Personal Finance

ക്രെഡിറ്റ് കാർഡ് മിനിമം ഡ്യൂ: ചെറിയ ആശ്വാസം, വലിയ കടക്കെണി

ക്രെഡിറ്റ് കാര്‍ഡ് ബില്ലിലെ 'മിനിമം ഡ്യൂ' ആശ്വാസമല്ല, പലിശയുടെ കെണിയാണ്. കണക്കുകള്‍ നോക്കാം

Dhanam News Desk

ഉത്സവ സീസണിലെ ഷോപ്പിങ്ങില്‍ 50,000 രൂപയുടെ ബില്‍ വന്നു എന്ന് സങ്കല്‍പ്പിക്കുക. സാലറിക്ക് ഇനിയും ദിവസങ്ങളുണ്ട്. ആപ്പ് തുറന്നപ്പോള്‍ 'Minimum Due: ₹2,500' എന്ന് കണ്ടു. അത് അടച്ച് സമാധാനിച്ചു. പക്ഷേ ബാക്കി ₹47,500 രൂപ എവിടെയും പോയില്ല.

മിനിമം ഡ്യൂ എന്നാല്‍?

ബില്‍ 'overdue' ആകാതിരിക്കാന്‍ അടയ്‌ക്കേണ്ട കുറഞ്ഞ തുകയാണിത്. സാധാരണ ബില്ലിന്റെ ഏകദേശം 5 ശതമാനം. ലേറ്റ് ഫീ ഒഴിവാകും, പക്ഷേ കടം ഒഴിവാകില്ല.

കണക്ക് പറയുന്നത്

മിക്ക കാര്‍ഡുകളും അടയ്ക്കാത്ത തുകയ്ക്ക് പ്രതിമാസം ഏകദേശം 3 മുതല്‍ 3.75 ശതമാനം (വര്‍ഷം 36-45 ശതമാനം) പലിശ ഈടാക്കുന്നു. SBI Card പോലുള്ള ഇഷ്യൂവര്‍മാരുടെ നിബന്ധനകളില്‍ ഇത് പ്രതിമാസം 3.5 ശതമാനം വരെയാണ്. പലിശയ്ക്ക് 18 ശതമാനം GST വേറെ.

₹47,500-ന്റെ ഒരു മാസത്തെ പലിശ ഏകദേശം 1,660, GST ഏകദേശം ₹300.

അടുത്ത മാസവും ₹2,500 അടച്ചാല്‍ ഏകദേശം ₹1,960 പലിശയിലേക്കും നികുതിയിലേക്കും പോകും. കടം കുറയുന്നത് ഏകദേശം ₹540 രൂപ മാത്രം.

ഇങ്ങനെ തുടര്‍ന്നാല്‍ കടം തീരാന്‍ ഏകദേശം 38 മാസം, ആകെ അടയ്ക്കുന്നത് ഏകദേശം ₹95,000.

ഇരട്ടി പ്രഹരം: മുന്‍ ബില്‍ പൂര്‍ണമായി അടച്ചില്ലെങ്കില്‍ പലിശരഹിത കാലയളവ് നഷ്ടമാകും. പുതിയ പര്‍ച്ചേസുകള്‍ക്കും പലിശ വരാം. ലിമിറ്റിന്റെ വലിയ ഭാഗം ബാക്കി നില്‍ക്കുന്നത് ക്രെഡിറ്റ് സ്‌കോറിനെയും ബാധിക്കാം. ഉപയോഗം ലിമിറ്റിന്റെ ഏകദേശം 30 ശതമാനത്തില്‍ താഴെ നിര്‍ത്തണമെന്നാണ് വിദഗ്ധര്‍ സാധാരണ ഉപദേശിക്കുന്നത്.

മിനിമം തുക മാത്രം അടച്ചാല്‍ തിരിച്ചടവ് വര്‍ഷങ്ങള്‍ നീളുമെന്നും കൂട്ടുപലിശ വരുമെന്നും ബില്ലില്‍ മുന്നറിയിപ്പ് നല്‍കണമെന്ന് റിസര്‍വ് ബാങ്കിന്റെ മാര്‍ഗനിര്‍ദേശങ്ങളിലുണ്ട്. ലേറ്റ് പേയ്മെന്റ് ചാര്‍ജ് ബാക്കി തുകയ്ക്ക് മാത്രമേ ചുമത്താവൂ എന്നും നിബന്ധനയുണ്ട്. അപകടം അറിയിക്കേണ്ട ചുമതല ബാങ്കിനാണ്, ശ്രദ്ധിക്കേണ്ടത് നിങ്ങളും.

എന്ത് ചെയ്യാം?

ഡ്യൂ ഡേറ്റിന് മുന്‍പ് മുഴുവന്‍ തുകയും അടയ്ക്കുക

ഓട്ടോ ഡെബിറ്റില്‍ 'Total Amount Due' തിരഞ്ഞെടുക്കുക, 'Minimum Due' അല്ല.

ഒറ്റയടിക്ക് പറ്റില്ലെങ്കില്‍ ബില്ല് EMI ആക്കുക. നിരക്ക് പലപ്പോഴും വര്‍ഷം 12-18 ശതമാനമാണ്, പ്രോസസിങ് ഫീ ഉണ്ടാകാം

കടം തീരുംവരെ ആ കാര്‍ഡില്‍ പുതിയ ചെലവ് ഒഴിവാക്കുക

Read DhanamOnline in English

Subscribe to Dhanam Magazine

SCROLL FOR NEXT