നികുതിദായകർക്ക് കൂടുതൽ അനുകൂലം, ഐ.ടി.ആർ നിർബന്ധിത പരിശോധനയ്ക്ക് പുതിയ മാർഗനിർദ്ദേശങ്ങൾ പുറത്തിറക്കി

ആദായനികുതി റിട്ടേണുകൾ നികുതിദായകന്റെ യഥാർത്ഥ വരുമാനവുമായി പൊരുത്തപ്പെടുന്നുണ്ടെന്ന് ഉറപ്പാക്കുന്നതിനായി, 2025-26 സാമ്പത്തിക വർഷത്തേക്കുള്ള നിർബന്ധിത സൂക്ഷ്മപരിശോധനയ്ക്കായി (Compulsory Scrutiny) സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) പുതിയ മാർഗനിർദ്ദേശങ്ങൾ പുറപ്പെടുവിച്ചു. നികുതി വെട്ടിപ്പ് തടയുന്നതിനും കൂടുതൽ സുതാര്യത ഉറപ്പാക്കുന്നതിനുമായാണ് വാർഷിക അടിസ്ഥാനത്തിൽ ഇത്തരം മാർഗ്ഗനിർദ്ദേശങ്ങൾ പുറത്തിറക്കുന്നത്.

പ്രധാന പരിശോധനാ വിഭാഗങ്ങൾ

പ്രധാനമായും ട്രസ്റ്റുകൾ, സ്ഥാപനങ്ങൾ, എൻജിഒകൾ എന്നിവരുടെ രജിസ്ട്രേഷനോ അംഗീകാരമോ 2025 മാർച്ച് 31-നകം റദ്ദാക്കപ്പെടുകയോ നിരസിക്കപ്പെടുകയോ ചെയ്തിട്ടും, അവർ ഐടിആർ-7 (ITR-7) വഴി നികുതി ഇളവുകൾക്കായി അപേക്ഷിച്ചിട്ടുണ്ടെങ്കിൽ അത്തരം കേസുകൾ നിർബന്ധിത പരിശോധനയ്ക്ക് വിധേയമാക്കും. കൂടാതെ, വിവിധ ഇന്റലിജൻസ് ഏജൻസികളിൽ നിന്ന് ലഭിച്ച നികുതി വെട്ടിപ്പ് സംബന്ധിച്ച കൃത്യമായ വിവരങ്ങളുടെ അടിസ്ഥാനത്തിലുള്ള കേസുകളും സെർച്ച് ആൻഡ് സീഷർ (Search and Seizure) വിഭാഗത്തിൽപ്പെടുന്ന കേസുകളും ഈ പട്ടികയിൽ ഉൾപ്പെടും.

മുൻപത്തെ അസസ്മെന്റ് വർഷങ്ങളിൽ ആവർത്തിച്ചുള്ള നിയമപ്രശ്നങ്ങൾ മൂലം വരുമാനത്തിൽ കൂട്ടിച്ചേർക്കലുകൾ (Additions) ഉണ്ടായ കേസുകളിലും കർശന പരിശോധനയുണ്ടാകും. ഇതിൽ എട്ട് മെട്രോ നഗരങ്ങളിൽ (അഹമ്മദാബാദ്, ബെംഗളൂരു, ചെന്നൈ, ഡൽഹി, ഹൈദരാബാദ്, കൊൽക്കത്ത, മുംബൈ, പൂനെ) 50 ലക്ഷം രൂപയിൽ കൂടുതലുള്ള തുകകളും മറ്റ് നഗരങ്ങളിൽ 20 ലക്ഷം രൂപയിൽ കൂടുതലുള്ള തുകകളും ഉൾപ്പെടുന്ന കേസുകളാണ് പരിശോധിക്കുക.

നികുതിദായകർക്ക് ആശ്വാസം

എന്നാൽ, ഇത്തവണത്തെ മാർഗനിർദ്ദേശങ്ങൾ നികുതിദായകർക്ക് കൂടുതൽ അനുകൂലമാണെന്ന് വിദഗ്ധർ അഭിപ്രായപ്പെടുന്നു. എഐഎസ് (AIS) അല്ലെങ്കിൽ ഓട്ടോമേറ്റഡ് ഡാറ്റ അനലിറ്റിക്സ് വഴി കണ്ടെത്തുന്ന സാധാരണ പൊരുത്തക്കേടുകൾ മാത്രം അടിസ്ഥാനമാക്കി നിർബന്ധിത സൂക്ഷ്മപരിശോധന നടത്തില്ല; മറിച്ച് കൃത്യമായ തെളിവുകളുടെ അടിസ്ഥാനത്തിൽ മാത്രമേ നടപടിയുണ്ടാകൂ. അന്താരാഷ്ട്ര നികുതിയുമായി (International Taxation) ബന്ധപ്പെട്ട കേസുകളും ഈ പരിധിയിൽ വരും, എന്നാൽ അവ 'ഫേസ്‌ലെസ് അസസ്‌മെന്റ്' (Faceless Assessment) രീതിയിലായിരിക്കില്ല കൈകാര്യം ചെയ്യുക.

2025-26 വർഷത്തിൽ സമർപ്പിച്ച റിട്ടേണുകളിൽ സെക്ഷൻ 143(ii) പ്രകാരമുള്ള നോട്ടീസ് നൽകാനുള്ള സമയപരിധി 2026 ജൂൺ 30 വരെയാണെന്നും മാർഗനിർദ്ദേശങ്ങളിൽ വ്യക്തമാക്കിയിട്ടുണ്ട്. അനാവശ്യമായ തർക്കങ്ങൾ ഒഴിവാക്കി റിസ്ക് സാധ്യതയുള്ള കേസുകളിൽ മാത്രം ശ്രദ്ധ കേന്ദ്രീകരിക്കാനാണ് പുതിയ ചട്ടക്കൂടിലൂടെ അധികൃതര്‍ ലക്ഷ്യമിടുന്നത്.