യൂറോപ്പിലേക്ക് ഇനി എളുപ്പത്തിൽ പോകാം: ഇന്ത്യൻ വിദ്യാർത്ഥികൾക്കും ഉദ്യോഗാർത്ഥികൾക്കും വൻ അവസരങ്ങളുമായി പുതിയ കരാർ

വിദ്യാർത്ഥികൾക്കും ഉദ്യോഗാർത്ഥികൾക്കും ഏറെ ഗുണകരമാകുന്ന ഇന്ത്യ-യൂറോപ്യൻ യൂണിയൻ മൊബിലിറ്റി കരാർ യാഥാർത്ഥ്യമായി. പ്രധാനമന്ത്രി നരേന്ദ്ര മോദിയും യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്‌നും തമ്മിൽ നടത്തിയ കൂടിക്കാഴ്ചയിലാണ് ഈ സുപ്രധാന തീരുമാനം ഉണ്ടായത്. ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാറിന്റെ (FTA) ഭാഗമായാണ് മൊബിലിറ്റി കരാറില്‍ ഏര്‍പ്പെട്ടിരിക്കുന്നത്. ഇന്ത്യൻ പ്രതിഭകൾക്ക് യൂറോപ്യൻ രാജ്യങ്ങളിൽ പഠിക്കാനും ജോലി ചെയ്യാനുമുള്ള തടസങ്ങൾ നീക്കുക എന്നതാണ് ഇതിന്റെ പ്രധാന ലക്ഷ്യം.

വിദ്യാർത്ഥികൾക്ക് ലഭിക്കുന്ന ആനുകൂല്യങ്ങൾ

ഈ കരാറിലെ ഏറ്റവും ശ്രദ്ധേയമായ വശം ഇന്ത്യൻ വിദ്യാർത്ഥികൾക്ക് യൂറോപ്പിൽ ലഭിക്കുന്ന 'അൺക്യാപ്ഡ് മൊബിലിറ്റി' (Uncapped Mobility) ആണ്. ഇതിലൂടെ ഇന്ത്യൻ വിദ്യാർത്ഥികൾക്ക് കൂടുതൽ നിയന്ത്രണങ്ങളില്ലാതെ യൂറോപ്യൻ യൂണിയൻ രാജ്യങ്ങളിൽ ഉന്നത പഠനത്തിനും ഗവേഷണത്തിനുമായി യാത്ര ചെയ്യാനും അവിടെ തന്നെ ജോലി കണ്ടെത്താനുമുള്ള അവസരം ലഭിക്കും. കൂടാതെ, ലോകത്തിലെ ഏറ്റവും വലിയ പബ്ലിക് റിസർച്ച് പ്രോഗ്രാമായ 'ഹൊറൈസൺ യൂറോപ്പുമായി' (Horizon Europe) സഹകരിച്ച് പ്രവർത്തിക്കാൻ ഇന്ത്യൻ ഗവേഷകർക്ക് ഈ കരാർ വഴി സാധിക്കും. ആർട്ടിഫിഷ്യൽ ഇന്റലിജൻസ്, ക്ലീൻ എനർജി തുടങ്ങിയ ആധുനിക സാങ്കേതിക മേഖലകളിൽ ഇന്ത്യൻ പ്രതിഭകളെ പ്രോത്സാഹിപ്പിക്കാൻ യൂറോപ്പ് ലക്ഷ്യമിടുന്നു.

തൊഴിൽ മേഖലയിലെ മാറ്റങ്ങൾ

വിദ്യാർത്ഥികൾക്ക് പുറമെ, പ്രൊഫഷണലുകൾക്കും സീസണൽ തൊഴിലാളികൾക്കും യൂറോപ്പിലെ തൊഴിൽ വിപണിയിൽ കൂടുതൽ എളുപ്പത്തിൽ പ്രവേശിക്കാൻ സാധിക്കും. യൂറോപ്പിലെ നൈപുണ്യ ദൗർലഭ്യം പരിഹരിക്കുന്നതിനായി ഇന്ത്യൻ വൈദഗ്ധ്യത്തെ ഉപയോഗപ്പെടുത്താനാണ് യൂറോപ്യൻ യൂണിയൻ താല്പര്യപ്പെടുന്നത്. വീസ നടപടിക്രമങ്ങള്‍ ലളിതമാക്കിയതും തൊഴിൽ പെർമിറ്റുകൾ ലഭിക്കാനുള്ള എളുപ്പവും വരും വർഷങ്ങളിൽ കൂടുതൽ ഇന്ത്യക്കാരെ യൂറോപ്പിലേക്ക് ആകർഷിക്കും.

ഉപരിപഠനത്തിനും അന്താരാഷ്ട്ര തൊഴിൽ അനുഭവങ്ങൾക്കും ആഗ്രഹിക്കുന്ന ഇന്ത്യൻ യുവാക്കൾക്ക് ഈ കരാർ വലിയൊരു വാതിലാണ് തുറന്നിടുന്നത്. മാറുന്ന ആഗോള സാമ്പത്തിക ക്രമത്തിൽ ഇന്ത്യയും യൂറോപ്പും തമ്മിലുള്ള ഈ സുപ്രധാന പങ്കാളിത്തം ഇരു രാജ്യങ്ങളിലെയും ജനങ്ങൾക്കിടയിലുള്ള ബന്ധം കൂടുതൽ ശക്തമാക്കാൻ സഹായിക്കും.

_{India-EU Mobility Pact opens up major education and employment opportunities for Indian students and professionals in Europe.}