പാരമ്പര്യമായോ സമ്മാനമായോ ലഭിച്ച ഓഹരികൾക്ക് നികുതി നൽകണോ? മൂലധന നേട്ടം എങ്ങനെ കണ്ടെത്താം?

പാരമ്പര്യമായോ സമ്മാനമായോ ലഭിച്ച ഓഹരികൾ വിൽക്കുമ്പോൾ അവയുടെ യഥാർത്ഥ വാങ്ങൽ വിലയോ (Cost of acquisition) വാങ്ങിയ തീയതിയോ അറിയില്ലെങ്കിൽ നികുതി കണക്കാക്കാൻ പ്രത്യേക നിയമങ്ങളുണ്ട്. ഇത്തരം സാഹചര്യങ്ങളിൽ നിക്ഷേപകർ അറിഞ്ഞിരിക്കേണ്ട പ്രധാന കാര്യങ്ങളാണ് ഇവിടെ പരിശോധിക്കുന്നത്.

ശ്രദ്ധിക്കേണ്ട കാര്യങ്ങള്‍

1. വാങ്ങൽ ചെലവ് കണക്കാക്കുന്ന രീതി: പാരമ്പര്യമായി ലഭിച്ച ഓഹരികളുടെ യഥാർത്ഥ വാങ്ങൽ ചെലവ് ലഭ്യമല്ലെങ്കിൽ, 2018 ജനുവരി 31-ലെ വിപണി വില (Fair Market Value - FMV) വാങ്ങൽ ചെലവായി (Cost) കണക്കാക്കി ദീർഘകാല മൂലധന നേട്ടം (LTCG) നിശ്ചയിക്കാൻ നികുതിദായകർക്ക് സാധിക്കും. 2018 ജനുവരി 31-ന് മുൻപ് ലഭിച്ച ബോണസ് ഓഹരികൾക്കും ഈ നിയമം ബാധകമാണ്. എന്നാൽ അതിനുശേഷം ലഭിച്ച ബോണസ് ഓഹരികളുടെ വാങ്ങൽ ചെലവ് 'പൂജ്യം' (Nil) ആയിട്ടാണ് കണക്കാക്കുന്നത്. ഇഷ്യൂ ചെയ്ത ബോണസ് ഓഹരികളുടെ ചരിത്രം ലഭിക്കുന്നതിനായി നിങ്ങളുടെ ബ്രോക്കറുമായി പരിശോധിക്കാം അല്ലെങ്കിൽ ഇന്റർനെറ്റിൽ തിരയാം.

2. ഹോൾഡിംഗ് പീരിയഡ് (Holding Period): ലിസ്റ്റ് ചെയ്ത ഓഹരികൾ 12 മാസത്തിൽ കൂടുതൽ കൈവശം വെച്ചാൽ അത് ദീർഘകാല മൂലധന നേട്ടമായി കണക്കാക്കും. പാരമ്പര്യമായി ലഭിച്ച ഓഹരികളുടെ കാര്യത്തിൽ, യഥാർത്ഥ ഉടമ ഓഹരി വാങ്ങിയ തീയതി മുതൽ നിലവിലെ ഉടമയുടെ കൈവശമുള്ള സമയം വരെയുള്ള ആകെ കാലയളവാണ് ഹോൾഡിംഗ് പീരിയഡായി കണക്കാക്കുന്നത്.

3. സമ്മാനമായി നൽകുമ്പോൾ (Gifting Shares): ഓഹരികൾ പാരമ്പര്യമായി ലഭിക്കുമ്പോൾ നിലവിൽ നികുതി ബാധ്യതയില്ല. അതുപോലെ, മക്കൾക്കോ മറ്റ് അടുത്ത ബന്ധുക്കൾക്കോ ഓഹരികൾ സമ്മാനമായി നൽകുമ്പോഴും നികുതി നൽകേണ്ടതില്ല. എങ്കിലും, കൃത്യമായ രേഖകൾക്കായി ഒരു ഗിഫ്റ്റ് ഡീഡ് (Gift Deed) തയാറാക്കുന്നത് ഉചിതമായിരിക്കും. എന്നാൽ, ഓഹരികൾ സമ്മാനമായി ലഭിച്ച വ്യക്തി അത് പിന്നീട് വിൽക്കുമ്പോൾ മൂലധന നേട്ട നികുതി നൽകേണ്ടി വരും.

പ്രായപൂർത്തിയാകാത്ത മക്കളുടെ പേരിലാണ് ഓഹരികളെങ്കിൽ, അതിൽ നിന്നുള്ള വരുമാനം മാതാപിതാക്കളിൽ ഉയർന്ന വരുമാനമുള്ളയാളുടെ വരുമാനത്തോടൊപ്പം ചേർക്കപ്പെടും (Clubbing of income). ഇതിൽ ഓരോ കുട്ടിക്കും 1,500 രൂപ വരെയുള്ള വരുമാനത്തിന് ഇളവ് ലഭിക്കും.