട്ടങ്ങളിലുണ്ട്. പുതിയ ലയന തന്ത്രം ഈ ആശങ്കയ്ക്ക് പൂർണമായ പരിഹാരമാകുമോ എന്നതിൽ ബിസിനസ് ലോകത്ത് ഇപ്പോഴും വ്യക്തത വന്നിട്ടില്ല.
ടാറ്റ സൺസിൽ 18.37 ശതമാനം ഓഹരി വിഹിതമുള്ള ഷാപൂർജി പല്ലോൺജി ഗ്രൂപ്പ് ലിസ്റ്റിങ്ങിനെ പിന്തുണയ്ക്കുന്നു. ഓഹരിമൂല്യം പണമാക്കാനും കടബാധ്യത പരിഹരിക്കാനും ഇത് സഹായിക്കുമെന്നാണ് അവരുടെ നിലപാട്. എന്നാൽ ലിസ്റ്റിങ് ഹോൾഡിങ് കമ്പനിയുടെ സ്വഭാവത്തെയും ജീവകാരുണ്യ ലക്ഷ്യങ്ങളെയും ബാധിക്കുമെന്ന് ട്രസ്റ്റുകൾ വാദിക്കുന്നു. ഒരു വശത്ത് ഓഹരി പണമാക്കാനുള്ള താൽപര്യവും മറുവശത്ത് ഹോൾഡിങ് സ്വഭാവം നിലനിർത്താനുള്ള നിലപാടുമാണ് പരസ്പരം ഏറ്റുമുട്ടുന്നത്. ഇളവ് നൽകാൻ നിയമപരമായ അടിസ്ഥാനമില്ലെന്ന് ഇൻഗവേൺ റിസർച്ച് സർവീസസും നേരത്തേ ചൂണ്ടിക്കാട്ടിയിരുന്നു.
ടാറ്റ സൺസിന്റെ ഭാവി കോർപ്പറേറ്റ് ഘടന നിർണയിക്കുന്നതിൽ മൂന്നു കാര്യങ്ങളാണ് വരും ആഴ്ചകളിൽ നിർണായകമാകുക.
ബോർഡിന്റെ നിലപാട്: ടാറ്റ ട്രസ്റ്റുകൾ മുന്നോട്ടുവെച്ച ലയന നിർദേശം ടാറ്റ സൺസ് ബോർഡ് എന്ന്, എങ്ങനെ പരിഗണിക്കുമെന്നതാണ് ഒന്നാമത്തെ കാര്യം.
ആർബിഐയിലേക്കുള്ള അപേക്ഷ: ബോർഡ് അംഗീകാരം നൽകിയാൽ, എതിർപ്പില്ലാ സാക്ഷ്യപത്രത്തിനായുള്ള (NOC) ഔദ്യോഗിക അപേക്ഷ റിസർവ് ബാങ്കിന് മുന്നിലെത്തും.
റെഗുലേറ്ററുടെ തീരുമാനം: അപേക്ഷ സ്വീകരിച്ചാൽ ആർബിഐ എത്തരത്തിലാകും പ്രതികരിക്കുക എന്നതാണ് ഏറ്റവും നിർണായകം.
ടാറ്റ സൺസ് ഓഹരി വിപണിയിൽ ലിസ്റ്റ് ചെയ്യപ്പെടുകയാണെങ്കിൽ സെബിയുടെ (SEBI) കർശനമായ വെളിപ്പെടുത്തൽ ചട്ടങ്ങളും കോർപ്പറേറ്റ് ഗവേണൻസ് മാനദണ്ഡങ്ങളും കമ്പനിക്ക് ബാധകമാകും. എന്നാൽ ലയന നിർദേശത്തിന് ആർബിഐ പച്ചക്കൊടി കാട്ടിയാൽ ലിസ്റ്റിങ് ബാധ്യതയിൽ നിന്ന് കമ്പനിക്ക് പൂർണ ഇളവ് ലഭിച്ചേക്കും. അതുകൊണ്ടുതന്നെ, ആർബിഐയുടെ വരാനിരിക്കുന്ന നിലപാട് ടാറ്റ സൺസിന് മാത്രമല്ല, രാജ്യത്തെ മറ്റ് വൻകിട കോർപ്പറേറ്റ് ഹോൾഡിങ് കമ്പനികളോടുള്ള കേന്ദ്ര ബാങ്കിന്റെ നിയന്ത്രണ സമീപനം വ്യക്തമാക്കുന്ന സൂചന കൂടിയായിരിക്കും.
Read DhanamOnline in English
Subscribe to Dhanam Magazine