ലോണിലുള്ള വീടോ ഫ്ലാറ്റോ വാങ്ങുന്നുണ്ടോ? പണം നൽകും മുമ്പ് പരിശോധിക്കേണ്ട കാര്യങ്ങള്‍ എന്തൊക്കെ?

നിലവിൽ ഹോം ലോണിലുള്ള ഒരു ഫ്ലാറ്റോ വീടോ വാങ്ങുന്നത് സ്വാഭാവികമാണെങ്കിലും, വിൽപ്പനക്കാരന് പണം കൈമാറുന്നതിന് മുൻപ് കൃത്യമായ സാമ്പത്തിക-നിയമ പരിശോധനകൾ നടത്തേണ്ടതുണ്ട്. ബാങ്കിൽ പണയത്തിലിരിക്കുന്ന വസ്തു സ്വന്തമാക്കുമ്പോൾ സാമ്പത്തിക നഷ്ടവും നിയമകുരുക്കുകളും ഒഴിവാക്കാൻ ശ്രദ്ധിക്കേണ്ട പ്രധാന ഘടകങ്ങളാണ് ഇവിടെ പരിശോധിക്കുന്നത്.

ഇവ ശ്രദ്ധിക്കുക

ലോൺ ഫോർക്ലോഷർ ലെറ്റർ (Foreclosure Letter): വിൽപ്പനക്കാരനോട് ബാങ്കിൽ നിന്ന് ലോൺ ഫോർക്ലോഷർ സ്റ്റേറ്റ്‌മെന്റ് വാങ്ങാൻ ആവശ്യപ്പെടുക. നിശ്ചിത തീയതിയിൽ ലോൺ പൂർണമായി അടച്ചുതീർക്കാൻ എത്ര തുക നൽകണമെന്ന് ഇതിലൂടെ കൃത്യമായി മനസിലാക്കാം.

ബാങ്കിലേക്ക് നേരിട്ട് തുക കൈമാറുക: ആകെ വിലയുടെ മുഴുവൻ തുകയും വിൽപ്പനക്കാരന്റെ അക്കൗണ്ടിലേക്ക് നൽകരുത്. ഉദാഹരണത്തിന്, ലോൺ കുടിശ്ശികയുള്ള തുക ബാങ്കിലേക്ക് നേരിട്ട് അടച്ച് ലോൺ ക്ലിയർ ചെയ്യുകയും, ബാക്കി തുക മാത്രം വിൽപ്പനക്കാരന് കൈമാറുകയും ചെയ്യുന്ന രീതി സ്വീകരിക്കുക.

ബാങ്കുകൾ തമ്മിലുള്ള ഏകോപനം: വാങ്ങുന്നയാളും പുതിയ ഹോം ലോൺ എടുക്കുന്നുണ്ടെങ്കിൽ, ഇരു ബാങ്കുകളും തമ്മിൽ തുക കൈമാറ്റവും ആധാരം കൈമാറുന്ന ക്രമവും രേഖാമൂലം ഉറപ്പാക്കണം. പുതിയ ലോൺ അനുമതി ലഭിച്ചതുകൊണ്ടു മാത്രം പഴയ ലോൺ താനേ അടഞ്ഞുപോകില്ല.

ടൈറ്റിൽ പരിശോധനയും മറ്റ് കുടിശ്ശികകളും: ഒരു പ്രോപ്പർട്ടി വക്കീൽ മുഖേന ഉടമസ്ഥാവകാശ രേഖകൾ, സെയിൽ ഡീഡ്, ബിൽഡിംഗ് പ്ലാൻ അംഗീകാരങ്ങൾ എന്നിവ കൃത്യമായി പരിശോധിക്കണം. കൂടാതെ പ്രോപ്പർട്ടി ടാക്സ്, ഹൗസിംഗ് സൊസൈറ്റി മെയിന്റനൻസ് തുകകൾ എന്നിവ പൂർണമായി അടച്ചിട്ടുണ്ടെന്ന് ഉറപ്പുവരുത്തുക.

അസൽ ആധാരങ്ങൾ തിരികെ വാങ്ങൽ: വായ്പ അടച്ചുതീർത്താൽ അസൽ പ്രോപ്പർട്ടി രേഖകൾ തിരികെ നൽകാൻ 2023 സെപ്റ്റംബറിലെ ആർ.ബി.ഐ (RBI) നിർദ്ദേശപ്രകാരം ബാങ്കുകൾക്ക് 30 ദിവസത്തെ സമയപരിധിയുണ്ട്. കാലതാമസം വരുത്തിയാൽ പ്രതിദിനം 5,000 രൂപ നഷ്ടപരിഹാരം നൽകാൻ ബാങ്കുകൾക്ക് ബാധ്യതയുണ്ട്.